ԳԵՐԱԳՈՒՅՆ
ՀՈԳԵՎՈՐ ԽՈՐՀՐԴԻ ՀԱՅՏԱՐԱՐՈՒԹՅՈՒՆԸ
արտի
21-ին Գերագույն Հոգեւոր Խորհուրդը, նախագահությամբ Ն.Ս.Օ.Տ.Տ. Գարեգին
Երկրորդ Ծայրագույն Պատրիարք եւ Ամենայն Հայոց Կաթողիկոսի, Բերձորի
(Լաչինի) միջանցքի արգելափակման 100-րդ օրվա վերաբերյալ հանդես է
եկել հայտարարությամբ.
«Խորը ցավով ենք արձանագրում, որ արդեն 100-րդ օրն է, ինչ Ադրբեջանի
իշխանությունները, հայատյաց քաղաքականության սաստկացող դրսեւորումներով,
արգելափակված են պահում Արցախը Հայաստանի հետ կապող Բերձորի (Լաչինի)
միջանցքը:
Ադրբեջանի
կողմից Արցախի Հանրապետության հայ բնակչության նկատմամբ պարբերաբար
իրականացվող ֆիզիկական ու հոգեբանական ճնշումները, բռնություններն
ու ահաբեկչական գործողություններն առավել խորացնում են հումանիտար
աղետալի իրավիճակը: Հակառակ Արցախում տեղակայված խաղաղապահ անձնակազմի
ներդրած ջանքերի՝ ադրբեջանական իշխանությունների հանցավոր գործողությունների
հետեւանքով, ոտնահարվում են մարդկանց՝ երեխաների, կանանց եւ ծերերի
կյանքի, բուժում ստանալու, տեղաշարժի ու հիմնարար մյուս իրավունքները:
Բարձր ենք գնահատում ՄԱԿ-ի Միջազգային արդարադատության դատարանի
որոշումն Ադրբեջանի կողմից Բերձորի (Լաչինի) միջանցքի արգելափակումը
վերացնելու վերաբերյալ: Ողջունում ենք Եվրոխորհրդարանի վեհաժողովի
կոչը, որով Ադրբեջանի իշխանություններին հորդորվում է կյանքի կոչել
ՄԱԿ-ի Միջազգային արդարադատության դատարանի որոշումը:
Տարակուսանք ենք արտահայտում, որ հակառակ միջազգային հանրության,
վերջինիս իրավասու եւ ազդեցիկ կառույցների կողմից ճանապարհը բացելու
վերաբերյալ կտրական պահանջներին՝ առ այսօր արգելափակումը շարունակվում
է:
Հորդորում ենք ՄԱԿ-ի, Եվրախորհրդարանի եւ Եվրամիության պատկան կառույցներին,
պետությունների ղեկավարներին ու կրոնական առաջնորդներին՝ հետեւողական
ջանքերով հասնել Ադրբեջանի կողմից Միջազգային դատարանի վճռի կատարմանը,
ցեղասպանական գործողությունների դատապարտմանը եւ Արցախի բնակչության
անվտանգ ու բնականոն կյանքի ապահովմանը:
Ադրբեջանի կողմից Միջազգային դատարանի որոշման հանդեպ բացահայտ անհարգալից
նման մոտեցման հանդուրժումը սաստկացնելու է հումանիտար ճգնաժամը,
նոր վտանգներ է ստեղծելու Արցախի ավելի քան 120.000 բնակչության
կյանքի համար, ստեղծելու է միջազգային դատական ատյանների վճիռները
կոպտորեն շրջանցելու աններելի նախադեպ՝ միաժամանակ խորը հուսախաբություն
առաջացնելով միջազգային արդարադատության նկատմամբ:
Առաքելական մեր Սուրբ Եկեղեցին, առաջնահերթություն ունենալով մարդկային
կյանքերի փրկությունն ու անվտանգությունը, հետեւողականորեն պաշտպանելու
է Արցախի ժողովրդի ինքնորոշման իրավունքի իրագործումը՝ անկախություն
հանուն փրկության ու անվտանգության սկզբունքով:»
ՄԱՅՐ ԱԹՈՌ Ս. ԷՋՄԻԱԾԻՆ
ՏԵՂԵԿԱՏՎԱԿԱՆ ՀԱՄԱԿԱՐԳ
>>>
|
|