| Ն.Ս.Օ.Տ.Տ.
ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ
ՊԱՏԳԱՄԸ ՄԵՐ ՏԵՐ ՀԻՍՈՒՍ ՔՐԻՍՏՈՍԻ ՀՐԱՇԱՓԱՌ
ՀԱՐՈՒԹՅԱՆ ՏՈՆԻ ԱՌԻԹՈՎ
«Քրիստոս յարեաւ ի մեռելոց»:
Շարական Հարության
 իրելի՛
բարեպաշտ հավատացյալներ,
 Այսօր
Սուրբ Հարության հրաշափառ տոնն է, տոն՝ վերհառնումի, մեղքի ու մահվան
հանդեպ հաղթության: Քրիստոս հարություն է առել, բացվել է գերեզմանի
դուռը, հրեշտակները կյանքի լուսեղեն ավետիսն են բերել, առաքյալները
զորացել եւ ոգեշնչվել են հարուցյալ Փրկչի հայտնությամբ: Սքանչելախորհուրդ
Հարությամբ մեր Տերը՝ Հիսուս Քրիստոս, մարդկությանը պարգեւեց գողգոթաներից
հառնելու, մահին հաղթելու եւ հավիտենական կյանքը ժառանգելու երկնային
շնորհը: Մենք այդ վստահությամբ ենք քաջալերվում, նաեւ գոտեպնդվում
նեղությունների ու վշտերի, մահվան ահասարսուռ իրողության հանդիման`
ունենալով հաստատուն հավատը, որ Քրիստոս հարություն է առել եւ նորոգել
է կյանքը, դուրս բերել մարդկությանը մեղքի ու չարիքի խավարից, հաշտություն
հաստատել մարդու եւ Աստծո միջեւ: «Աստված հավիտենական կյանք տվեց
մեզ. եւ այդ այն կյանքն է, որ Նրա Որդու մեջ է»,- ասում է Առաքյալը
(Ա Հովհ. Ե 11): Քրիստոսի Հարությամբ բացվել է օրհնյալ կյանքի, հույսի,
սիրո, խաղաղության ու համերաշխության լուսավոր ուղին: Այս կենարար
ճանապարհից շեղումը հարության փոխարեն մահ ու ավեր է սփռում, փրկության
փոխարեն՝ դատապարտություն եւ կործանում, կյանքը դարձնում ատելության,
բաժանումների հորձանուտ՝ լի չարի փորձություններով ու վտանգներով:
Սիրելինե՛ր, անցյալ տարի մեր ժողովուրդը Փրկչի նմանությամբ վերստին
կրեց խաչելության տառապանքը: Պատերազմի դժոխային հնոցում, չարչարանաց
գողգոթա անցնելով, զոհվեցին հազարավոր մեր սիրասուն զավակները, կորցրեցինք
Արցախի՝ հարազատ հայրենիքի զգալի մասը: Ինչպես պատերազմից առաջ,
այնպես եւ հետպատերազմյան շրջանում մեր կյանքում հաստատուն չեղան
տերունապատվեր սիրո եւ համերաշխության նախանձախնդրությունը, Աստծո
պատգամների համաձայն կենսակերպը: Պառակտումներն ու սերմանվող ատելությունը,
անհանդուրժողության ոգին, շարունակվող քաղաքական ալեկոծումները նոր
ցնցումների ու անկումների վտանգի առջեւ են կանգնեցրել մեր երկիրն
ու ժողովրդին՝ ստվերելով նաեւ հայրենանվիրումի ու ազգասիրության
վեհ գաղափարները: Իսկ հայրենիքի անվտանգության չփարատվող մտահոգությունը,
հայրենական կյանքի տեսլականի բացակայությունը, հիասթափությունն ու
հուսախաբությունն անորոշության խավարով են մթագնել ապագայատեսիլ
մեր հույսերը: Ոչ մի հանգամանք, ոչ մի նպատակ, ոչինչ չի կարող արդարացնել
ազգի ու հայրենիքի մասնատումն ու տկարացումը, ազգային եւ հոգեւոր
մեր արժեքների, նախնյաց ավանդների ոտնահարումը, նոր սերնդի ապազգայնացումն
ու բարոյազրկումը, ազգի արժանապատվության ու պատվի նսեմացումը:
Մեր առջեւ ծառացած քաղաքական, տնտեսական, սոցիալական բարդ հիմնախնդիրների
հանդիման, ճգնաժամային դժվարին հանգամանքներում թաղման անձավի մեջ
մնալով, իրավիճակից դուրս ելնելու անհրաժեշտ գործողություններում
հապաղելով` մեր խաչելությունը չի պսակվի հարության կենարար զորությամբ:
Հարությունը չի կայանում մերժելի ատելությամբ ու թշնամանքով, բաժանումով
ու քայքայումով, այլ սիրով եւ հայրենյաց սիրո շուրջ համախմբումով,
