| «ԵՂԻՐ
ԵՒ ԾՆԱՒ ՈՒԽՏԻ ԺՈՂՈՎՈՒՐԴ»
ՈՒԽՏԱԳՆԱՑՈՒԹՅՈՒՆ ՎԱՅՔ
 ունիսի
27-ին՝ Սուրբ Տրդատ թագավորի, նրա տիկնոջ Աշխենի եւ Խոսրովիդուխտի
տոնի ուրախ առիթով, Շիրակի թեմի Առաջնորդ Տ. Միքայել արքեպս. Աջապահյանի
հայրական օրհնությամբ, Զարիկ Իգիթյանի եւ Ասյա Մինասյանի նախաձեռնությամբ,
կազմակերպվեց ուխտագնացություն դեպի Վայք: Վաղ առավոտյան՝ ժամը 6:00-ին,
ուխտավորների խումբը, օրվա խորհրդով լցված, մեկնեց Վայք՝ ներկա գտնվելու
Ս. Տրդատ եկեղեցում մատուցվելիք Սուրբ եւ անմահ Պատարագին:
ՈՒԽՏԱՎՈՐՆԵՐԸ ՎԱՅՔՈՒՄ
 Սուրբ
Տրդատ եկեղեցին կառուցվել է 2000 թվականին եւ օծվել ձեռամբ Ն.Ս.Օ.Տ.Տ.
Գարեգին Բ Ամենայն Հայոց Կաթողիկոսի: Այստեղ Սուրբ եւ անմահ Պատարագ
մատուցեց եւ օրվան համահունչ քարոզ խոսեց Տ. Սեպուհ քհն. Հարությունյանը:
Ի լրումն օրվա խորհրդի՝ կատարվեց խոստովանություն, եւ բարեպաշտ հավատացյալներն
ստացան Սուրբ Հաղորդություն: Հավարտ Սուրբ Պատարագի կատարվեց մատաղօրհնության
կարգ, եւ մատաղը բաժանվեց ներկա հավատացյալներին:
ՆՈՐԱՎԱՆՔ
Ուխտավորների հաջորդ կանգառը Սյունյաց մետրոպոլիտների աթոռանիստ,
Օրբելյանների հոգեւոր կենտրոն ու դամբարանավայր, նաեւ Հայ Եկեղեցու
ճարտարապետության ամենանշանավոր կառույց, 13-14-րդ դարերի վանական
համալիր Նորավանքն էր: Համալիրի գլխավոր՝ Սուրբ Կարապետ եկեղեցին
կառուցել է իշխան Լիպարիտ Օրբելյանը՝ 1218-1223 թվականներին:
Այստեղ ուխտավորները ծանոթացան վանական համալիրի պատմությանը, գոհաբանական
աղոթք բարձրացրին առ Աստված եւ շարունակեցին ճանապարհը դեպի Մարտիրոս
գյուղ:
Ս. ԱՍՏՎԱԾԱԾԻՆ (Ս. ԵՐՐՈՐԴՈՒԹՅՈՒՆ) ԵԿԵՂԵՑԻ
Երրորդ կանգառը Մարտիրոս գյուղի՝ 1856 թվականին կառուցված, Ս. Աստվածածին
եկեղեցին էր: Այն եղել է խոնարհված եւ վերակառուցվել է 1980-90 թթ.:
Կենտրոնում վեր է խոյանում նեղ ու սլացիկ գմբեթը, որի վրա քանդակված
են սրբապատկերներ: Եկեղեցու արեւմտյան մուտքի մոտ կա խաչքար, որի
վրա առկա է հետեւյալ արձանագրությունը. «Եկեղեցին կառուցվել է 1283
թ., Մխիթարի որդի Պռոշ իշխանի եւ նրա որդի Ամիրհասանի հրամանով»,
իսկ մուտքի դռան վերեւի մասում գրված է. «Հիսուս Քրիստոսի Ս. Վկայարան՝
Երկրորդ Երուսաղեմ»: Այստեղ է գտնվում Երուսաղեմից բերված Տիրոջ
խաչելության պատկերը:
Ուխտավորները Բարձրյալից խնդրեցին, որ Տերը խաղաղ երկնքի ներքո պահպանի
մեր սրբազան երկիրն ու հայ ժողովրդին: Եկեղեցու հարավային կողմում
է գտնվում նաեւ Ս. Հռիփսիմե եւ Ս. Գայանե մատուռը:
ՋԵՐՄՈՒԿԻ Ս. ԳԱՅԱՆԵ ԵԿԵՂԵՑԻ
Հաջորդ կանգառը Ջերմուկի՝ 2007թ. կառուցված, Ս. Գայանե եկեղեցին
էր: Այստեղ ուխտավորները վառեցին իրենց մոմերը, խնկարկեցին, միասնական
աղոթեցին առ Երկնային Տերը՝ խնդրելով ազատություն անարդարությամբ
կալանավորված մեր սիրելի Սրբազան Հայրերին, Սամվել Կարապետյանին,
Գյումրու համայնքապետ Վարդան Ղուկասյանին եւ ազատությունից զրկված
մնացած նեղյալներին:
ԱՐԵՆԻԻ Ս. ԱՍՏՎԱԾԱԾԻՆ ԵԿԵՂԵՑԻ
Հաջորդ եւ վերջին հանգրվանը Արենի գյուղի՝ 1840 թ. կառուցված, Ս.
Աստվածածին եկեղեցին էր, որը վերանորոգվել է 1997 թվականին եւ օծվել
ձեռամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ԱՍՅԱ ՄԻՆԱՍՅԱՆԻ
>>>
|
|
