Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

«Ի ՀԱՆԴԷՍ ՏՕՆԻ ՈՒՐԱԽԱՑԵԱԼ ՑՆԾԱՄՔ, ՀԱՅՐ
ԵՒ ՎԱՐԴԱՊԵՏ ՍՈՒՐԲ ՀԱՅՐԱՊԵՏ»
ՍՈՒՐԲ ԳՐԻԳՈՐ ԼՈՒՍԱՎՈՐՉԻ ԵԼՆ Ի ՎԻՐԱՊԵՆ ՏՈՆԸ ՇԻՐԱԿԻ ԹԵՄՈՒՄ

«Թեպետ ուրիշ ազգերի հավատացյալները եւս սուրբ հովվապետեր եւ լուսավորիչներ
ունեն, սակայն նրանք երկար տարիներ բազմատեսակ չարչարանքների
բովում չեն մաքրվել, ինչպես մեր Սուրբ Գրիգոր Լուսավորիչը»:
ՍԻՄԵՈՆ ԵՐԵՎԱՆՑԻ

այ Առաքելական Սուրբ Եկեղեցու հիմնադիրներ Ս. Թադեոս եւ Ս. Բարդուղիմեոս Առաքյալներից շուրջ 250 տարի հետո Ս. Գրիգորը, հավատի զորությամբ եւ կենդանի նահատակությամբ, դարձավ հայոց երկրորդ լուսավորչը: Հոր մեղքի համար ապաշխարության բազում տանջանքներով լի ուղին Ս. Գրիգորին տարավ Խոր Վիրապ, որտեղից էլ սկսվեց առաքելապատիվ հովվապետությունը, քրիստոսատու փառքի առաջնորդությունը, քահանայապետություն տանող ճանապարհը: Թունավոր զեռունների հարեւանությամբ վիրապում Գրիգոր Լուսավորիչը մնաց գրեթե 14 տարի: Նրան կերակրում էր մի այրի կին, ամեն օր գաղտնի մի նկանակ նետելով խոր վիհի մեջ: Սուրբն ազատվեց վիրապից Հռիփսիմյանց կույսերի նահատակությունից ինն օր անց:

Տրդատ թագավորը հիվանդացավ անբուժելի հիվանդությամբ: Նրա քույրը երազ տեսավ՝ համաձայն որի Տրդատին կարող էր բուժել միայն Խոր Վիրապում բանտարկված Գրիգորը: Մարդիկ կարծում էին, թե նա արդեն մահացել է, սակայն երազը երեք անգամ կրկնվելով, ստիպեց վերջիններիս փորձել ու համոզվել՝ արդյո՞ք Գրիգորը ողջ է: Տասներեքամյա բանտարկությունից հետո ազատ է արձակվում հայոց մեծագույն սուրբը: Գրիգորի աղոթքներով ապաքինվում է արքան: Քրիստոնեությունը հռչակվում է հայոց պետական կրոն: Մեծաշուք հանդիսավորությամբ Սուրբ Գրիգոր Լուսավորիչն ուղարկվում է Կեսարիա, ուր ձեռնադրվում է Հայաստանյայց Սուրբ Եկեղեցու առաջին Հովվապետ: Վիրապից ելնելուց հետո Սուրբը նահատակության վայրերում ամփոփում է կույսերի մարմինները եւ ապաշխարության համար սահմանում հնգօրյա պահք, որն այսօր էլ պահպանվում է Հայ Եկեղեցում եւ կոչվում «Առաջավորաց» (առաջին պահք): Շուրջ երկու ամիս նա քարոզում է Քրիստոսի վարդապետությունը: Քարոզության վերջին օրը Լուսավորչին հայտնվում է Միածին Փրկիչը՝ լույսերի մեջ երկնքից իջնելով: Աստվածային հրաշալի տեսիլքով նրան ցույց է տրվում Մայր Տաճարի հիմնադրման վայրը: Տերը պատգամում է նաեւ վկայարաններ կառուցել խաչազգեստ Հռիփսիմյանց կույսերի նահատակության վայրերում:

Մեզ մնում է հոգով ցնծալ եւ հանապազ աղոթել՝ մեր երախտագիտությունը հայտնելով Աստծուն, որ նման հայրապետ է մեզ պարգեւել, եւ որին ժողովուրդը Լուսավորիչ է անվանել, հոգիների Լուսավորիչ, որ դուրս բերեց իր ժողովրդին կռապաշտության խավարից ու փոխարենը լուսավորեց Հիսուսի անմար կրակով:

ՍՈՒՐԲ ՊԱՏԱՐԱԳ ԱՌԱՋՆՈՐԴԱՆԻՍՏ ԵՎ Ս. ԳՐԻԳՈՐ ԼՈՒՍԱՎՈՐԻՉ ԵԿԵՂԵՑԻՆԵՐՈՒՄ

21 հունիսի: Ս. Գր. Լուսավորչի ելն ի վիրապեն տոնի ուրախ առիթով հայոց եկեղեցիներում մատուցվեց Սուրբ եւ անմահ Պատարագ: Սուրբ Պատարագ մատուցվեց նաեւ Գյումրու Ս. Աստվածածին առաջնորդանիստ եւ Ս. Գր. Լուսավորիչ եկեղեցիներում: Սուրբ Յոթվերք մայր եկեղեցում, մեծաթիվ հավատացյալների ներկայությամբ, Սուրբ եւ անմահ Պատարագ մատուցեց Տ. Վարագ քհն. Հակոբյանը: Հընթացս սրբազան արարողակարգի՝ «Հայր մեր»-ից առաջ, օրվան պատշաճող հոգենորոգ քարոզ խոսեց պատարագիչ Տեր Հայրը:

Նույն օրը Ս. Գրիգոր Լուսավորչում օրվա պատարագիչն ու քարոզխոսն էր Տ. Փավստոս քհն. Սարգսյանը: Այստեղ եւս ներկա էին մեծաթիվ ուխտավոր հավատացյալներ:

ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ՍԱՐԳԻՍ ՍՐԿ. ՀԱՐՈՒԹՅՈՒՆՅԱՆԻ

>>>