Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՈՒԽՏԱԳՆԱՑՈՒԹՅՈՒՆ ՍՈՒՐԲ ՍԱՐԳՍԻ ՏՈՆԻ ԱՌԻԹՈՎ

ունվարի 31-ին՝ Սուրբ Սարգսի տոնի ուրախ առիթով, մի փոքրիկ խումբ հավատացյալներ, Զարիկ Իգիթյանի նախաձեռնությամբ, մեկնեցին ուխտագնացության Երեւանի 5-րդ մասիվի Ս. Սարգիս, առաջնորդանիստ Ս. Սարգիս, Աշտարակի Ս. Սարգիս եկեղեցիներ:

Սուրբ Սարգիսն այսօր իր վկայությամբ բոլորիս պատգամում է անսասան, անկոտրում սիրո հավատք: Զորավարի կյանքը նվիրագործման եւ սրբագործության օրինակ է, հավատքը հեղափոխիչ ու կենսագործող, իսկ արիաշունչ ոգին՝ քրիստոսասիրություն ներշնչող ու ներգործող: «Մի երկնչեք յայնցմանէ, որ սպանանեն զմարմին եւ զհոգի ոչ կարեն սպանանել…» (Մատթ. Ժ 28): Ավետարանական այս պատգամն իր կյանքում աներկբայորեն ընդունած Քրիստոսի քաջասիրտ վկան, Մարտիրոս որդու եւ տասնչորս նվիրյալ զինակիցների հետ, հավատքի սուրբ պատերազմ մղեց՝ հավաստելով հոգու անմահությունը: Դարեր ի վեր պատմվում է, թե արագահաս Սուրբը հայցել է Տիրոջն իրականացնել նրանց իղձերը, ովքեր իր անունով կդիմեն Աստծուն: Հայոց աշխարհում, նահատակների հեղած արյամբ, վեր խոյացան քրիստոնեական հավատքի ընձյուղները, դարձան ծաղկած խաչքարեր, աղոթաբույր վանքեր ու սիրո, հավատքի տաճարներ: Այդ տաճարներից է նաեւ Երեւանի 5-րդ Մասիվի Ս. Սարգիս եկեղեցին, ուր այցելողներն իրենց իղձերի իրականացումը կապում են արագահաս Սրբի զորության հետ:

ՀԻՆԳԵՐՈՐԴ ՄԱՍԻՎԻ ԵՎ ԱՌԱՋՆՈՐԴԱՆԻՍՏ
Ս. ՍԱՐԳԻՍ ԵԿԵՂԵՑԻՆԵՐ

Ուխտավորները ճանապարհ ընկան վաղ առավոտյան: Տեղ հասնելով՝ Ս. Սարգիս եկեղեցում ներկա գտնվեցին մատուցվող Սուրբ եւ անմահ Պատարագին: Օրվա պատարագիչն էր Տ. Նորայր քհն. Բաղդասարյանը: Սրբազան արարողակարգի ընթացքում՝ «Հայր մեր»-ից առաջ, ուխտավորներն ստացան Սուրբ Հաղորդություն:

Հաջորդ հանգրվանն առաջնորդանիստ Ս. Սարգիս եկեղեցին էր: Այստեղ այցելուները խոնարհվեցին Սրբի մասունքակիր աջին, որը, Ն.Ս.Օ.Տ.Տ. Գարեգին Բ Ամենայն Հայոց Հայրապետի արտոնությամբ, բերվել էր Մայր Աթոռ Սուրբ Էջմիածնից, ինչպես նաեւ Ս. Մաշտոցի անվան Մատենադարանից բերված ձեռագիր Ավետարանին, որ 17-րդ դարում (1693 թ.) ընդօրինակվել է Ավետիս երեցի կողմից, նույն եկեղեցում: Այստեղ վերջիններս վառեցին իրենց հավատի մոմերը՝ մեկ անգամ եւս հայցելով արագահաս Սրբի բարեխոսությունը:

ԱՇՏԱՐԱԿԻ Ս. ՍԱՐԳԻՍ ՄԱՏՈՒՌԸ

Վերջին կանգառը Աշտարակի Ս. Սարգիս մատուռն էր: Այն կառուցվել է 2000 թվականին: Բարձունքի վրա գտնվող աղոթատունը կարծեք թե հսկում է հայոց աշխարհը: Ուխտավորներն այստեղ եւս խոնարհվեցին Ս. Սարգսի մասունքին, վառեցին իրենց մոմերը՝ կրկին անգամ խնդրելով. «Երկնավոր Թագավորի սուրբ զորապետ, մեր անձերի փրկության համար եղիր բարեխոս…»:

ԱԼՎԱՐԴ ԿԱՂԶՎԱՆՑՅԱՆ

>>>