ՀԱՅԱՍՏԱՆՈՒՄ
ԱՆՑԿԱՑՎԵՑ ԶԱՏԿԱԿԱՆ
ԱՌԱՋԻՆ ՓԱՌԱՏՈՆԸ
պրիլի
17-ին՝ Սուրբ Հարության տոնին, կայացավ Հայաստանում Զատկական առաջին
փառատոնը՝ Արարատյան Հայրապետական թեմի Առաջնորդական փոխանորդ Գերաշնորհ
Տ. Նավասարդ արքեպիսկոպոս Կճոյանի օրհնությամբ եւ ԿԳՄՍ նախարարության
«Երեխաների հատուկ ստեղծագործական կենտրոն» ՊՈԱԿ-ի նախաձեռնությամբ:
Սուրբ Զատկի տոնը նոր կյանքի խորհրդանիշն է՝ հարության հույսով եւ
սպասումով: Այն հայ ժողովրդի մշակույթի, ավանդույթների, մինչեւ իսկ
կենցաղի անբաժանելի մասն է կազմում:
Երեւանի
Սուրբ Աննա եկեղեցու բակը վերածվել էր մշակույթային յուրօրինակ կենտրոնի,
իսկ փառատոնը վերածվեց համաժողովրդական տոնախմբության՝ երգ ու պարով,
ձեռքի աշխատանքների ցուցադրությամբ: Ելույթներ ունեցան «Երեխաների
հատուկ ստեղծագործական կենտրոն» ՊՈԱԿ-ի՝ Երեւանի, Ստեփանավանի, Վանաձորի,
Սպիտակի, Գյումրու մասնաճյուղերի սաները, «Արեւային զանգակներ» խումբը
եւ Խարբերդի մասնագիտացված մանկատան սաները:
Կազմակերպվել էր նաեւ ցուցահանդես-վաճառք, որին ներկայացված էին
Հայ Առաքելական Ս. Եկեղեցու հինգ թեմերի՝ Շիրակի, Կոտայքի, Արմավիրի,
Արթիկի եւ Մասյացոտնի երիտասարդների, «Երեխաների հատուկ ստեղծագործական
կենտրոնի» եւ այլ մասնագիտացված կազմակերպությունների սաների զատկական
աշխատանքները:
Շիրակի թեմի Առաջնորդ Գերաշնորհ Տ. Միքայել արքեպս. Աջապահյանի օրհնությամբ
թեմի երիտասարդները ներկայացրին Արտաշես սարկավագ Աջապահյանի եւ
Ազատանի Սուրբ Հարություն (Սուրբ Ստեփանոս) եկեղեցու «Գործք ձեռաց»
նախաձեռնության աշխատանքները:
Այս ընտանեկան տոնին այցելուներին հնարավորություն ընձեռնվեց մասնակցել
ձեռագործ աշխատանքի վարպետության դասերին:
Զատկական փառատոնի նպատակն է ստեղծել մշակութային հարթակ երեխաների,
պատանիների ինքնադրսեւորման համար, ինչպես նաեւ խոցելի խմբերի երեխաներին
ինտեգրել մշակութային կյանք: Բոլոր, այդ թվում նաեւ խոցելի խմբերի
երեխաներն ունեն որակյալ կրթություն ստանալու եւ հասարակության մեջ
լիարժեք ներառված լինելու, հասարակության կողմից առաջարկվող բոլոր
ծառայություններից օգտվելու եւ լիարժեք կյանքով ապրելու իրավունք:
Փառատոնի աջակիցներն էին Մայր Աթոռ Սուրբ Էջմիածինը, ՀԵՀԵՄ գրասենյակը
եւ «Ֆորմիկա Արտ» ընկերությունը:
ԳՈՀԱՐ ԳԱԼԹԱԳԱԶՅԱՆ
ԼՈՒՍԱՆԿԱՐԸ՝ ՀԵՂԻՆԱԿԻ
>>>
|
|