Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՀԻՆԱՆՑ ՉՈՐՐՈՐԴ ԿԱՄ ԿԱՐՄԻՐ ԿԻՐԱԿԻ
ՈՒԽՏԻ ՍՈՒՐԲ ՊԱՏԱՐԱԳ ՍԱՌՆԱՂԲՅՈՒՐԻ ԿԱՐՄԻՐ ՎԱՆՔՈՒՄ

այ Առաքելական Սուրբ Եկեղեցու տոնացույցում Սուրբ Հարության տոնից մինչեւ Հոգեգալուստ ընկած շրջանը կոչվում է Հինանց շրջան: Յուրաքանչյուր կիրակի ունի իր հատուկ անվանումն ու խորհուրդը: Հինանց շրջանի չորրորդ կիրակին կոչվում է Կարմիր կիրակի:

Ապրիլի 21-ին՝ Հինանց Կարմիր կիրակի օրը, Սառնաղբյուրի Հոգեվանքում (Կարմիր վանք) մատուցվեց ուխտի Սուրբ եւ անմահ Պատարագ` ձեռամբ Տ. Տաթեւ քահանա Մարուքյանի: Սրբազան արարողակարգին ներկա էին ոչ միայն տեղի բարեպաշտ հավատավորները, այլ նաեւ մեծաթիվ ուխտավորներ:

«Մի՛ վախեցեք, սիրելիներ, եթե մենք հավատարիմ ենք, պետք է պատրաստ լինենք փոթորիկների, աղետների, պատերազմների, հիվանդությունների, բայց, այս ամեն ինչից զատ, պետք է մեր հայացքը հառենք մեզ սիրող, փայփայող Տեր Հիսուսին: Այո՛, Նա էլ չարչարվեց: Եթե ունենայինք Ուսուցիչ, Վարդապետ, Աստված, որ ամբողջ կյանքը երանավետ անցկացրած լիներ եւ այդպես համբարձվեր, կասեինք` անարդար է, մեզ բաժին հասած այս հիվանդությունն անտեղի է, այս տանջանքն անարդար է, այս պատերազմն անարդար է: Բայց մեր Տերն այդ ամենի միջով անցավ, ամենասոսկալի չարչարանքները կրեց, որպեսզի մեզ ինչ էլ պատահի, մենք իմանանք` այս աշխարհով չի սահմանափակվում ամեն բան:

Մեր Տերը՝ Հիսուս Քրիստոս, մեզ հավիտենական կյանք է պատրաստել: Այս աշխարհում հեղած արյունը հավիտենության մեջ երանության ջուր է, նահատակությունը՝ հավիտենության, Տիրոջ անդաստանի մեջ, որպես նորաբողբոջ ծաղիկ, ծնվելու նշան: Այստեղ կարող է ընկնենք, տրորվենք, բայց Տիրոջ այգու մեջ լինենք լավագույն բերքը: Ուրեմն՝ մեր կյանքն այնպես ապրենք, որպեսզի լինենք Տիրոջ այգու լավագույն բերքը, Տիրոջ համար քաղցր, անուշ ու հաճելի»,- իր քարոզի ընթացքում առանձնակի շեշտեց պատարագիչ Տեր Հայրը:

Հավարտ Սուրբ Պատարագի կատարվեց Անդաստանի արարողություն, ինչպես նաեւ հնչեց բժշկության աղոթք:

ՄԱՐԻԱՄ ՍՈՒՔԻԿՅԱՆ

>>>