Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԲԱՐԵԿԱՐԳՄԱՆ ԱՇԽԱՏԱՆՔՆԵՐ ԱՌԱՋՆՈՐԴԱՆԻՍՏ
ԵԿԵՂԵՑՈՒ ՀԱՐԱԿԻՑ ՏԱՐԱԾՔՈՒՄ

«Աստծո կամքն այն է, որ բարեգործները պապանձեցնեն անխելք մարդկանց
տգիտությունը»:
Ա ՊԵՏՐՈՍ Բ 15

Բարեգործությունը մարդկային նկարագրի մի մասն է եւ սերտորեն կապված է մարդ հասկացության խորքային էության եւ յուրաքանչյուր անհատի հոգեկան ու հոգեւոր հասունությանն ու կարողություններին:

Բարեգործությունն առնչվում է դրամի հետ, բայց հավատացեք, որ դրամը բոլորովին էլ միակ անփոխարինելի միջոցը չէ: Բարեգործության արմատն ու ակունքը հավիտենական Աստված է՝ միակ բարին ու բարերարը, Նա, Ով կար աշխարհի ստեղծումից եւ դրամատիրական հարաբերությունների հաստատումից դեռ շատ առաջ: Բարեգործությունը շատ ավելի ընդգրկուն է, քան ողորմությունը, թեեւ Սուրբ Գրքում վերջինը գործածվում է բարեգործության իմաստով:

Ի վերջո, ո՞րն է բարեգործության իմաստը: Բարեգործությունը կամ բարերարությունը՝ բարին արարելը, աստվածնմանության փորձառություն է մեր անցողիկ կյանքում, դեպի միակ նպատակ՝ կատարյալ հավիտենություն առաջնորդող փորձառություն: Բարեգործության սերմերը ծլում են միայն Աստծո սիրով ջերմացած եւ մեր իրական հայրենիքի՝ Երկնքի Արքայության կարոտի՝ ապաշխարության արցունքներով ոռոգված սրտերում: Բարեգործությունը պարզապես չարիք չգործելը չէ: Բարիք գործել՝ նշանակում է գործադրել բարու եւ կյանքի, արարման եւ հարատեւման ուժը: Բարիք գործել՝ նշանակում է զինվել չարի դեմ՝ քաջաբար հաղթելու մտադրությամբ:

Իրական բարեգործը չի մտահոգվում կողքից հնչող կարծիքներից, չի վրդովվում եւ արդարանալու փորձեր չի անում, այլ հարատեւում է բարու մեջ՝ հետեւելով ավետարանական պատգամներին. «Սիրելիս, մի՛ նմանվիր չարին, այլ՝ բարուն. ով բարին է գործում, Աստծուց է, եւ ով չարիք է գործում, նա երբեք Աստծուն չի տեսել» (Գ Հովհ.11):

Գյումրու Սուրբ Աստվածածին մայր եկեղեցու խաչքավոր Արմեն Տոնոյանի եւ Տոնոյան ընտանիքի ֆինանսական աջակցությամբ ու բարերարությամբ բարեկարգման աշխատանքներ են իրականացվում Գյումրու Սուրբ Յոթվերք առաջնորդանիստ եկեղեցու հարակից տարածքում:

Նորոգվում է բակի ճեմուղու սալահատակը՝ ի վայելումն հավատացյալ մեր ժողովրդի եւ ի պայծառություն թեմի մայր եկեղեցու:

Տոնոյան ընտանիքը միշտ կանգնած է եկեղեցանպաստ ծրագրերի կողքին, եւ այս նորոգությունը նրանց բարեգործության շղթայի եւս մեկ օղակն է:

Օրինակելի է վերջիններիս ընթացքը, քանզի, բարեգործությամբ եւ աստվածանվեր ընթացքով, անանցելի գանձեր են կուտակում երկնքում՝ Տոնոյան ընտանիքի եւ իրենց սերունդների օրհնության համար:

Գոհություն Աստծուն, որ մեզ պարգեւել է ազգանվեր ու եկեղեցասեր նման հայորդի: Մաղթում ենք քաջառողջ կյանքի երկար տարիներ եւ աղոթում Ամենակալ Տիրոջը, որ Իր առատ օրհնությանն ու ողորմությանն արժանացնի Արմեն Տոնոյանին և նրա ընտանիքին:

ՄԱՐԻԱՄ ՍՈՒՔԻԿՅԱՆ

>>>