«ՈՎ
ԲԱՐԻՆ Է ԳՈՐԾՈՒՄ, ԱՍՏԾՈՒՑ Է ԾՆՎԱԾ»
«Աստծո կամքն է, որ դուք
բարի գործերով պապանձեցնեք անխելք մարդկանց
տգետ լեզուները»:
Ա ՊԵՏՐՈՍ Բ 15
ոլոր
ժամանակներում էլ բարեգործությունը եղել եւ մնում է մարդկության
արժեհամակարգի առանցքային գաղափարներից: Ողորմած մարդն Աստծո պատկերն
է երկրի վրա, քանզի Աստված բարեգութ եւ ողորմած է Իր արարչության
հանդեպ:
Բարեգործությունը
կամ բարերարությունը, բարին արարելը, աստվածնմանության փորձառություն
է այս անցողիկ կյանքում, դեպի միակ նպատակ՝ կատարյալ հավիտենություն
առաջնորդող փորձություն: Բարեգործության սերմերը ծլարձակում են միմիայն
Աստծո սիրով ջերմացած եւ ապաշխարության արցունքներով մաքրված սրտերում:
Իրական բարեգործության քչերն են պատրաստ, քանզի բոլորն էլ իրենց
ակնկալիքներն ունեն՝ ի պատասխան իրենց «զոհողության»: Այդ փոխհատուցումը
կարող է լինել նյութական եւ անցողիկ, սակայն լավագույն փոխհատուցումն
Աստծո փառքն է: Բարիք գործել հանուն Աստծո փառքի՝ նշանակում է անել
գործեր, որոնք եթե անգամ ծածուկ են, միեւնույնն է, աղաղակում են
Աստծո փառքի մասին:
Գյումրիում գործող Սուրբ Հակոբ Մծբնա Հայրապետի անունը կրող եկեղեցին
2022 թվականի օգոստոսին կտոնախմբի իր բացման ու օծման քսան ամյակը:
Երկրաշարժից հետո հիմնված Անի թաղամասին յուրահատուկ տեսք ու ամբողջականություն
հաղորդեց այստեղ կառուցված աղոթատունը: Քսան տարի շարունակ իր դռները
հավատավորների առջեւ բացել է ոչ միայն եկեղեցին, այլ նաեւ, եկեղեցու
նկուղային հարկում գործող, մշակութային բաժինը: Այս տարիներին սերնդափոություններ
են եղել, թաղամասի փոքրիկների համար հարազատ դարձաձ, կենտրոնում:
Առաջին սերնդի երեխաներն արդեն իրենց փոքրիկներին են ուղղորդում
Ս. Հակոբում գործող մշակութային կենտրոն:
Եկեղեցին բացման օրվանից ուներ ջեռուցման խնդիր: Մշակութային բաժնի
դասասենյակները նույնպես ջեռուցվում էին էլեկտրական տաքացուցիչներով,
որոնք էլ շատ հաճախ հանգեցնում էին մալուխների շարքից դուրս գալուն:
Սակայն այսօր, հուրախություն ամենքիս, կարող ենք բարձրաձայնել, որ
մեկընդմիշտ մոռացության կմատնվի ջեռուցման հետ կապված ամենամեծ խնդիրը
«Մեր եկեղեցին, իր անվանակոչության տոնին ընդառաջ, մեծ նվեր ստացավ»,-
ասում է Ս. Հակոբի հոգեւոր հովիվ Տ. Վարուժան քհն. Տերտերյանը եւ
ավելացնում, որ դրա համար ինքը դիմել է ամերիկաբնակ լիբանանահայ
Միքայել Սարյանին: Տարիներ շարունակ աղոթքով ու հույսով սպասել ենք
այն բարեգործին, որ պիտի մեր խնդրին լուծում տար: Այս գործին իր
նվիրումն ու միջնորդությունը դրսեւորեց երեւանաբնակ գյումրեցի Մելինե
Ավդալյանը:
Աստվածահաճո գործի համար պարոն Միքայել Սարյանը սիրով տրամադրեց
միջոցներ (12.000 ԱՄՆ դոլլար)՝ լուծելու ջեռուցման խնդիրը: Բացի
դրանից բարերարն առանձին միջոցներ է տրամադրել նաեւ դասասենյակների
վերանորոգման համար:
Մեծահարգ պրն. Միքայել Սարյան, գյումրեցի մեծաթիվ հավատավորներիս
անունից ընդունեք մեր երախտիքի խոսքն ու օրհնությունները՝ Սուրբ
Հակոբ Մծբնա եկեղեցին ջեռուցումով ապահովելու համար: Թող որ Ձեր
օրհնառատ օրերը բարեգործություններով հագեցած լինեն, չէ՞ որ միշտ
նվիրողն ավելի երանելի է, քան նվերն ընդունողը: Ձեզ եւ Ձեր ընտանիքին
բարեբեր, արեւշատ ու քաջառողջ տարիներ: Թող Տիրոջ հովանու ներքո
բարի ավարտ ունենան Ձեր բոլոր բարի նախաձեռնությունները, քանզի իրական
բարեգործը չի մտահոգվում կողքից հնչող կարծիքներից, չի վրդովվում
եւ արդարանալու փորձեր չի անում, այլ հարատեւում է բարու մեջ՝ հետեւելով
ավետարանական պատգամին. «Սիրելի՛ս, չարը թող օրինակ չլինի քեզ, այլ
բարուց օրինակ վերցրու, որովհետեւ ով բարին է գործում, Աստծուց է
ծնված, մինչդեռ ով չարիք է գործում, նա Աստծուն երբեք չի տեսել»
(Գ Հովհ.11):
ԼՈՒՍԻՆԵ ԳՐԻԳՈՐՅԱՆ
>>>
|
|