ՄԵԾ
ՊԱՐԳԵՎԸ
արեկամներից
մեկն ուսուցչին մի մուրհակ տվեց, որպեսզի դրանով իր չքավոր աշակերտներից
մեկին, Կաղանդի առիթով, կոշիկ գնի: Թաղն աղքատ էր, ու բոլոր աշակերտներն
էլ կոշիկի կարիք ունեին: Հետեւաբար ուսուցիչը խորհեց վիճակահանությամբ
որոշել, թե ո՞ւմ պետք է տալ կոշիկը: Տղաներից մեկը՝ Սարոն, աղքատներից
աղքատն էր: Նա երազում էր այդ նոր կոշիկի մասին եւ հաճախ էր կրկնում.
«Եթե այդ կոշիկները ես շահեմ, Ս. Ծննդին, մեծ մայրիկիս հետ, Ս. Պատարագ
կգնամ»: Սարոն ո՛չ հայր ուներ, ո՛չ մայր:
Վերջապես
եկավ կաղանդը: Ուսուցիչը դասարանում մի խղճուկ ծառ հարմարեցրեց:
Ծառի գագաթին ծածանվում էր մեծ պարգեւը՝ կոշիկի մուրհակը: Ծառի ճյուղերին
ուրիշ մի քանի խղճուկ խաղալիքներ էին կախված: Քառակուսի թղթիկի վրա
ամեն աշակերտ իր անունը պիտի գրեր, հետո ծալեր ու նետեր գլխարկի
մեջ: Ուսուցիչը վերցրեց թղթիկներով լեցուն գլխարկը եւ խառնեց դրանք:
Աշակերտները հայացքով ուսուցչի շարժումներին էին հետեւում: Ոմանք
շատ լուրջ էին, ոմանք ժպտուն դեմքով: Սարոն դիտում էր՝ բթամատը բերանը
դրած եւ խոր անձկությամբ տոգորուն: Ուսուցիչը հանեց բախտավոր թղթիկը:
- Սարո, - հայտարարեց նա շատ գոհ:
Եթե երկինքը գլխին փլչեր, այդքան չէր շշմի խեղճ փոքրիկը. նա դժգունեց,
շվարեց եւ հայացքն այս ու այն կողմ պտտեցրեց: Ոչինչ չէր հասկանում,
լսածին չէր հավատում: Հետո միանգամից աչքերը փայլեցին, դեմքը կարմրեց
եւ սկսեց ուրախանալ: Երբեք նրան այդքան երջանիկ չէին տեսել:
Ուսուցիչը շարունակում էր բացել թղթիկները. երկրորդի մեջ եւս Սարո
էր գրված: Երրորդ եւ չորրորդ թղթիկներն էլ բացեց եւ զարմանքով հաստատեց,
թե բոլորի վրա Սարո է գրված: Նա հասկացավ, որ բարի ընկերները միացել
էին՝ Սարոյի երազանքն իրականություն դարձնելու համար: Ուսուցիչը
դժվարությամբ կարողացավ զսպել արցունքները. նա խոր հուզմունքով դիտում
էր, իր երջանկության մեջ վերացած, Սարոյին ու մյուս ազնիվ աշակերտներին,
ովքեր ժպտում էին եւ կարծես կամենում էին շնորհավորել միմյանց:
>>>
|
|