Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԱԶԳԱՅԻՆ ՈԳՈՒ ԵՎ ՄԻԱՍՆԱԿԱՆՈՒԹՅԱՆ ՃԱՆԱՊԱՐՀՈՎ

իրակի թեմի Առաջնորդ Տ. Միքայել արքեպս. Աջապահյանի եւ թեմի հոգեւոր տեսուչ Տ. Նարեկ եպս. Ավագյանի օրհնությամբ Շիրակի թեմի երիտասարդաց միությունը հուլիսի 17-ին եւ 18-ին կազմակերպել էր երկօրյա ուխտագնացություն Վայոց ձորի եւ Սյունիքի թեմեր՝ միավորելով երիտասարդներին հոգեւորի, հայրենաճանաչության եւ ազգային արժեքների շուրջ:

Հայ Առաքելական Սուրբ Եկեղեցու կյանքում ուխտագնացությունը պարզապես ճանապարհորդություն չէ: Այն հոգեւոր վերազարթոնքի ճանապարհ է, հնարավորություն՝ հեռանալու առօրյա հոգսերից, վերագտնելու սեփական ներաշխարհը, հաղորդակից դառնալու մեր ժողովրդի բազմադարյա սրբազան ժառանգությանը եւ ամրապնդելու հավատքն ու ազգային ինքնությունը:

Տ. Մակար քհն. Գալամդարյանի առաջնորդությամբ՝ ուխտագնացության առաջին կանգառը Նորավանքն էր՝ հայկական միջնադարյան ճարտարապետության եւ հոգեւոր մշակույթի անզուգական գլուխգործոցներից մեկը, ուր ուխտավորներին դիմավորեց Տ. Ներսես քհն. Արշակյանը: Վեհաշուք կարմիր ժայռերով շրջապատված այս սրբավայրում կատարվեց միասնական աղոթք, որի ընթացքում երիտասարդները հայցեցին Տիրոջ օրհնությունն ու խաղաղությունը հայրենիքի, ժողովրդի եւ աշխարհի համար: Տեր Հայրը ներկայացրեց Նորավանքի հարուստ պատմությունը, նրա նշանակությունը Հայ Եկեղեցու եւ մշակույթի կյանքում:

Այնուհետեւ ուխտավորները կանգ առան Վայքի Սուրբ Տրդատ եկեղեցում: Այստեղ եւս աղոթք բարձրացրին՝ հայցելով, որ, Սուրբ Տրդատ թագավորի օրինակով, հայ ժողովուրդը միշտ ամուր մնա քրիստոնեական հավատքի եւ ազգային արժեքների պահպանման ճանապարհին: Ուխտավորները եղան նաեւ Վերիշենի Սուրբ Հռիփսիմե եկեղեցում, որը կառուցված է Նոյան տապանի տեսքով:

Ուխտագնացությունը շարունակվեց դեպի Գորիս, ուր երիտասարդներն այցելեցին քաղաքի երկու կարեւոր հոգեւոր կենտրոններ՝ առաջնորդանիստ Սուրբ Գրիգոր Լուսավորիչ եւ Սուրբ Հռիփսիմե եկեղեցիներ: Այստեղ այցելուները հանդիպեցին Գորիսի տարածաշրջանի հոգեւոր հովիվ Տ. Տիգրան քհն. Հակոբյանին: Սրբավայրերում բարձրացված աղոթքներն ու ծավալված հոգեւոր զրույցները դարձան երիտասարդների համար ինքնաճանաչման, հավատքի ամրապնդման եւ նոր մտորումների առիթ:

Տեր Տիգրանի ուղեկցությամբ կատարվեց շրջայց քաղաքի պատմական հատվածում՝ հայտնի Հին Գորիսում: Դարերի պատմությունը կրող այդ վայրերը կենդանի վկայություններն են հայ մարդու ստեղծագործ ոգու, բնության հետ ներդաշնակ ապրելու մշակույթի եւ դժվարին ժամանակներում գոյատեւելու կամքի: Քայլելով քարանձավային բնակավայրերով՝ երիտասարդները հնարավորություն ունեցան ոչ միայն ծանոթանալ անցյալին, այլեւ նորովի գնահատել մեր ժողովրդի մշակութային եւ պատմական ժառանգությունը:

Ուխտագնացության կարեւորագույն հանգրվանը Տաթեւի վանական համալիրն էր՝ հայ հոգեւոր, կրթական եւ մշակութային կյանքի ամենանշանավոր կենտրոններից մեկը: Դարեր շարունակ Տաթեւը եղել է ոչ միայն աղոթքի, այլեւ գիտության, փիլիսոփայության, ձեռագրերի ստեղծման եւ ազգային մտքի զարգացման կարեւոր օջախ: Այստեղ ուխտավորները ներկա գտնվեցին ժամերգություններին, աղոթեցին եկեղեցու անսասանության եւ մեր ժողովրդի միասնության համար:

Տաթեւում երիտասարդները հանդիպեցին նաեւ վանքի վանահայր Տ. Սահակ վրդ. Շաքարյանին եւ Տ. Միքայել վրդ. Գեւորգյանին, ում հետ ունեցած զրույցները դարձան ուխտագնացության հիշարժան դրվագներից մեկը: Ուխտավորները ներկա գտնվեցին նաեւ Շինուհայրի Սուրբ Գրիգոր Տաթեւացի եկեղեցում մատուցվող Սուրբ եւ անմահ Պատարագին:

Հատուկ խորհրդանշական էր կանգառը Հալիձորի դիտակետում, ուր, Տաթեւի կիրճի հիասքանչ համայնապատկերի ներքո, երիտասարդները, ներշնչված Գարեգին Նժդեհի գաղափարներով, միասին կատարեցին հայրենասիրական եւ ազգային երգեր:

Ուխտագնացության հաջորդ կանգառը Սիսիանի Սուրբ Գրիգոր Լուսավորիչ եկեղեցին էր: Այստեղ ուխտավորներին դիմավորեց Սիսիանի տարածաշրջանի հոգեւոր հովիվ Տ. Պարգեւ քհն. Զեյնալյանը: Հյուրերը միասնաբար աղոթք բարձրացրին առ Աստված, այնուհետեւ այցելեցին նաեւ, եկեղեցու հարեւանությամբ գտնվող, Սիսիանի քաղաքային պանթեոն:

Ապա երիտասարդներն այցելեցին Զորաց քարեր հնավայր, որ համարվում է աշխարհի ամենահին մեգալիթյան համալիրներից մեկը:

Բնության հրաշալիքներից ուխտավորներն այցելեցին նաեւ Շաքիի ջրվեժ եւ Սատանի կամուրջ, որի բնական քարե գոյացություններն ու հանքային աղբյուրները յուրահատուկ տպավորություն թողեցին բոլորի վրա: Այս կանգառները եւս դարձան առիթ՝ խորհելու մարդու եւ բնության, Տիրոջ արարչագործության գեղեցկության ու ներդաշնակության մասին:

ՄԱՐԻԱՄ ՍՈՒՔԻԿՅԱՆ

>>>