Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՆՇՎԵՑ ԵՐԻՏԱՍԱՐԴՆԵՐԻ ԲԱՐԵԽՈՍ
ՍՈՒՐԲ ՍԱՐԳՍԻ ՏՈՆԸ

ետրվարի 15-ին Հայ Առաքելական Սուրբ Եկեղեցին ոգեկոչեց Սուրբ Սարգիս զորավարի, Նրա որդի Մարտիրոսի եւ տասնչորս զինվորների հիշատակը: Ամենայն Հայոց Գարեգին Բ Հայրապետի տնօրինությամբ՝ Սուրբ Սարգիս զորավարի տոնը հռչակվել է երիտասարդների օրհնության օր:

Ներսես Շնորհալու կազմած մի վարքագրության մեջ Սուրբ Սարգիսը համարվում է Կեսարիայի հռոմեական զորավար, որը, խուսափելով Հուլիանոս Ուրացող կայսեր (361-363) հալածանքից, ապաստանել է նախ Հայոց Արշակ Բ արքայի մոտ, ապա, վերջինիս խորհրդով, անցել Պարսկաստան, կարգվել Շապուհ Բ-ի զորահրամանատար: Զորականներից շատերը, տեսնելով քաջ զորավարի բարեպաշտությունը, նրա վարքով վկայված նվիրումն առ Աստված եւ աղոթքներով Տիրոջ գործած հրաշքները, հրաժարվում են հեթանոսությունից եւ դառնում քրիստոնյա: Սակայն Շապուհը պահանջում է նրանից պաշտել կրակը եւ զոհ մատուցել: Զորավարը մերժում է՝ ասելով. «Երկրպագելի է մեկ Աստված` Ամենասուրբ Երրորդությունը, Արարողը երկնքի եւ երկրի: Իսկ կրակը կամ կուռքերն ի բնե աստվածներ չեն, հողեղեն մարդը դրանք կարող է փչացնել»: Այս խոսքերից հետո Սարգիսը կործանում է բագինը: Զայրացած ամբոխը հարձակվում է Սարգսի եւ նրա որդու վրա: Առաջինը նահատակության պսակն ընդունում է որդին՝ Մարտիրոսը: Սարգիսը բանտարկվում է եւ ապա գլխատվում՝ աներեր մնալով իր հավատքի մեջ: Նահատակվելուց հետո Սարգսի մարմնի վրա լույս է իջնում:

Տոնը Հայաստանում ընդունված է նշել ոչ միայն եկեղեցական ծեսով, աղոթքով, այլեւ ժողովրդական սովորույթներով, ինչը նվիրական ավանդույթ է: Շիրակի թեմի երիտասարդների համար այն շատ սիրելի եւ սպասված տոն է: Տոնացույցի ամենասիրառատ տոնին նրանք պատրաստվում են մանրակրկիտ: Երիտասարդաց միություններում երիտասարդները հավաքվում են, թխում ավանդական աղաբլիթները, եւ պատրաստվում նախատոնակին:

Փետրվարի 14-ին՝ Սուրբ Սարգսի նախատոնակին, Շիրակի թեմի եկեղեցիներում, երեկոյան ժամերգությունից հետո, քահանաները կատարեցին օրհնության կարգ, այնուհետեւ բաժանվեցին, երիտասարդների կողմից պատրաստված, աղաբլիթները:

Շիրակի թեմի բարեխնամ Առաջնորդ Տ. Միքայել արքեպս. Աջապահյանի օրհնությամբ Գյումրու Սուրբ Մարիամ Աստվածածին եկեղեցու երիտասարդաց միությունը, «Հրայրք» ավանդական պարի խմբի եւ Սարիբեկյան բենդի հետ, նախաձեռնել էին տոնախմբություն: Եկեղեցու բակում, հավարտ Նախատոնակի, ազգային եւ հայրենասիրական երգ ու պարով երիտասարդները միասին նշեցին Սուրբ Սարգսի տոնը:

Փետրվարի 15-ին Երիտասարդաց միությունը կազմակերպել էր ուխտերթ՝ Սուրբ Աստվածածին եկեղեցուց (Ս. Յոթվերք) դեպի Սուրբ Սարգիս մատուռ: Ուխտավորներին առաջնորդում էր Զորավարին խորհրդանշող ձիավորը:

Մասնակիցները, հոգեւոր դասի գլխավորությամբ, շարականների երգեցողությամբ ու խնկարկությամբ հասան ուխտավայր՝ Սուրբ Սարգիս մատուռ, ուր մատուցվեց Սուրբ եւ անմահ Պատարագ՝ ձեռամբ արժանապատիվ Տ. Սարգիս քհն. Սարդարյանի: Սրբազան արարողակարգի ընթացքում ներկաները խնդրեցին Սուրբ Սարգիս Զորավարի բարեխոսությունը, որ արագահաս սլացքով իրենց աղոթքները հասցնի Բարձրյալին:

ԳՈՀԱՐ ԳԱԼՏԱԳԱԶՅԱՆ
ԼՈՒՍԱՆԿԱՐՆԵՐԸ՝ ՀԵՂԻՆԱԿԻ

>>>