ՄԱՐԻԱՄ
ՄԱԳԴԱՂԵՆԱՑԻՆ ԵՎ ՏԻԲԵՐԻՈՍ ԿԱՅՍՐԸ
նոջ
մանրիկ քայլերը, հաղթանդամ զորականի քայլվածքի պես, աղմկոտ էին հնչում
ընդարձակ պալատում՝ ընդելուզված ոսկեկոփ սյուներով, լուսասփյուռ
ջահերով, տարերային աստվածություններ ներկայացնող կուռքերով: Պալատի
սրահներն առհասարակ մեհյանի տպավորություն էին թողնում: Զինվորն
արձակեց կնոջ ձեռնակապերը, պատվիրեց ներս մտնելիս խոր գլուխ տալ
արքաների արքային, ապա բարբարոսի բրտությամբ քարշ տվեց նրան դատաստանի
սրահ: Այստեղ աջ եւ ձախ դրված կրակարանների կողքերին շարվել էին
սպիտակազարդ քուրմերը՝ ներկած դեմքերով: Նրանցից այն կողմ բազմած
էին ինչ-որ մարդիկ, որոնց միջից կայսրը աչքի էր ընկնում արտասովոր
զարդարանքով ու պատվանդանի վրա նստած լինելու հանգամանքով:
Շեփորներն
ազդարարեցին դատավարության սկիզբը: Կապույտ թիկնոցով մի մարդ մոտեցավ
կայսերը, շշնջաց ականջին եւ հանձնեց պապիրուսի գալարը:
- Նորի՞ց,- վրդովվեց արքան,- հոգնել եմ արդեն. առանց հապաղելու է
պետք վերացնել այս ոչնչություններին՝ իրենց ռամկական հավատքի հետ
միասին: Մո՛տ եկ,- հրահանգեց նա:
Կինը հիշեց զինվորականի պատվերն ու առաջ գնալով գլուխ տվեց:
- Անունդ ի՞նչ է, որտեղի՞ց ես:
- Մարիամ, տե՛ր իմ, Մարիամ է անունս, Մագդաղայից եմ,- կմկմաց կինը:
- Քեզ պետք է հայտնի լինի, թե ինչո՞ւ ես հիմա այստեղ:
- Ամենեւին, արքա՛. շուկայում առեւտուր էի անում Զատկի համար, եկան
քո զինվորներն ու շղթայելով այստեղ բերեցին: Այժմ դատաստանի եմ կանգնած,
սակայն ինչո՞ւ, չգիտեմ:
Տիբերիոսը հեգնանքով ոտքից գլուխ չափեց խեղճացած կնոջը: «Դու այստեղ
ես, որովհետեւ նրանցից ես, ովքեր մահացածի միս ու արյուն են ուտում
իրենց գաղտնի հավաքատեղիներում, մանուկներ են զոհաբերում եւ ինչ-որ
մեռելի են պաշտում: Բայց սրանք տակավին այնքան էլ լուրջ զանցառություններ
չեն, որքան այն, որ դու եւ քո ընկերները արհամարհում եք Օլիմպոսի
բարձրյալ աստվածներին, հրաժարվում զոհ մատուցել նրանց: Ճի՞շտ եմ…»:
«Ճշմարիտ է այն, արքա՛, որ ոսկին ու արծաթը, փայտն ու քարը չեն կարող
աստված լինել. ես ձեռակերտ կուռքեր չեմ պաշտում, այլ` կենդանի Աստծուն,
երկնքի եւ երկրի Արարչին, որ իշխանություն ունի բոլոր մարմնավոր
էակների վրա»:
- Իսկ արքա՞ն, մի՞թե կայսրն էլ աստված չէ…
Մագդաղենացին խոնարհեց աչքերն ու մրմնջաց. «Մեկ բան գիտեմ միայն.
պետք է կայսրինը տալ կայսերը, իսկ Աստծունը` Աստծուն»: Կայսրը կատաղի
աչքերը ցոլացրեց կնոջ վրա: «Չե՞ս վախենում, ո՛վ ողորմելի,- բղավեց
նա,-որ քեզ նետեմ գազանների առաջ քո լպիրշության պատճառով»:
Մագդաղենացին մեղմիկ ժպտաց. «Տերն իմ լույսն է ու կյանքը, ո՞ւմից
վախենամ, Տերն իմ կյանքի ապավենն է, ո՞ւմից ես դողամ»: Լռություն
տիրեց: Նյարդայնացնող լռությունը խախտեց կայսեր ջղաձիգ հռհռոցը.
- Լսո՞ւմ եք՝ ինչ է ասում… Քեզ պես քանի՞ համարձակի են խժռել առյուծներս,
քեզ պես քանի՞ մեծախոս է զրկվել լեզվից, աչքերից, մատներից, քեզ
նման քանի՞ տոկուն է հեծեծել կրակի ու կուպրի մեջ… Ես կխղճամ քեզ
ու ազատություն կշնորհեմ ի փառս աստվածների, եթե դու հենց հիմա,
այստեղ երկրպագես կուռքերին ու զոհ մատուցես: Խոստանում եմ, արքայի
խոսք եմ տալիս. դրանով դու կքավես մեղքդ:
Քուրմերն արագորեն Մարիամի դիմաց բերեցին փոքրիկ կրակարանը: «Դե՛,
քեզ տեսնեմ, փրկիր ինքդ քեզ»,- նենգորեն վրա բերեց Տիբերիոսը:
- Իմ Փրկիչը մեկն է, արքա՛, Խաչյալ Հիսուս, ում մահն ու հարությունն
է ինձ կյանք տալիս: Ով հավատա Քրիստոսին, թեպետեւ մեռնի, կապրի,
ով հավատա Նրան, հավիտյան կապրի ինչպես Ինքը մեռավ ու հարություն
առավ մեռյալներից:
Բազմականները միաբերան դժգոհության ձայներ հանեցին: Տիբերիոսն առաջ
երկարեց ձեռքը, եւ աղմուկն իսկույն սանձվեց:
- Ձեր անմտությունը սահմաններ չունի,- սպառնալից դեպի կինը գալով
մռմռաց կայսրը: - Ավելի շուտ զամբյուղիդ միջի ձուն կկարմրի, կի՛ն,
քան մեռածը հարություն կառնի,- բղավեց բարձր, եւ հռհռոցն արձագանքեց
դղյակով մեկ:
Մագդաղենացու ձեռքը գնաց դեպի հավկիթը... «ՔՐԻՍՏՈՍ ՀԱՐՅԱՎ, արքա՛»,-
բացականչեց նա՝ արքային մեկնելով արյուն-կարմիր ձուն… Իսկ դահլիճը
սառեց համրությամբ…
>>>
|
|