| ՄԱՅՐ
ԱԹՈՌ ՍՈՒՐԲ ԷՋՄԻԱԾՆԻ ՀԱՅՏԱՐԱՐՈՒԹՅՈՒՆԸ
ՀՈՒՆԻՍԻ 27-Ի ԴԵՊՔԵՐԻ ԱՌՆՉՈՒԹՅԱՄԲ
 ույն
թվականի հունիսի 27-ը, Հայ Եկեղեցու եւ Մայր Աթոռ Սուրբ Էջմիածնի
նկատմամբ Հայաստանի իշխանությունների կողմից իրականացված խայտառակ
գործողություններով, մեր ժողովրդի նորագույն պատմության մեջ կմնա
որպես ազգային ամոթի օր:
Շինծու հիմքերով նախաձեռնված քրեական վարույթի շրջանակներում իրավապահ
մարմինների ներկայացուցիչները մուտք գործեցին Մայր Աթոռի տարածք՝
նպատակ ունենալով ձերբակալել եւ բռնի ուժով բերման ենթարկել Շիրակի
թեմի Առաջնորդ Տ. Միքայել արքեպս. Աջապահյանին: Այդ ընթացքում մեծածավալ
ուժերով արգելափակվեցին Մայր Աթոռի մուտքերը, եւ խափանվեց համայն
հայության հոգեւոր կենտրոնի բնականոն կյանքը: Արհեստական խոչընդոտներ
հարուցվեցին նաեւ դեպի Վաղարշապատ եւ Սուրբ Էջմիածին ուղեւորվողների
համար, ընդհուպ անցկացվեցին ստուգումներ:
Խստորեն դատապարտում ենք նախաձեռնված հակաեկեղեցական գործողությունները
եւ գնահատում որպես անարգանք հայոց հոգեւոր կենտրոնի՝ Սրբություն
Սրբոց Մայր Աթոռ Սուրբ Էջմիածնի նկատմամբ, նաեւ հավատացյալների հոգեւոր
զգացմունքներին հասցված ծանր վիրավորանք:
Ինչպես երկրի վարչապետի, այնպես եւ իշխանության տարբեր ներկայացուցիչների
հռետորաբանությունից ակնհայտ է, որ ծրագրավորված այս գործողությունն
իշխող ուժի եկեղեցահալած քաղաքականության հերթական դրսեւորումն է:
Երբեք հնարավոր չէր պատկերացնել, որ հայրենի իշխանություններն ունակ
են նման դավադիր հարված հասցնել հայոց հնագույն ազգային հաստատությանը՝
Հայաստանյայց Առաքելական Սուրբ Եկեղեցուն այնպես, ինչպես նույնիսկ
չեն վարվել ժամանակի օտար տիրապետողները:
Կոչ ենք անում մեր ժողովրդի զավակներին՝ շարունակել նույն նախանձախնդրությամբ
լինել Մայր Եկեղեցու կողքին եւ աղոթել Սուրբ Էջմիածնի պայծառության
եւ մեր հայրենիքի խաղաղության համար: Հոգեւորականները, հավատավոր
մեր զավակների հետ, ի զորակցություն Տ. Միքայել արքեպիսկոպոս Աջապահյանի,
լինելու են քննչական կոմիտեի եւ դատարանի տարածքներում:
Դատարանից ակնկալում ենք արդարացի որոշման կայացում: Մայր Աթոռը,
օրինական բոլոր միջոցների կիրառմամբ, պայքարելու է Եկեղեցու եւ եկեղեցականության
իրավունքների պաշտպանության համար:
ՄԱՅՐ ԱԹՈՌ ՍՈՒՐԲ ԷՋՄԻԱԾԻՆ
>>>
|
|
