| «ԴԱՍՔ
ԱՆՄԱՐՄՆՈՑ ՀՐԵՇՏԱԿԱՑ ՔԵԶ ԵՐԱՆԵՆ,
ԱՄԵՆՕՐՀՆԵԱԼ ԿՈՅՍ ՄԱՐԻԱՄ…»
ԱՎԵՏՈՒՄՆ ՍՈՒՐԲ ԱՍՏՎԱԾԱԾՆԻ
 այ
Առաքելական Սուրբ Եկեղեցին հնուց ի վեր տոնախմբել է Ավետման սքանչելի
եւ մեծախորհուրդ տոնը, որ հաստատուն եւ անշարժորեն նշվում է ապրիլի
7-ին՝ ի հիշատակ Գաբրիել հրեշտակապետի՝ շնորհընկալ Կույս Մարիամին
բերած ավետիսի, թե, Սուրբ Հոգու զորությամբ, Աստվածորդին իր միջոցով
պիտի մարդեղանա:
Աստվածամայրը, անարատ հոգու շնորհներով, առաքինության ու սրբության
օրինակ հանդիսացավ մարդկության պատմության բոլոր դարերում: Նա կանանցից
ամենաօրհնյալն է, քանզի եղավ աշխարհի Փրկչի՝ մարդեղացած Աստվածորդու
մայրը: Պատահական չէր, որ Հովհաննես Մկրտչի մայրը՝ Եղիսաբեթը, երբ
հանդիպեց Մարիամին Սուրբ Հոգով հղիանալուց հետո, «լցվեց Սուրբ Հոգով
եւ բարձր ձայնով աղաղակեց. «Օրհնյալ ես դու կանանց մեջ, եւ օրհնեալ
է քո որովայնի պտուղը» (Ղուկ. Ա 42): Ուրեմն՝ անափ պետք է լինի մեր
սերն ու անպարագրելի մեր նվիրումն առ Աստվածամայրը, որպեսզի նա սիրահոժար
դառնա ամենքիս մայրը:
Հայոց եկեղեցիներում ապրիլի 7-ին վերստին ղողանջեցին զանգերը եւ
վերստին մեզ ազգովի առիթ ընձեռնվեց ծնրադրել Տիրամոր առջեւ ու աղոթել:
Գիշերային եւ առավոտյան ժամերգություններից հետո առաջնորդանիստ Ս.
Աստվածածին մայր եկեղեցում, Ավետման տոնի ուրախ առիթով, մատուցվեց
Սուրբ եւ անմահ Պատարագ: Օրվա պատարագիչն ու քարոզխոսն էր Տ. Հակոբ
քհն. Գրիգորյանը:
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինությամբ
Ավետման տոնը հռչակվել է մայրերի օրհնության օր: Այդ օրը հայոց բոլոր
եկեղեցիներում կատարվում է, մայրության բերկրանքին սպասող, կանանց
օրհնության հատուկ կարգ, որպեսզի ամենաօրհնյալի՝ Սուրբ Աստվածամոր
բարեխոսությամբ, օրհնվեն հայոց ընտանիքները՝ հավատարիմ մնալով Եկեղեցու
սուրբ ավանդությանն ու դավանանքին: Կանանց օրհնության կարգ կատարվեց
նաեւ Շիրակի թեմի եկեղեցիներում, այդ թվում եւ Սուրբ Աստվածածնում:
ԱԼՎԱՐԴ ԿԱՂԶՎԱՆՑՅԱՆ
>>>
|
|
