Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՀՐԱԺԵՇՏ «ՎԵՐԱԴԱՐՁ ԴԵՊԻ ԲՆՈՒԹՅՈՒՆ» ՃԱՄԲԱՐԻՆ

իրակի թեմի բարեխնամ Առաջնորդ Տ. Միքայել արքեպս. Աջապահյանի օրհնությամբ թեմի «Վերադարձ դեպի բնություն» ճամբարն այս տարի իր աշխատանքները մեկնարկեց հուլիսի 19-ին՝ «Շեն Ֆրանսիա» կազմակերպության ֆինանսական աջակցությամբ:

Երկու հերթափոխով՝ յոթական օրով, ճամբարում իրենց ամառային հանգիստն անցկացրին Շիրակի թեմի տարբեր կիրակնօրյա դպրոցների սաներ, ինչպես նաեւ բազմազավակ ու անապահով ընտանիքների շուրջ վաթսուն երեխա: Նրանցից տասնհինգը ճամբարում հանգստացան թեմի բարերար նորվեգացի Օլա Սիմոն Օստվեյտի հովանավորությամբ:

Ինչպես ամեն տարի, այս անգամ նույնպես ճամբարականներն իրենց առօրյան անցկացրին շատ հագեցած՝ մասնակցեցին ակտիվ խաղերի ու արշավների, առաջին բուժօգնության, կրոնի, օտար լեզուների, բնապահպանության, սպորտի եւ այլ դասերի: Երեխաները հատկապես տպավորված էին «Աղավնաբազե» որսորդմիության նախագահ Հովհաննես Խնուսյանի կողմից «Ձկնորսությունը Հայաստանում» թեմայով անցկացրած սեմինարով: Ճամբարակաների համար կրթադաստիարակչական դասախոսություն անցկացրին նաեւ «Արփի լիճ» ազգային պարկ»-ի աշխատակիցները:

Հուլիսի 26-ին ճամբար այցելեց Ամասիայի տարածաշրջանի հոգեւոր հովիվ Տ. Գարեգին քհն. Սարգսյանը: Տեր Հայրը մի ամբողջ օր անցկացրեց ճամբարակաների հետ: Բացի հոգեւոր զրույցից, Տեր Գարեգինը նաեւ պատասխանեց երեխաների ա-ռաջադրած տարբեր հարցերին, նրանցից տեղեկացավ, թե ինչպես է անցնում ճամբարական առօրյան: Ճամբարակաները Տեր Հորը պատմեցին, որ ամեն օր գնում են Ս. Սարգիս մատուռ, աղոթում թեմակալ Առաջնորդի ազատության համար:

Ամեն տարվա պես՝ երեխաների հետ աշխատում էին փորձառու ջոկատավարներ եւ, ինչպես միշտ, կամավորներ: Միքայել Մուրադյանը Եղնաջուր գյուղի բնակիչ է եւ ամեն տարի, կամավորական հիմունքներով, ճամբարում անցկացնում է ձիավարժության դասեր: Կամավոր Ռոզի Մանարյանը ծնվել ու մեծացել է Ֆրանսիայի Լիոն քաղաքում եւ արդեն երկու տարի է, ինչ գալիս է Հայաստան եւ ճամբարում անցկացնում ֆուտբոլի ու ֆրանսերենի դասեր:

«Վերադարձ դեպի բնություն» ճամբարի երկու հերթափոխն էլ ավարտվեց հրաժեշտի ավանդական խարույկահանդեսով եւ կրկին հանդիպելու ակնկալիքով:

ԼՈՒՍԻՆԵ ԳՐԻԳՈՐՅԱՆ

>>>