|
Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ
ԿԱԹՈՂԻԿՈՍԻ ՈՒՂԵՐՁԸ ՀԱՂԹԱՆԱԿԻ ԵՎ
ԽԱՂԱՂՈՒԹՅԱՆ ՕՐՎԱ ԱՌԻԹՈՎ
 այր
Աթոռ Սուրբ Էջմիածնից, Հաղթանակի եւ խաղաղության օրվա առիթով, Հայրապետական
Մեր օրհնությունն ենք բերում մեր ժողովրդին՝ ի Հայաստան եւ ի սփյուռս:
Մայիսի 9-ը մեզ համար թանկ հիշատակների օր է, երբ պանծացնում ենք
մեր ժողովրդի զավակների սխրանքները Երկրորդ համաշխարհային պատերազմում
եւ արցախյան հերոսամարտում:
 Հայրենական
մեծ պատերազմում կերտված փառավոր հաղթանակը վկայությունն է ժողովուրդների
համախմբյալ եւ միասնական պայքարի՝ ընդդեմ ֆաշիզմի, ընդդեմ անարդարության
եւ չարիքի: Մեր ժողովուրդն իր կարեւոր ավանդն է ունեցել այս հաղթության
մեջ:
Տասնամյակներ շարունակ այս օրը մեզ համար նշանավորվել է նաեւ արցախյան
գոյամարտի հաղթանակով: Այսօր, երբ բռնազավթված եւ հայաթափված է Արցախը,
պարտավոր ենք շարունակել հետամուտ լինել հայրենազրկված արցախահայության
իրավունքների պաշտպանությանը: Անցյալի այս իրադարձությունները մեզ
պետք է ամուր եւ հաստատակամ պահեն՝ զորեղ ու անվտանգ պետության կերտման
մեր տեսիլքների իրագործման ճանապարհին:
Հաղթանակի եւ խաղաղության օրը մեզ պետք է հիշեցնի դժվարին այդ օրերին
մեր ժողովրդի դրսեւորած միասնականության, քաջարի ոգու եւ հանուն
ազգի ու հայրենիքի, հանուն խաղաղության մեր հերոսների զոհողության
մասին: Այս նվիրական օրն իր խորհրդով նաեւ պետք է ամրապնդի մեզանում
նախանձախնդրությունն ու պարտավորությունը՝ հոգատարություն դրսեւորելու
պատերազմի վետերանների, զոհվածների եւ անհայտ կորածների ընտանիքների
հանդեպ:
Աղոթում ենք Մեծ հայրենականում եւ Արցախյան հերոսամարտում իրենց
կյանքն ընծայած հայորդիների հոգիների համար, որոնց հայրենասիրությունն
այսօր էլ ոգեշնչող օրինակ է սերունդներին՝ նույն պատասխանատվությամբ
ու նվիրումով ապրելու, արարելու եւ պայքարելու ի սեր հայրենի մեր
երկրի:
Առ Բարձրյալն աղոթքով հայցում ենք աշխարհին խաղաղություն եւ ժողովուրդներին՝
բարօրություն: Թող Հարուցյալ Տերն Իր Աջի հովանու ներքո անվտանգ
ու ապահով պահպանի մեր հայրենիքն ու համայն ժողովրդին՝ հույսով,
հավատով՝ ամուր եւ սիրով՝ միասնական:
Շնորհք, սէր եւ խաղաղութիւն Տեառն մերոյ Յիսուսի Քրիստոսի եղիցին
ընդ ամենեսեանս. Ամէն:
ԳԱՐԵԳԻՆ Բ ԿԱԹՈՂԻԿՈՍ
ԱՄԵՆԱՅՆ ՀԱՅՈՑ
>>>
|
|
