| ՈՒԽՏԻ
ՍՈՒՐԲ ՊԱՏԱՐԱԳ ԱԶԱՏԱՆԻ ՍՈՒՐԲ
ՍՏԵՓԱՆՈՍ ԵԿԵՂԵՑՈՒՄ
«Առաքեալ եւ նախավկայ Քրիստոսի
Սուրբ Ստեփանոս, որ զքարկոծումն յանձն
առեր եւ յանմահից բնակարանն վերափոխեցար. աղաչեա զԱստուած շնորհել
մեզ զկեանս անվախճան»:
ՇԱՐԱԿՆՈՑ
 նդհանրական
Եկեղեցու ամենասիրված ու պանծալի սրբերից մեկի եւ Քրիստոսի սիրո
վարդապետության համար նահատակված առաջին մարտիրոսի՝ Սուրբ Ստեփանոս
Նախասարկավագի հիշատակն ամեն տարի նշվում է դեկտեմբերի 25-ին: Այն
Հայ Առաքելական Սուրբ Եկեղեցու կարեւորագույն տոներից է, քանզի այդ
օրը կատարվում է սարկավագական ձեռնադրություն:
 Սուրբ
Ստեփանոս Նախավկան Քրիստոսի համար նահատակված առաջին անձն է, որ
հաստատակամ, հանուն Քրիստոսի խոսքի, թե՝ «երանի նրանց, որ հալածվում
են արդարության համար, որովհետեւ նրանցն է երկնի արքայությունը»
(Մատթ. Ե 10), ինքնակամ գնաց նահատակության՝ ընդունելով մարտիրոսի
պսակը: «Ստեփանոսը՝ շնորհներով եւ զորությամբ լցված մի մարդ, ժողովրդի
մեջ զարմանալի գործեր եւ մեծամեծ նշաններ էր անում» (Գործք Զ 8):
Բնականաբար, մաքրակենցաղությամբ, ծառայասիրությամբ, անսակարկ նվիրումով
եւ, ի վերջո, իր մարտիրոսությամբ դարձավ Քրիստոսի բարի նահատակը՝
փոխադրվելով անմահների բնակարան:
Ուրեմն՝ զինվենք աստվածային զորությամբ, դիմակայենք այս կյանքի դժվարությունները
եւ արժանանանք երկնային անթառամ պսակի: Ըստ Տիրոջ խոսքի՝ սիրենք
մեր թշնամիներին, օրհնենք մեզ անիծողներին, բարություն անենք մեզ
ատողներին եւ աղոթենք նրանց համար, ովքեր չարչարում են մեզ եւ հալածում,
որպեսզի որդիները լինենք երկնային Հոր, որ եկնքում է: Չէ՞ որ Ստեփանոսն
էլ իր նահատակության ժամանակ, երբ թշնամիները քարկոծում էին իրեն,
աչքերը վեր բարձրացրեց եւ խնդրեց Աստծուց, որ դա նրանց համար մեղք
չհամարվի: Նա, ի սեր Քրիստոսի հեղած, իր թանկագին արյամբ, քանզի
«նահատակների արյունը վեմն է Եկեղեցու» (Տերտուղիանոս), ավելի ամրապնդեց
Եկեղեցու հիմքերը եւ անձնական օրինակով մյուսներին ցույց տվեց ավետարանական
խոսքի ճշմարտությունը, որ է. «Երանի հոգով աղքատներիդ, որովհետեւ
Աստծո արքայությունը ձերն է» (Ղուկ. Զ 20): Կյանքում նա անտեսեց
ժամանակավորն ու անցավորը եւ ձգտեց մշտամնա արժեքների՝ գանձեր դիզելով
երկնքում:
ՍՈՒՐԲ ԵՎ ԱՆՄԱՀ ՊԱՏԱՐԱԳ ՍՈՒՐԲ ՍՏԵՓԱՆՈՍ ԵԿԵՂԵՑՈՒՄ
Գմբեթավոր Ս. Ստեփանոս եկեղեցու սեւ սրբատաշ տուֆաքարերին նոր երանգներ
էին խառնել սպիտակահեր ծառերն ու թփերը: Ներսում, ասես, շարունակվում
էր գույների շքերթը՝ աղոթատունը զարդարող որմնանկարների տեսքով:
Այստեղ ուխտավորները ներկա գտնվեցին, Ս. Ստեփանոս Նախավկայի տոնի
ուրախ առիթով, մատուցվող Սուրբ եւ անմահ Պատարագին: Օրվա պատարագիչն
էր Տ. Մակար քհն. Գալամդարյանը: Սրբազան արարողակարգի ընթացքում՝
«Հայր մեր»-ից առաջ, օրվա խորհուրդը մանրամասնող ոգեշունչ քարոզ
խոսեց պատարագիչ Տեր Հայրը:
Ի լրումն օրվա խորհրդի՝ ներկաներն ստացան Սուրբ Հաղորդություն:
Վերջում ուխտավորներն իրենց շնորհակալությունը հայտնեցին ուխտագնացությունը
նախաձեռնողներ Ժաննա Խաչատրյանին եւ Զարիկ Իգիթյանին:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ԳՈՀԱՐ ԳԱԼԹԱԳԱԶՅԱՆԻ
>>>
|
|
