| ՏՈՆ
ՍՈՒՐԲ ՀԱԿՈԲ ՄԾԲՆԱ ՀԱՅՐԱՊԵՏԻ, ՄԱՐՈՒԳԵ
ՃԳՆԱՎՈՐԻ ԵՎ ՄԵԼԻՏՈՍ ԵՊԻՍԿՈՊՈՍԻ
 ուրբ
Հակոբ Մծբնա Հայրապետն Ընդհանրական Եկեղեցու հեղինակավոր ու սիրված
սրբերից է: Կատարած բազում հրաշքների շնորհիվ նրան կոչել են նաեւ
«Սքանչելագործ»:
Վարքագրական աղբյուրների համաձայն` Ս. Հակոբը մեր առաջին Հայրապետ
Ս. Գրիգոր Լուսավորչի հորաքրոջ որդին էր: Երբ Անակ Պարթեւի տոհմը
բնաջնջվում է, դայակները մանուկ Սուրենին ու Հակոբին փախցնում են
Կեսարիա, ուր նրանք դաստիարակվում են քրիստոնեական ոգով: Շատ չանցած
մանուկ Հակոբն ու քույրը տեղափոխվում են Պարսկաստան եւ որոշ ժամանակ
ապրում արքունիքում: Սակայն Հակոբը թողնում է ճոխ կյանքը՝ դառնալով
ճգնավոր:
Այնուհետեւ գնում է Մծբին` հանդիպում Մարուգե ճգնավորին, որը հռչակված
էր իր սրբակենցաղությամբ: Նրանից լսելով, որ մարդկանցից շատերը թեպետ
հավատքի են եկել, բայց թերահավատ են եւ կասկածում են Նոյան տապանի
գոյությանը, որոշում է բարձրանալ Արարատ լեռը, տապանը տեսնել եւ
մի մասնիկ բերել: Հակառակ անկոտրում կամքին` չի կարողանում հասնել
Արարատի գագաթը եւ, երկար տանջվելուց հետո, նիրհում է: Երազում հրեշտակն
այցելում է նրան եւ տապանից մի մասունք դնում գլխատակին:
Ըստ ավանդության՝ Ս. Հակոբի պառկած տեղում սառնորակ աղբյուր է բխում,
որ ուներ բուժիչ ու հրաշագործ հատկություններ: Աղբյուրի կողքին հետագայում
Սրբի անունով եկեղեցի է կառուցվում: Նոյան տապանի այդ մասունքը ցայսօր
պահվում է Մայր Աթոռ Ս. Էջմիածնում: Լինելով ժամանակի պատկառելի
անձնավորություներից մեկը՝ Սուրբը մասնակցում է 325 թվականի Նիկիայի
Տիեզերաժողովին: Իր կյանքի ընթացքում բազմաթիվ հրաշքներ է գործում:
Մծբինի եպիսկոպոսի մահից հետո Աստված Մարուգեին հայտնում է, որ Հակոբն
է լինելու աթոռի արժանի հետնորդը: Երկար տարիներ իր հոտը հովվելուց
հետո մահանում է 350 թվականին:
Ս. Մարուգե ճգնավորը եղել է Հակոբ Մծբնեցու աշակերտը: Քրիստոնեություն
է քարոզել Ասորիքում ու հայկական Միջագետքում:
Ս. Մելիտոսը՝ Անտիոքի եպիսկոպոսը († 381), ծնվել է Փոքր Հայքի Մելիտինե
քաղաքում եւ եղել Փոքր Հայքի Սեբաստիա քաղաքի եպիսկոպոսը 358 թ.,
ապա 360 թ. գահակալել Անտիոքի Աթոռին: Եղել է Բարսեղ Մեծի ընկերը,
պայքարել արիոսականների դեմ, ինչի պատճառով, հերետիկոսների սադրանքով,
երիցս աքսորվել է: Նախագահել է 381 թ. Կ. Պոլսի Երկրորդ Տիեզերական
ժողովը, սակայն մահացել է ժողովի ավարտից առաջ:
Այս տարի Հայոց Եկեղեցին Սրբերի հիշատակը կոգեկոչի դեկտեմբերի 17-ին:
>>>
|
|
