Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՆՇՎԵՑ ՍՈՒՐԲ ՀԱԿՈԲԻ ՏՈՆԸ ՆՈՒՅՆԱՆՈՒՆ ԵԿԵՂԵՑՈՒՄ

այ Առաքելական Սուրբ Եկեղեցին հիսնակի չորրորդ կիրակիի նախորդ շաբաթ օրը տոնախմբում է Սուրբ Հակոբ Մծբնա Հայրապետի հիշատակը, ով Ընդհանրական Եկեղեցու հեղինակավոր եւ սիրված Սրբերից է: Կատարած բազմաթիվ հրաշքների շնորհիվ նրան կոչել են նաեւ Սքանչելագործ: Մծբնեցի Հայրապետի անունն առավել սիրելի ու հոգեհարազատ է հայերիս, քանզի նրա հետ է կապված Նոյան տապանի մասունքի հայտնաբերումը:

ՈՒԽՏԻ ՍՈՒՐԲ ՊԱՏԱՐԱԳ

Դեկտեմբերի 15-ին մարդաշատ էր Անի թաղամասի Ս. Հակոբ եկեղեցին: Տոնի ուրախ առիթով մատուցվեց ուխտի Սուրբ եւ անմահ Պատարագ: Օրվա պատարագիչն էր եկեղեցու հոգեւոր հովիվ Տ. Վարուժան քհն. Տերտերյանը: Հընթացս սրբազան արարողակարգի` «Հայր մեր»-ից առաջ, պատարագիչ Տեր Հայրը հանգամանալից քարոզ խոսեց՝ ներկայացնելով Ս. Հակոբ Հայրապետի կյանքը, հրաշքները: Սուրբ Պատարագի ընթացքում մեծաթիվ հավատացյալներ ստացան Սուրբ Հաղորդություն եւ հնարավորություն ունեցան խոնարհվել, սիրված Սրբի մասուքների վրա կառուցված եկեղեցուց բերված, քարերի առջեւ:

Այդ քարերը տարիներ առաջ Մծբին քաղաքից բերել եւ Ս. Հակոբ եկեղեցուն է նվիրել Շիրակի թեմի բարեխնամ Առաջնորդ Տ. Միքայել եպս. Աջապահյանը:

ՏՈՆԱԿԱՆ ՀԱՆԴԻՍՈՒԹՅՈՒՆ

Սուրբ եւ անմահ Պատարագից հետո տոնախմբություն էր եկեղեցու «Հակոբատանը», ուր տեղի ունեցավ մշակութային բաժնի հաշվետու համերգը: Ելույթ ունեցան երգի, պարի, ասմունքի, օտար լեզուների եւ նախադպրոցական խմբակների սաները: Ուրախ տրամադրությունը թեւածում էր Ս. Հակոբ եկեղեցու մշակութային բաժնում մինչեւ ուշ երեկո:

Տոնախմբության ներկաները մասնակցեցին ագապեի՝ սիրո ճաշի, որի ընթացքում, Ս. Հակոբ եկեղեցու հավատացյալների հանգանակության շնորհիվ հավաքված գումարով, կատարվեց նաեւ մատաղօրհնություն:

ԼՈՒՍԻՆԵ ԳՐԻԳՈՐՅԱՆ

>>>