ՆՌՆՕՐՀՆԵՔԸ
ՇԻՐԱԿԻ ԹԵՄՈՒՄ
Ն.Ս.Օ.Տ.Տ.
Գարեգին Բ Ամենայն Հայոց Հայրապետի տնօրինությամբ արդեն վեցերոդ
տարին է, ինչ Մայր Աթոռ Սուրբ Էջմիածնում եւ հայոց բոլոր եկեղեցիներում
տարեմտի գիշերը, գոհաբանական մաղթանքից հետո, կատարվում է նռնօրհնեքի
կարգ:
Նռնենին, իր ծաղկաբույլերի գեղեցկությամբ, հյութեղ, թթվանուշ պտուղներով,
մարդկությանը հայտնի է դեռեւս անհիշելի ժամանակներից: Նուռն աշխարհի
ամենախոշոր հատապտուղն է, քանզի նռնենիները ի տարբերություն մնացյալ
պտղատու ծառերի, թփեր են, թփանման ծառեր: Այն արեւելյան ժողովուրդների
մոտ համարվել է բոլոր պտուղների արքան ոչ միայն քիմքին հաճելի համի,
բուժիչ հատկությունների, այլեւ գլխամասում գտնվող թագանման հավելույթի
պատճառով: Տեսակետ կա, որ արքայական թագի նախատիպը հնում վերցրել
են նռան «թագից»: Այն համարվել է նաեւ իշխանության նշան, իսկ պտղի
հաստ կեղեւի մեջ պարփակված հատիկների բազմաքանակությունը խորհրդանշել
է տիեզերքը՝ մոլորակներով ու աստղերով:
Եկեղեցու
խորանների մեկնություններում նռնենիները նկատվում են իբրեւ մարգարեների
խոսք, որ, առակի նման, իրենց հաստ ու դառը կեղեւով ծածկում են քաղցրության
Ավետիսը, անմահության Պտուղը՝ Քրիստոսին: Քրիստոնեության մեջ նուռը
մեր Տիրոջ՝ Հիսուս Քրիստոսի խորհրդապատկերն է՝ հեղված արյամբ, իսկ
կերպարվեստում երբ պատկերել են Տիրոջը, նռով արտահայտել են Նրա հարության
գաղափարը: Նուռը խորհրդանշում է Աստծո շնորհների բազմազանությունը,
Եկեղեցին իր բազմաթիվ հոտով:
Նուռն իր հոգեւոր խորհրդաբանությամբ նաեւ ներկայացնում է մարդու
երկրավոր ու երկնային կյանքը. դառը կեղեւը՝ իր վեցաթերթ թագապսակով,
խորհրդանշում է երկրավոր կյանքը, որ պետք է պսակված լինի աստվածային
երեք շնորհների՝ հավատքի, հույսի, սիրո թագով, որոնք համապատասխանաբար
առնչվում են Ամենասուրբ Երրորդության երեք Անձերին՝ Հորը (հավատ¤,
Որդուն (հույս¤ եւ Սուրբ Հոգուն (սեր¤:
31 դեկտեմբերի: Ճիշտ ժամը 00:00-ին Գյումրու Ս. Աստվածածին, Ս. Նշան,
Ս. Հակոբ, Ս. Գրիգոր Լուսավորիչ եւ Մարալիկի Ս. Աստվածածին եկեղեցիներում
կատարվեց նռան օրհնություն: Տարեմտին Սուրբ Յոթվերք մայր եկեղեցում
նռնօրհնեքի կարգ կատարվեց ձեռամբ Շիրակի թեմի Առաջնորդ Տ. Միքայել
արքեպս. Աջապահյանի: Բարեպաշտական արարողության ավարտին օրհնված
պտուղները բաժանվեցին ներկա հավատացյալներին:
Ի դեպ՝ արարողակարգի համար նախատեսված նուռը Ս. Աստվածածին եկեղեցուն
էին ընծայել Հովհաննես եւ Արմեն Տոնոյանները:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ՍԵԴԱ ՄԱՐՏԻՐՈՍՅԱՆԻ
>>>
|
|