Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

Մանուկներին ՝Սրբազան Պատմություն

ՏԱՐՕՐԻՆԱԿ ԹԱԳԱՎՈՐԻ ԱՆՀԵԹԵԹ ՑԱՆԿՈՒԹՅՈՒՆԸ

ատմում են, թե հեռավոր երկրում ապրում էր տարօրինակ ու հաճախ անհեթեթ ցանկություններ ունեցող մի թագավոր: Մի գիշեր նա, քնելուց առաջ, մենախոսում է.

- Չկա մի բան, որ կյանքումս տեսած չլինեմ: Տեսա ու վայելեցի այն ամենը, ինչ կարող էր աննշմար մնալ հասարակ մարդկանց համար: Միայն մի բան կա, որ չեմ արել. ուզում եմ Աստծուն տեսնել:

Հաջորդ առավոտ նա հրավիրում է իր բոլոր ենթականերին, կրոնավորներին ու գիտնականներին եւ նրանց ասում, որ ցանկանում է տեսնել Աստծուն: Եվ երեք օր ժամանակ է տալիս, որպեսզի վերջիններս իր ցանկությունն իրականացնեն, իսկ չկատարելու դեպքում խոստանում է, որ բոլորին կդատապարտի մահվան:

Տարօրինակ ցանկություն. ո՞վ պիտի կարողանար իրականություն դարձնել նման արտառոց ու անիրականանալի ցանկությունը: Ներկաները խուճապի են մատնվում: Երեք օրն անցնում է, եւ ոչ ոք չի կարողանում ելք գտնել: Թագավորը զայրացած պատրաստվում է հրաման արձակել՝ պատժելու մարդկանց, բայց այդ ժամանակ ծառան հայտնում է նրան, թե մի հասարակ հովիվ ասում է, որ կարող է կատարել արքայի ցանկությունը:

Օրը շատ արեւոտ էր: Հովիվը թագավորին հրավիրում է դաշտ եւ խնդրում վերեւ՝ երկնքին նայել: Սակայն երբ թագավորը փորձում է հայացքը հառել երկնքին, աչքերն ուժեղ արեւից ցավում են, եւ նա չի կարողանում բարձրացնել կոպերը: Զայրացած թագավորը հովվին մեղադրում է, թե իրեն կուրացնել է ուզում:

- Քա՛վ լիցի,- հանդարտորեն պատասխանում է հովիվը,- բայց իմացե՛ք, արքա՛, որ Աստծո բյուրավոր փառքերից արեւը փոքրագույնն է միայն: Դուք, որ անգամ նրան չկարողացաք նայել, ինչպե՞ս պիտի նայեք Աստծուն, որ հազար անգամ ավելի շողշողուն է. այս աչքերն անզոր են Նրան տեսնել: Հարկավոր է ունենալ ուրիշ աչքեր:

Թագավորն ականջալուր է լինում հովվի պատասխանին եւ գլխիկոր վերադառնում պալատ՝ ինքն իրեն խորհելով, որ, արքա լինելով հանդերձ, ամենապարզ ճշմարտությունը միմիայն հովվից կարողացավ լսել:

>>>