ԲԱՑԱՀԱՅՏՈՒՄ
ԵՆՔ ԱԶԱՏԱՆԸ
ոկտեմբերի
22-23-ն Ազատանի Ս. Հարություն - Ս. Ստեփանոս եկեղեցու կիրակնօրյա
դպրոցի սաները հյուրընկալեցին Մխիթար Սեբաստացի կրթահամալիրի 4-6-րդ
դասարանների աշակերտներին՝ առաջնորդությամբ հայրենագիտության ուսուցչուհի
Սոնա Փափազյանի, բնագիտության ուսուցչուհի Շուշան Ալեքսանյանի եւ
ազգային երգ ու պարի ուսուցչուհի Սեդա Թեւանյանի:
Այցի
նպատակն էր ճանաչել Ազատան գյուղը, ծանոթանալ գյուղաբնակների առօրյային,
նիստ ու կացին: Մի խոսքով՝ թեպետ կարճ ժամանակով, ապրել ինչպես ազատանցի:
Եվ որ ամենակարեւորն էր՝ կիրակնօրյա դպրոցի ավագ խմբի սաներն անձամբ
պետք է ներկայացնեին գյուղը:
Կրթահամալիրի ավագ խմբի սաներին վերջիններս դիմավորեցին եկեղեցու
բակում, հյուրերին ներկայացրին եկեղեցու, ինչպոս նաեւ կիրակնօրյայի
պատմությունը, թե ինչպես եւ ինչ են իրենք սովորում: Ապա եկեղեցում
միասին երգեցին հոգեւոր երգեր: Այնուհետեւ ազատանցի երեխաներն սկսեցին
ներկայացնել իրենց գյուղն ու գյուղի պատմությունը, շրջեցին Ազատանով,
ծանոթացրին պատմամշակույթային կառույցներին: Օրվա երկրորդ կեսին
հյուրերն արդեն ծանոթացան գրուղացու աշխատանքին ու առօրյային, իսկ
երեկոյան ականատես եղան նախրի դիմավորմանը:
Սեբասացիներն այցելեցին «խելացի» գոմ, տեսան, թե ինչպես են կիրառվում
նոր տեխնոլոգիաները եւ թե ինչպես են համապատասխան պայմաններն ավելի
դյուրին դարձնում աշխատանքը, նաեւ նպաստում կովերի կաթնատվության
բարձրացմանը: Իսկ «Մաքի» ոչխարաբուծարանում տեսան ոչխարների ֆրանսիական
ցեղատեսակներն ու ծանոթացան բուծարանի աշխատանքներին:
Այնուհետեւ
մասնակցեցին կարտոֆիլ քանդելու եւ հավաքելու գործընթացին, նաեւ սովորեցին,
թե ինչպես են պատրաստում կարտոֆիլի ավանդական փուռը, ինչի արդյունքում
ճաշակեցին սեփական ձեռքերով հավաքած ու իրենց պատրաստած փռի համեղ
կարտոֆիլը: Նաեւ մասնակցեցին թոնրի լավաշ թխելուն:
Հաջորդ օրը՝ հոկտեմբերի 23-ի առավոտյան, արժանապատիվ Տ. Մակար քհն.
Գալամդարյանի հետ մասնակցեցին նշխարի ու մասի պատրաստման արարողությանը,
որի ընթացքում Տեր Հայրը բացատրեց Ս. Հաղորդության խորհուրդը: Ապա
հյուրերը ներկա գտնվեցին Սուրբ եւ անմահ Պատարագին:
Սրբազան արարողակարգից հետո կրթահամալիրի երեխաները, ուսուցչուհի
Սեդա Թեւանյանի հետ, մեր սաներին ուսուցանեցին ազգային աշխատանքային
երգեր եւ ազգային միասնական երգ ու պարով ամփոփեցին երկօրյա այցը:
Հարազատ դարձած եւ արդեն իսկ նոր հանդիպման ծրագրի մշակման մտքերի
փոխանակումով երեխաները հրաժեշտ տվեցին միմյանց:
ԳՈՀԱՐ ԳԱԼԹԱԳԱԶՅԱՆ
>>>
|
|