Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԱՄԱՆՈՐՅԱ ԱՌԱԿ՝ ՍԻՐՈՒՑ ՋԵՐՄԱՑԱԾ ՍՐՏԻ ՄԱՍԻՆ

շխարհում ապրում էր մի սառնասիրտ մարդ, ով այնքան հպարտ էր, որ փորձում էր չնկատել իր թերությունը: Փոքր տարիքում նա նույնիսկ պարծենում էր, որ չի զգում սեր, վիրավորանք, խղճահարություն, ցավ, տխրություն, մտերմություն. ընդհանրապես ոչինչ չի զգում:

Եվ ահա շատ տարիներ անց՝ ձմռան սառնաշունչ մի երեկո, սառնասիրտ մարդը տեսնում է ցնցոտիներով մի փոքրիկ տղայի: Մոտենում էր Ամանորը, դրսում ձյուն էր տեղում, փչում էր սառը քամին, եւ թվում էր, թե անգամ ծառերն են սառցահարվել: Սակայն տղան հաստատուն քայլերով մոտենում էր ամանորյա մեծ եղեւնուն, որը զարդարել էին քաղաքի կենտրոնում: Եղեւնուն հասնելուն պես՝ նրանք երկուսն էլ կանգ առան:

Սառնասիրտ մարդը մոտեցել էր եղեւնուն՝ զարդարանքները տեսնելու, իսկ տղան՝ Երկնային հրեշտակներից գաղտնի ինչ-որ բան խնդրելու:

- Մի կողմ անցեք, խնդրում եմ, ես այստեղ կարեւոր գործ ունեմ,- ասաց տղան:

Սառնասիրտ մարդն անտարբեր խնդմնդաց քթի տակ եւ գնաց իր գործերով, իսկ տղան, եղեւնու դիմաց ծնրադիր նայելով երկնքին, սկսեց շշուկով խոսել.

- Սիրելի՛ հրեշտակներ, երբ ես գալիս էի այստեղ, մտածում էի ձեզ խնդրել, որ դուք Աստծուց ինձ համար նոր հագուստ վերցնեք, քանի որ իմն արդեն մաշվել է, եւ ես շատ եմ մրսում: Սակայն ճանապարհին հանդիպեցի մի մարդու, որ ինձանից շատ ավելի դժբախտ է: Նա արդեն վաղո՜ւց է մրսում եւ թվում է, թե շուտով կվերածվի ձյան: Նվիրե՛ք նրան ջերմ սիրտ, այլապես նա երբեք երջանիկ չի լինի: Ես չգիտեմ` այլ կերպ նրան ինչպե՞ս օգնել:

Տղան դեռ շարունակում էր ծնրադիր մնալ՝ մտքով անգամ չանցկացնելով, որ իր խնդրանքը կարող է իրականություն դառնալ: Մի քանի րոպե անց սառնասիրտ մարդը վերադարձավ եղեւնու մոտ: Նրա ձեռքում նոր հագուստ էր տղայի համար:

Ամենայն հավանականությանբ Երկնային հրեշտակները կատարել էին փոքրիկի խնդրանքը: Իհարկե նրանք չէին փոխել այդ մարդու սառը սիրտը, այլ պարզապես այնտեղ թողել էին Մանուկ Հիսուսի երկու ամենաթանկ շնորհները՝ Սերն ու Կարեկցանքը:

>>>