| «ՃԱՆԱՉԵԼ
ԶԻՄԱՍՏՈՒԹԻՒՆ ԵՒ ԶԽՐԱՏ,
ԻՄԱՆԱԼ ԶԲԱՆՍ ՀԱՆՃԱՐՈՅ»
ԳԻՏԵԼԻՔԻ, ԳՐԻ ԵՎ ԴՊՐՈՒԹՅԱՆ ՏՈՆԸ ԳՅՈՒՄՐՈՒ ԹԻՎ
15 ԴՊՐՈՑՈՒՄ
«Աշակերտիլ հարկ է աշակերտելէ առաջ, ինչպես
լեցուիլ լեցնելէ առաջ, առնել տալէ առաջ… եւ կեանքին նայիլ արժէքի,
հաւատքի ապրումով, պատասխանատութեան զգացումով»:
ԳԱՐԵԳԻՆ Ա
  զգի
հոգեմտավոր դրսեւորումները, վարքն ու բարքը, զգացական եւ իմացական
ողջ շտեմարանն իր բոլոր տեսակներով ու տարատեսակներով պայմանավորված
են գործող կրթական համակարգով: Առանց ազգային հայեցի կրթական համակարգի
չկա եւ չի կարող լինել հայ մշակույթ, գիտական, հասարակական ու քաղաքական
միտք:
Գիտելիքի օրվա խորհուրդը լուսավոր է եւ լեցուն կյանքի առաջընթացի
հույսով: Անշուշտ կյանքի արագընթաց զարգացումներում, առավել քան
երբեւէ, կարեւոր են ուսումն ու գիտելիքը, բայց պետք է հիշել, որ
միշտ, բոլոր ժամանակներում, կարեւոր են հոգին կրթելը, ճշմարտության
եւ բարու մեջ հաստատվելը:
Արարող ուժ է գիտելիքը, ստեղծագործ զորություն եւ բարիք, երբ ամուր
կերպով հաստատված է հավատքի վեմի եւ հոգեւոր արժեքների հիմքերի վրա:
Ահա այսպիսի ճանաչողությունը, այսպիսի կրթական դարբնոցն է, որ, Ավետարանի
խոսքի համաձայն, դիմակայում են ժամանակի հողմերին ու հորձանքներին:
 Հոգեւոր
արժեքների զորությամբ՝ դարերի փորձությանց բովով ու հրով անցնելով,
ձուլածո ոսկի է դարձել հայ դպրոցը՝ մաքուր ու անաղարտ: Դպրոցում
հայ մանկանց միտքն ու հոգին կրթող ուսուցիչները կոչված են առաջնորդել,
գիտելիքով սնել մեր մատաղ սերնդին, սովորեցնել ճանաչել ու սիրել
մեր հայրենիքն ու մայր Եկեղեցին:
Ահա սա պետք է լինի կրթության ուղեծիրը, սրանով են լուսավոր եւ առաջատար
դարձել ու դառնում ցանկացած ուսում ու գիտություն: Բարեփոխել կյանքը,
բարվոք վճիռներ տալ հառնած խնդիրներին եւ իրականություն դարձնել
առաջընթացի տեսլականը: Բնականաբար ուսյալ եւ կիրթ հասարակությունն
է ընդունակ բարեփոխել կյանքը:
Սեպտեմբերի 1-ը՝ աշնան սկիզբն ազդարարող առաջին օրը, իր մեջ լույս
ու ջերմություն, գունագեղություն եւ վառվռուն ցոլանքներ, ծաղիկների
բույր եւ պայծառ ու գրավիչ թովչություն ունի, նաեւ ժպիտներ՝ աղերսված
մանկան ու մանկության հետ: Այսօր արդեն դպրոց եկած առաջին դասարանցին,
իններորդցու հետ, հպարտորեն է նայում իր վաղվան ու անհամբերությամբ
սպասում առաջին դասն ազդարարող զանգի կանչին:
Գյումրու թիվ 15 դպրոցի բակում տիրում էր ջերմ մթնոլորտ՝ նոր ուսումնական
վերամուտի առիթով: Դպրոց էին այցելել Շիրակի թեմի ՔԴՔԿ-ի վարիչ-տնօրեն
Տ. Նշան քհն. Պանֆյորովը, Շիրակի մարզի կրթության բաժնի վարիչ Հրայր
Կարապետյանը, Գյումրու կրթության բաժնի պատասխանատու Գեւորգ Ղումաշյանը
եւ, երեխաներից ոչ պակաս ոգեւորված, ծնողներ, տատիկներ ու պապիկներ:
Տերունական աղոթքից հետո, օրվա առիթով, ներկաներին իր հայրական օրհնությունը
բաշխեց Տեր Հայրը: Այնուհետեւ շնորհավորանքներ ու բարեմաղթանքներ
հղեցին դպրոցի տնօրեն Սեդա Համբարձումյանն ու Հրայր Կարապետյանը:
Վերջում՝ հենց բակում, ելույթ ունեցավ դպրոցի երգչախումբը, իսկ գեղեցիկ
պարով հանդես եկավ Էդվարդ Համբարձումյանը: Ապա կատարվեց տնօրհնեք:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ` ՔՆԱՐԻԿ ԱԴԱՄՅԱՆԻ
>>>
|
|
