ՀՈԳԵՒՈՐ
ԵՐԱԺՇՏՈՒԹՅԱՆ ՀԱՄԵՐԳ
ՍՈՒՐԲ ՅՈԹՎԵՐՔ ՄԱՅՐ ԵԿԵՂԵՑՈՒՄ
րաժշտության
ակունքը հոգեւոր սկիզբ ունի եւ կայանում է այն ժամանակ, երբ գիտակցությունը՝
«ես»-ը, քեզ առաջնորդելով մինչեւ մի պահի, դադարում է գերիշխող լինել,
ձուլվում է բացարձակի հետ: Դա այն պահն է, որ իր մեջ արարչությունն
է կրում, եւ որն այլ կերպ կոչում ենք աստվածային: Հատկապես հոգեւոր
երաժշտության ներքին ուժը հավատքից է բխում: Առանց հավատքի երաժիշտը
չի հասնի հնչյունների միաձուլմանը:
Ազգային-հոգեւոր
երաժշտության միջոցով ենք նաեւ դարեր շարունակ կարողացել պահել հայի
մեր դիմագիծը: Կոմիտաս վարդապետն ասում է. «Որքան ապրի հայկական
երաժշտությունը, այնքան կապրի Հայաստանը»: Կոմիտասի կյանքի գործն
էր հայոց պատմության ամենաողբերգական պահին կորստից փրկել, խորթ,
օտարամուտ տարրերից մաքրել, բյուրեղացնել հայոց երգը:
Հոկտեմբերի 24-ին Շիրակի թեմի բարեխնամ Առաջնորդ Տ. Միքայել արքեպս.
Աջապահյանի օրհնությամբ, ինչպես նաեւ «Մենք» բարեգործական ՀԿ-ի հովանավորությամբ,
Գյումրու Ս. Աստվածածին եկեղեցում կայացավ «Սաղմոսերգու» հոգեւոր
երաժշտության արական երգչախմբի համերգը, որի գեղարվեստական ղեկավարն
ու դիրիժորն է Վահե Բեգոյանը:
Ս. Յոթվերք առաջնորդանիստ մայր եկեղեցին լեփ-լեցուն էր եկեղեցասեր
ու երաժշտասեր գյումրեցիներով: Մոտ մեկ ժամ տեւած համերգի ընթացքում
հնչեցին միայն Կոմիտաս վարդապետի շարականները, նաեւ «Տեր ողորմեա»-ն,
«Սուրբ, Սուրբ»-ը, Աստվածամորը նվիրված տաղերը, Սուրբ Պատարագից
հատվածներ:
Երգող մարդը նման է խոստովանողի, իսկ երգը խոստովանանքի: Հենց այսպիսին
էին երգչախմբի կատարումները: Երգչախմբի վերջին կատարումը «Նորահրաշ
պսակաւոր» շարականն էր՝ նվիված Սուրբ Վարդանանց հիշատակին: Համերգի
վերջում մաեստրոն իր շնորհակալությունը հայտնեց թեմակալ Առաջնորդին՝
նման աննախադեպ հնարավորության համար՝ շեշտելով, որ իրականություն
դարձավ իր վաղեմի ցանկությունը:
Այնուհետեւ Սրբազան Հայրն իր հայրական խոսքը հղեց երգչախմբին:
ԱՌԱՋՆՈՐԴ ՍՐԲԱԶԱՆԻ ԽՈՍՔԸ
Ես
ուզում եմ շնորհակալություն հայտնել մեր սիրելի մաեստրոյին, բարերարներին,
կազմակերպիչներին, հատուկ շնորհկալություն, որ հիշեցրին մեզ, թե
բոլորի հետ հավասար քրիստոնեական մշակույթ ունենք: Անցած երկուշաբթի
գիշեր, խորախորհուրդ մթության մեջ, մենք ունկնդրեցինք հոյակապ մի
համերգ, որ բաղկացած էր բյուզանդական, ռուսական, նաեւ արեւելյան
քրիստոնեական երաժշտությունից: Շատերն արեւելյան մեղեդիները լսեցին
եւ մտածեցին՝ մահմեդակն երաժշտություն է: Ոչ, արաբերեն նաեւ քրիստոնյաներն
են գովերգում Աստծուն: Ասորիները, ղպտիները, մեր քույր Եկեղեցիներիը,
մելկիտները, հույն ուղղափառներն արեւելքում երգում եւ փառաբանում
են Աստծուն արաբերեն կամ արամերեն: Ես սա ուզեցի ճշտել, որովհետեւ
խոսակցություն է գնում քաղաքում, թե եկեղեցում ոչ քրիստոնեական երաժշտություն
է հնչում:
Ցանկացած կերպով կարելի է Տիրոջը փառաբանել: Եվ մենք հոյակապ գոհարներ
ունկնդրեցինք՝ թվով 113 հունարեն, ռուսերեն եւ, այո, արաբերեն: Երբ
համերգից հետո առիթ ունեցա ընդունել մաեստրոյին, հարցրի.
- Մաեստրո, բայց մենք սպասում էինք, որ վերջում նաեւ հայերեն մի
հոգեւոր պատառիկ կհնչեցնեք:
Նա պատասխանեց.
- Ես չհամարձակվեցի, հայկական հոգեւոր երաժշտությունն այնքան յուրահատուկ
է, այնքան խոր (իր խոսքերն եմ կրկնում, ինձնից չեմ հնարում), որ
ես չհամարձակվեցի մտնել հայկական երաժտության մեջ: Ինձ դրա համար
շատ լուրջ օգնականներ ու խորհրդատուներ են պետք:
Ուրեմն՝ հայկական երաժշտությունն ու հայկական հոգեւոր երաժշտությունն
այս բարձրության վրա են, ինչը մենք հաճախ չենք հասկանում: Այս բարձրության
վրա են գտնվում նաեւ հայ եկեղեցական ճարտարապետությունը, հայ եկեղեցական
մատենագրությունը, գրականությունը: Այն, ինչ ստեղծել է Հայ Եկեղեցին,
ոչ մի տեղ չի զիջում արեւմտյան քաղաքակրթության ամենաբարձր նմուշներին:
Այս հասկացողությունը ցավոք մենք չունենք: Այսօր մեր սիրելիները
մեզ հիշեցրին, որ ոչ մի բանով չի զիջում այս երաժշտությունը մեկ
շաբաթ առաջ մեր ունկնդրածին: Ուրեմն՝ պետք է գնահատել մեր ունեցածը,
մաքրել, զուլալեցնել, ներկայացնել ու սիրել, սեփականը սիրել, ինչի
մեջ շատ հաճախ թերանում ենք: Շնորհակալություն մաեստրո:
ԱՐՄԵՆ ՍՐԿ. ԻՍԱՀԱԿՅԱՆ
ԱԼՎԱՐԴ ԿԱՂԶՎԱՆՑՅԱՆ
>>>
|
|