«ԿԱՏԱՐԵԼՈՎ
ՆԱ ԶՕՐԷՆՍ ՔԱՌԱՍՆՕՐԵԱՅ ԳԱԼՍՏԵԱՄԲՆ»
ՏՅԱՌՆԸՆԴԱՌԱՋԻ ՏՈՆԸ ՍՈՒՐԲ ՅՈԹՎԵՐՔ ԵԿԵՂԵՑՈՒՄ
«Եւ դու մանուկ, մարգարէ Բարձրելոց կոչեսջիր
զի երթիցես առաջի երեսաց Տեառն պատրաստել զճանապարհս նորա, տալ գիտութիւն
փրկութեան ժողովրդեան նորա ի թողութիւն մեղաց նոցա»:
ՂՈՒԿ. Ա 76-77
մեն
տարի փետրվարի 14-ին Հայաստանյայց Առաքելական Սուրբ Եկեղեցին մեծ
հանդիսավորությամբ տոնախմբում է Տյառնընդառաջը՝ քառասնօրյա Հիսուսի
տաճարընծայման հիշատակը: Ըստ ավանդության՝ այս տոնը կարգել է Ս.
Հակոբոս Տյառնեղբայրը՝ պատվիրելով, որ Քրիստոսի Եկեղեցին ամեն տարի,
Փրկչի հրաշափառ Ծննդից՝ հունվարի 6-ից քառասուն օր հետո, նշի Տիրոջը
Երուսաղեմի տաճար տանելու տոնը: Տյառնընդառաջը համարվում է նաեւ
Լույսի տոն:
ԸՍՏ ՍՈՒՐԲ ԳՐՔԻ ԱՎԱՆԴՈՒԹՅԱՆ
Ավետարանը մեզ հայտնում է, որ երբ ծիսական մաքրության ժամանակը լրացավ,
Հովսեփն ու Մարիամը մանուկ Հիսուսին տարան տաճար՝ Տիրոջն ընծայելու
ըստ Մովսիսական օրենքի: Ինչպես գրված էր Տիրոջ օրենքում՝ «ամեն արու
զավակ, որ արգանդ է բացում, Տիրոջ համար սուրբ պիտի կոչվի»: Եվ ահա
այստեղ նրանց ընդառաջ է գալիս Սիմեոն անունով մի ծերունի, ում Սուրբ
Հոգին հրամայել էր չմահանալ, մինչեւ տեսնի Տիրոջ Օծյալին:
Սիմեոնն
իր գիրկն առնելով Մանկանը՝ ասում է. «Այժմ, Ով Տեր, համաձայն Քո
խոստման, թող որ Քո ծառան մեռնի խաղաղությամբ, քանզի աչքերս տեսան
Փրկչին…» (Ղուկ. Բ 29): Ահա ավետարանական այս պատմությունն էլ քրիստոնեական
գեղեցիկ տոնի՝ Տյառնընդառաջի հիմքն է հանդիսանում: Մենք դուրս ենք
գալիս Տիրոջն ընդառաջ՝ Սիմեոն ծերունու օրինակով: Նաեւ մերօրյա գեղեցիկ
սովորության համաձայն՝ հաճախ, մեկին լավը կամենալով, բարեմաղթում
ենք. «Սիմեոն ծերունի դառնաս», այսինքն՝ երկար տարիների կյանք ունենա,
իղձերը եւ նպատակները կատարվեն:
Տաճարում Տիրոջը գոհություն է հայտնում նաեւ Աննա մարգարեուհին,
ով, տաճարից դուրս գալով, բոլորին պատմում է Մանկան մասին: Համաձայն
Եկեղեցու Հայրերի բացատրության՝ Սիմեոնը եւ Աննան խորհրդանշում են
Փրկչին ընդառաջ դուրս եկած Հին Ուխտի ողջ մարդկությանը, ովքեր լռեցին
Քրիստոսի գալստյամբ:
ՆԱԽԱՏՈՆԱԿ «ԽՈՏԵԼԻ Է ՇՐՋԵԼՆ ԶՀՐՈՎ»
Հեթանոսական շրջանի բազմաթիվ սովորություններ, ավանդույթներ ու պատկերացումներ
Քրիստոսով վերաիմաստավորվեցին՝ ձեռք բերելով նոր խորհուրդ ու իմաստ:
Նման սովորույթներից է նաեւ Տյառնընդառաջի տոնին խարույկ վառելը:
Սակայն հարկ է հիշեցնել, որ, ժողովրդի մեջ տարածում գտած, խարույկի
վրայից ցատկելը, շուրջը պտտվելը, ծխից գուշակություններ անելը եւ
այլ սովորույթներ Եկեղեցու կողմից խոտելի են:
Եռամեծ
Վարդապետ Ս. Գրիգոր Տաթեւացին այսպես է բնութագրում. «Հեթանոսները
բոլոր արարածներին էին պաշտում, առավելաբար հրին, ինչպես պարսից