նեղություններն ու դժվարությունները միասնաբար հաղթահարելով: Մեր
ժողովրդի կյանքն ի հայրենիս եւ ի սփյուռս սպասում է վշտերի անհապաղ
սփոփման, չարչարանքներից հառնումի եւ հաղթական հարության: Քրիստոսի
պարգեւած փրկության եւ հարության լույսը, սիրելինե՛ր, ճառագում է
զոհողություններ ստանձնելու առաքինության միջոցով, զոհողություններ
մեկս մյուսի հանդեպ, զոհողություններ ի սեր ողջ ժողովրդի: Այս լույսի
ներքո է, որ եսապաշտությունն ընկրկում է աստվածապաշտության առջեւ,
մահաբեր ընթացքը շրջվում է դեպի կենսատու Աստված, տառապանքների մատնող
գործողությունները փոխակերպվում են հարուցյալ կյանքի արարումների՝
առաջնորդելով փրկության ու հավիտենության: Մեր երկիրն ու ժողովրդին
պատուհասներից վեր հանելը, Արցախի կյանքն ավերներից բարձրացնելը
եւ հայության ու հայրենիքի վերածնունդը հրամայական հանձնառություն
են՝ իրագործելի ազգի բոլոր զավակների, քաղաքական կուսակցությունների,
մասնավորապես մեծագույն պատասխանատվությունը կրող իշխանությունների
կողմից: Հայրենաշեն ջանքերը կպսակվեն հաջողությամբ՝ օրհասական իրավիճակից
պետականությունը փրկելու նախանձախնդրությամբ, անձնական հավակնություններից
հրաժարվելով, պետության ու ազգի շահը գերադասելով: Այս ոգով հաղթական
հանգրվանի պիտի հասցնենք մեր ցավագին կորուստների վերականգնման,
մեր ազգային իրավունքների պաշտպանության, Հայոց Ցեղասպանության համընդհանուր
ճանաչման մեր նվիրական ձգտումները:
Սիրելինե՛ր, Քրիստոս հարություն է առել եւ մեզ պարգեւել զորությունը՝
նորոգելու մեր հոգիները, մեր կյանքը: Չհուսալքվենք ու թեւաթափ չլինենք
մեզ պաշարած փորձությունների հանդիման: Զորացյալ մնանք հարության
հավատով: Հարության հրաշքը կենսագործենք մեր երկրում ու կյանքում:
Ջերմ իղձերով փարված մնանք մեր հարազատ բնօրրանին՝ մեր հողին, ջրին,
մեր օջախին, կանխելու համար արտագաղթը հայրենիքից եւ հզորացնելու
մեր պետությունը: Տիրոջ զորակցությամբ հաղթահարելու ենք մեր կյանքի
դառնություններն ու արհավիրքները՝ հասնելով մեր հույսերի ու տեսիլքների
իրագործմանն ու հարուցյալ նոր կյանքի կերտմանը:
Հոգենորոգ այս օրն աղոթք բարձրացնենք, որ Փրկիչ մեր Տիրոջ օրհնությունն
ու շնորհները սփռվեն մարդկանց սրտերում՝ խաղաղություն եւ բարօրություն
բերելով աշխարհին, իմաստություն քաղաքական գործիչներին՝ պետական
ու հասարակական կյանքը կարգավորելու եւ բարեկեցության առաջնորդելու
պատասխանատվության մեջ: Աղոթենք պատերազմում վիրավորված մեր զավակների
առողջության, գերիների եւ անհայտ կորածների վերադարձի, մեր զոհված
քաջորդիների եւ համավարակից մահացածների հոգիների հանգստության համար՝
մեր Տեր Հիսուս Քրիստոսի խոսքի մխիթարությամբ. «Ես իսկ եմ hարություն
եւ կյանք. ով հավատում է Ինձ, թեպետ եւ մեռնի, կապրի» (Հովհ. ԺԱ
25): Թող Սուրբ Զատկի հուսառատ ավետիսը հայրենաշեն երազների իրագործման
զորությունը պարգեւի աշխարհասփյուռ մեր ժողովրդին: Եվ թող Հարության
արշալույսով զարդարվի երկնակամարը մեր ազգային-եկեղեցական կյանքի,
եւ խաղաղ ու ապահով մնա մեր հայրենիքը՝ Հայաստան ու Արցախ աշխարհը,
հավատքով ամուր, սիրով ու միասնական՝ մեր ժողովուրդը, այսօր եւ միշտ
եւ հավիտյան. ամեն:
Քրիստոս յարեաւ ի մեռելոց,
Օրհնեալ է Յարութիւնն Քրիստոսի:
>>>
|
|
