«Ի
ՎԵՐԱՅ ՍՈՒՐԲ ԳՐԻԳՈՐ ԼՈՒՍԱՒՈՐՉԻ ԱՋԻ ՀԱՍՏԱՏԵԱԼ
ԿԱՅ ԱՄԵՆԱՅՆ ԱԶԳՆ ՀԱՅՈՑ»
արտի
25-ին՝ Ս. Գրիգոր Լուսավորչի «Մուտն ի վիրապ» տոնի առիթով, նախաձեռնությամբ
Զարիկ Իգիթյանի եւ Ժաննա Խաչատրյանի, մի խումբ հավատացյալներ, Շիրակի
թեմի Առաջնորդ Տ. Միքայել արքեպս. Աջապահյանի օրհնությամբ, մեկնեցին
ուխտագնացության Խորվիրապ, որտեղից եղավ փրկությունն ազգիս:
ԽՈՐԱԽՈՐՀՈՒՐԴ ԻՐՈՂՈՒԹՅՈՒՆ… ԽՈՐՎԻՐԱՊ
Դեռ
հեռվից, ժայռին բազմած, մեզ իր գիրկն էր կանչում այդ սքանչելի սրբավայրը:
Որքան մոտենում էինք, այնքան ավելի արագ էին խփում մեր սրտի զարկերը,
ուզում էինք րոպե առաջ հասնել առասպելական վայր, ուր մատուցվում
էր Սուրբ եւ անմահ Պատարագ՝ ձեռամբ Տ. Արարատ քհն. Պողոսյանի:
Չարչարանաց վիհը մութ ու փոքր տարածություն է, իսկ հողե հատակը մշտավառ
մոմերի կաթիլներով է պատվել: Մոմի լույսը, լուսավորելու փոխարեն,
անհայտ խորհրդավորության շամանդաղ-քող է տարածում շուրջբոլորը: Ես
էլ, հոգուս մեջ վիրապացած, ջանում եմ «տեսնել» տասնյոթ դարեր առաջ
այստեղ «ապրած» մարդուն: Աչքերս դեպ վեր, դեպ ձեղունը հառած՝ խորհում
եմ, թե այս աննշան բացվածքից ինչպե՞ս է արեգակի լույսը ներս թափանցել:
Ըստ Գրիգոր Տաթեւացու՝ Լուսավորչի տասներկու չարչարանքներն ունեն
հոգեւոր խորհուրդ. «Նախ մարդն ունի 12 զգայարան, որ ապականվել էին
Ադամի մեղանչումով: Ըստ այդմ՝ Գրիգորը, 12 չարչարանքներից յուրաքանչյուրով,
որոնցից ամեն մեկը կապված է որեւէ զգայարանի հետ, մաքրեց դրանք ապականությունից:
Նաեւ Քրիստոսի 12 առաքյալներից յուրաքանչյուրը նահատակվել է մյուսներից
տարբերվող չարչարանքներով: Ս. Գրիգոր Լուսավորիչն այս 12 չարչարանքներից
յուրաքանչյուրը կրել է՝ դառնալով 12 առաքյալներին չարչարանակից»
(Հաճախապատում):
Հավարտ մատուցվող Սուրբ Պատարագի, եկեղեցում, Լուսավորչի մասունքակիր
Ս. Աջով, վանորեից տեսուչ Տ. Արտակ եպս. Տիգրանյանի ձեռամբ, կատարվեց
ջրօրհնյաց կարգ: Այնուհետեւ օրհնված ջուրը բաժանվեց ներկաներին:
«ՕԹԵԱՑ ԽԱՉ» ՍՐԲԱՎԱՅՐԸ
ՄԱՐՄԱՐԱՇԵՆԻ Ս. ԳԵՎՈՐԳ ԵԿԵՂԵՑԻՆ
Ուխտավորները եղան նաեւ, Խորվիրապից արեւմուտք գտնվող, «Օթեաց Խաչ»
սրբավայրում, ուր, ըստ ավանդության, հանդիպել են Թադեոս եւ Բարդուղիմեոս
Առաքյալները:
1869 թ. վանքի վանահայր Վարդան Ալեքսանդրապոլսեցին «Օթեաց Խաչում»
կառուցել է մատուռ: Ս. Առաքյալների հանդիպման խորհրդանշական տեղում
կանգնեցվել է յոթը մետրանոց խաչարձան, որը 2015 թվականին, Խաչի գյուտի
տոնի օրը, օծվել է Մայր Աթոռի վանորեից տեսուչ Տ. Արտակ եպս. Տիգրանյանի
ձեռամբ:
Ուխտավորների հաջորդ հանգրվանը Մարմարաշենի Ս. Գեւորգ եկեղեցին էր:
Այստեղ եւս վերջիններս վառեցին իրենց հավատի մոմերը՝ Բարձրյալից
հայցելով բարերար շնորհներով գթալ Իր արարածներին:
Ս. ԳԱՅԱՆԵ, Ս. ՀՌԻՓՍԻՄԵ
Երրորդ հանգրվանը Ս. Գայանե եւ Ս. Հռիփսիմե եկեղեցիներն էին, ուր
ուխտավորները մոմեր վառեցին եւ Ս. Կույսերի գերեզմաններին ծնրադիր
աղոթեցին՝ հայցելով նրանց բարեխոսությունը:
Ուշ երեկոյան ուխտավորները բռնեցին տունդարձի ճամփան՝ հոգիներում
անթեղած օրվա խորհուրդը:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ԱՐՄԻՆԵ ԱՍԱՏՐՅԱՆԻ
>>>
|
|