ազգը:… Ուստի դրա համար մենք վառված հուրն ընծայում ենք ի պատիվ
Աստծո, թե «Դու ես ճշմարիտ Աստված, որ այժմ երեւացիր», իսկ հուրն
Աստված չէ, այլ Քո արարածը: Դրա համար Քեզ ծառայություն ենք բերում,
ինչպես որ երբայեցի մանուկները ծառերի ոստերն ընծայեցին՝ ի պատիվ
Քրիստոսի, որովհետեւ Նա է ճշմարիտ Աստված, նույնպես եւ մենք հուրն
ենք ընծայում, քանզի Քրիտոս Իր գալստյամբ ասաց. «Ես եմ աշխարհի լույսը,
ամեն ոք, որ ինձ հավատում է, խավարում չի մնա» (Հովհ. Ը 12, ԺԲ 46):
Արդ, հետեւենք միակ եւ ճշմարիտ Լույսին, քանզի ով Նրա ետեւից է գնում
«խավարի միջով չի քայլի, այլ կընդունի կյանքի լույսը»:
ՏՅԱՌՆԸՆԴԱՌԱՋԻ ԾԻՍԱԿԱՆ ԱՐԱՐՈՂՈՒԹՅՈՒՆԸ
Փետրվարի
13-ին՝ Ս. Աստվածածին մայր եկեղեցում, երեկոյան ժամերգությանը ներկա
էին մեծաթիվ հավատացյալներ: Հնչեցին հոգեպարար աղոթքներ ու շարականներ,
այնուհետեւ կատարվեց նախատոնակ, ինչը եւ ավետեց Տերունի տոնի սկիզբը:
Ապա, «Քրիստոս փառաց» հոգեզմայլ տաղի երգեցողության ուղեկցությամբ,
Սուրբ Սեղանի կանթեղից վառված մոմով, Առաջնորդ Սրբազանի գլխավորությամբ,
հանդիսավոր թափորն ուղղվեց դեպի Վարդանանց հրապարակ, ուր կատարվեց
անդաստան:
Օրհնվեցին աշխարհի չորս ծագերը, հայրենիքն ու Ամենայն Հայոց Հայրապետությունը,
բնակավայրերն ու դրանց բնակիչները, վանքերն ու եկեղեցիները եւ տարվա
պտղաբերությունը: Օրհնվեցին նաեւ այն մոմերը, որոնց կրակով, ձեռամբ
Սրբազան Հոր, վառվեց հրապարակի կենտրոնում պատրաստված ավանդական
խարույկը:
ՆՈՐԱՊՍԱԿՆԵՐԻ ՕՐՀՆՈՒԹՅԱՆ ԿԱՐԳ
Արդեն
մի քանի տարի է, ինչ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի
բարձր տնօրինությամբ, Տյառնընդառաջի տոնը հայտարարված է նորապսակների
օրհնության օր: Այդ օրը հայոց բոլոր եկեղեցիներում, Սուրբ եւ անմահ
Պատարագից հետո, կատարվեց նորապսակների օրհնության կարգ: Անմասն
չմնացին նաեւ Շիրակի թեմի նորապսակ զույգերը, ովքեր ջանադրաբար թեմապատկան
եկեղեցիներ էին այցելել:
Ապա յուրաքանչյուր զույգ իր հետ տուն տարավ վառված մոմեր՝ սեփական
բակում տոնի խարույկը մայր խարույկի կրակով բոցավառելու համար:
ՏՅԱՌՆԸՆԴԱՌԱՋԻ ՍՈՒՐԲ ՊԱՏԱՐԱԳ
Փետրվարի 14-ին գյումրեցի մեծաթիվ բարեպաշտ հավատացյալներ, առաջնորդանիստ
Սուրբ Աստվածածին մայր եկեղեցում, ներկա գտվնեցին Տյառնընդառաջի
Սուրբ եւ անմահ Պատարագին: Օրվա պատարագիչն էր Արթիկի թեմի Ս. Հովհաննես
եկեղեցու հոգեւոր հովիվ Տ. Եղիշե քհն. Նազարյանը:
Հընթացս սրբազան արարողակարգի՝ «Հայր մեր»-ից առաջ, տոնի խորհուրդը
մեկնող հավուր պատշաճի քարոզ խոսեց պատարագիչ Տեր Հայրը՝ հանգամանալից
բացատրելով տոնի դերն ու նշանակությունը հայ հավատավորի կյանքում:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ԳԵՎՈՐԳ ՂԱԶԱՐՅԱՆԻ
>>>
|
|