Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՏՅԱՌՆԸՆԴԱՌԱՋԸ ՇԻՐԱԿԻ ՄԱՐԶԻ ԵՐԵԽԱՅԻ ԵՎ
ԸՆՏԱՆԻՔԻ ԱՋԱԿՑՈՒԹՅԱՆ ԿԵՆՏՐՈՆՈՒՄ

«Գնանք Տիրոջն ընդառաջ, Վառենք ջահեր ու կրակ, Կրակը գետնին առնի,
Որ գարնան ճամփան բացվի»:
ԺՈՂՈՎՐԴԱԿԱՆ ԵՐԳ

այ Առաքելական Եկեղեցին ամեն տարի փետրվարի 14-ին նշում է Տյառնընդառաջը՝ 40-օրյա Քրիստոսի տաճարընծայման տոնը: Փետրվարի 15-ին՝ «Երեխայի եւ ընտանիքի աջակցության կենտրոն»-ում, երեխաները (ուսուցիչներ՝ Էլյա Սահակյան, Արմինե Առաքելյան, Ալվարդ Կաղզվանցյան), իրենց աղոթքներով եւ տոնին առնչվող բեմականացված դրվագներով, ներկա հյուրերին ու ծնողներին ծանոթացրին տոնի նշանակությանն ու խորհրդին:

Անսովոր հմայք ուներ մանկական անմեղ շուրթերից հնչող Տերունական աղոթքը, որով բացվեց հայտագիրը: Այնուհետեւ աջակցության կենտրոնի բակում վառվեց Տյառնընդառաջի ավանդական խարույկը, որի շուրջ բոլորեց ուրախ շուրջպարը, ինչը մեծ հրճվանք ու ոգեւորություն պատճառեց ներկաներին:

Ոչ ոք չի կարող հերքել, որ հաստատուն է հայ մարդու հավատն առ Տերը, առ Հիսուսի նախանշած Եկեղեցին: Այդ անսահման հավատով է նա ամեն Տյառնընդառաջի տոնի գնում եկեղեցի եւ Ս. Խորանին վառվող կանթեղից լույսի իր մասը տանում հարազատ օջախ՝ այն Աստծո լույսով լուսավորելու համար:

Հանդիսության վերջում ներկաներին իր սրտի խոսքը հղեց աջակցության կենտրոնի տնօրեն Գոհար Յայլոյանը: Բաժանվեցին նաեւ, տոնի ժողովրդական մաս կազմող, աղանձի փոքրիկ կապոցներ, որոնք պատրաստել էր կենտրոնի աշխատակազմը: Այնուհետեւ երեխաները, Գյումրու «Ժողովրդական ճարտարապետության եւ քաղաքային կենցաղի թանգարան»-ի (Ձիթողցոնց տուն) բակում մասնակցեցին Տյառնընդառաջի ուրախ տոնին նվիրված միջոցառմանը:

ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ՀԱՍՄԻԿ ԳՐԻԳՈՐՅԱՆԻ

>>>