| «ԽՈՍՏՈՎԱՆ
ԵՂԻՑՈՒՔ ԱՆՈՒԱՆ ՔՈՒՄ ՍՐԲՈՅ ԵՒ
ՊԱՐԾԵՍՑՈՒՔ ՅՕՐՀՆՈՒԹԻՒՆՍ ՔՈ»
ՈՒԽՏԻ ՍՈՒՐԲ ՊԱՏԱՐԱԳ ՍՈՒՐԲ ՄԻՆԱՍ ՄԱՏՈՒՌՈՒՄ
 ոյեմբերի
11-ին Սուրբ Մինասի հիշատակության օրը, Գյումրու համանուն մատուռը
լիքն էր հավատավոր գյումրեցիներով, ովքեր ուխտավորաբար ներկա էին
մատուցվող Սուրբ եւ անմահ Պատարագին: Օրվա պատարագիչն էր մատռան
հոգեւոր հովիվ Տ. Վարագ քհն. Հակոբյանը: Սրբազան արարողակարգի ընթացքում՝
«Հայր մեր»-ից առաջ, «Ոչ միայն ի Նա հաւատալ, այլեւ վասն Նորա չարչարից»
բնաբանով ոգեշունչ քարոզ խոսեց պատարագիչ Տեր Հայրը՝ առանձնակի անդրադարձ
կատարելով նաեւ օրվա սուրբգրային ընթերցվածին եւ մեկնելով տոնի խորհուրդը:
Հընթացս սրբազան արարողակարգի ներկա հավատացյալներն ստացան Սուրբ
Հաղորդություն:
Ի ԴԵՊ
Մատուռը կառուցվել է ծննդով գյումրեցի, այժմ ՌԴ Խաբարովսկ քաղաքում
բնակվող, գործարար Սամվել Սողոմոնյանի բարերարությամբ: Այն գտնվում
է Գյումրու հյուսիսային կողմում, ձորի մեջ եւ վեր է խոյանում, բարեպաշտ
գյումրեցիների կողմից սիրված եւ ուխտատեղի դարձած, Սուրբ Մինաս մատուռի
տեղում: Այստեղ, ըստ ավանդության, ամփոփված են ճգնավոր Սրբի մասունքները:
Աղոթատունը խաչաձեւ կենտրոնագմբեթ կառույց է՝ կարմիր մաքուր տաշված
տուֆաքարով եւ մեկ կամարակապ մուտքով: Հյուսիսային խաչթեւի արեւելյան
պատի մեջ ներսից փորված է փոքրիկ խորշ՝ խորանի ձեւով: Նույն խաչթեւի
հյուսիսային կողմում ամփոփված են Սրբի մասունքները՝ խաչքար տապանակով:
Չորս սյուն ունեցող Սուրբ Մինաս մատուռի գմբեթի թմբուկը գլանաձեւ
է՝ ծածկված սրածայր վեղարով, վրան խաչ: Արեւելյան կողմում կիսակլոր
աբսիդն է ցածր բեմով: Հարավային պատի վրա կառուցման մասին արձանագրությունն
է: Այն օծվել է ձեռամբ Շիրակի թեմի Առաջնորդ Տ. Միքայել արքեպս.
Աջապահյանի:
ԱԼՎԱՐԴ ԿԱՂԶՎԱՆՑՅԱՆ
>>>
|
|
