| ՈՒԽՏԱԳՆԱՑՈՒԹՅՈՒՆ
ՄԱՍՅԱՑՈՏՆԻ ՍՐԲԱՎԱՅՐԵՐ
 ուրաքանչյուր
ուխտագնացություն մի նոր կապ է անցյալի ու ներկայի միջեւ եւ Քրիստոսի
հանդեպ հավատքի ուխտի մի նոր կնիք: Օգոստոսի 10-ին, նախաձեռնությամբ
Ժաննա Խաչատրյանի եւ հովանավորությամբ Զարիկ Իգիթյանի, մի խումբ
հավատացյալներ ուխտագնացությամբ մեկնեցին Մասյացոտնի սրբավայրեր:
Ուխտավորներիս առաջին հանգրվանը Մխչյան գյուղի՝ 1850 թվականին կառուցված,
Ս. Հովհաննես Մկրտիչ եկեղեցին էր, որի սուրբ կամարների տակ ներկաներն
աղոթեցին՝ Բարձրյալից հայցելով զորավիգ լինել հայոց հինավուրց աշխարհին:
ԲՅՈՒՐԱՎԱՆԻ Ս. ԳՐԻԳՈՐ ԼՈՒՍԱՎՈՐԻՉ ԵԿԵՂԵՑԻ
 Բյուրավանի
եկեղեցին կառուցվել է 19-րդ դարի կեսերին՝ հավատացյալ համայնքի մասնակցությամբ
ու օժանդակությամբ եւ վերակառուցվել մի հավատացյալ տարեց կնոջ տեսիլքով:
Վերջինիս երազում հայտնվում է մեր հավատի հայր Ս. Գրիգոր Լուսավորիչը
եւ ասում. «Երեսդ մրե՞լ ես»: Կարծես ասում էր՝ պատրա՞ստ ես արդյոք
մուրալ: Եվ կինը պատասխանում է. «Մրել եմ»:
Սուրբ Հայրապետը տեսիլքում հրահանգում է հանգանակություն հավաքել
եւ վերակառուցել Աստծո տունը: Աշխատանքների ողջ ընթացքը համընկնում
է մեր երկրի համար ծանրագույն ժամանակների՝ 90-ականների ցուրտ ու
մութ տարիների հետ: Մի խումբ տարեց ու անօգնական մարդիկ քար առ քար
նորոգում են իրենց հոգու տունը, ուր Սուրբ Սեղանից պիտի բաշխվեր
անսպառ ու անհատնում Քրիստոս-Հացը:
Այստեղ եւս ուխտավորները միակամ աղոթք առաքեցին առ Ամենաբարի Աստված՝
հայցելով Սուրբ Գրիգոր Լուսավորչի բարեխոսությունը:
ՄՐԳԱՎԱՆԻ Ս. ՀԱԿՈԲ ՄԾԲՆԵՑԻ ԵԿԵՂԵՑԻ
Հաջորդ ուխտավայրը, 1905 թվականին կառուցված, Ս. Հակոբ Մծբնեցի եկեղեցին
էր: Արդարեւ, հոյակերտ իր գեղեցկությամբ, աղոթատունը հայ ճարտարապետության
բացառիկ արարումներից է: Անխոնջ ջանքով ու նվիրումով այստեղ խնամվել
է հավատքն առ Աստված, որպեսզի ճշմարտության եւ արդարության հոգին,
միմյանց հանդեպ սիրո ոգին, մարդկանց սրտերից բխելով, բարիք դառնա
կյանքում:
Այստեղ է ամփոփված նաեւ Ս. Հակոբ Հայրապետի մասունքը, որի առջեւ
ծնրադիր աղոթք բարձրացրինք՝ խնդրելով Սրբի բարեխոսությունը, որպեսզի
մեր հոգեւոր տունը՝ մեր Սուրբ Եկեղեցին մնա պայծառ՝ անկեղծ ու մաքուր
սրտից բխած մեր հավատքով:
ՎԵՐԻՆ ԱՐՏԱՇԱՏԻ Ս. ԱՍՏՎԱԾԱԾԻՆ ԵԿԵՂԵՑԻ
Սուրբ Աստվածածին եկեղեցին կառուցվել է 1880-ին: Անաստվածության
տարիներին այն եղել է աղի պահեստ: Ժամանակի ընթացքում խոնարհվել
է: Վերանորոգվել է 2007 թվականին: Այստեղ եւս ուխտավորներս միասնաբար
եւ առաձին-առանձին աղոթք հղեցին առ Ամենաբարի Աստված՝ հայցելով բարեգթություն
համայն հայության եւ ուխտավորների համար: Այնուհետեւ հավատացյալները
վառեցին իրենց հավատքի մոմերը:
ՄԱՍԻՍԻ Ս. ԳԵՎՈՐԳ ԵԿԵՂԵՑԻ
Սուրբ Գեւորգ եկեղեցին կառուցվել է 2015 թվականին: Գտնվում է գերեզմանատան
հարեւանությամբ, գողտրիկ մի անկյունում: Այստեղ ուխտավորները վառեցին
իրենց մոմերը եւ գոհաբանական աղոթք առաքեցին առ Աստված:
Ուշ երեկոյան ուխտավորները, հոգով զորացած, բռնեցին տունդարձի ճանապարհը:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ԱՐԱՄԱՅԻՍ ՀԱԿՈԲՅԱՆԻ
>>>
|
|
