Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԵՐԵՔԱՄՅԱ ՄԱՐԻԱՄ ԱՍՏՎԱԾԱԾՆԻ
ԸՆԾԱՅՈՒՄԸ ՏԱՃԱՐԻՆ

ուրբ Կույս Մարիամին նվիրված տոներից է երեքամյա տաճարընծայման հիշատակումը, որ բոլոր Քրիստոնյա Եկեղեցիները ոգեկոչում են նոյեմբերի 21-ին:

Ըստ ավանդության՝ երեք տարին լրանալուց հետո, Տիրամոր աստվածավախ ու բարեպաշտ ծնողները՝ Հովակիմն ու Աննան, իրենց ուխտի համաձայն, Մարիամին ընծայում են տաճարին, ուր նա մնում է մինչեւ նշանվելը: Տոնի հաստատումն առնչվում է այն տաճարի հետ, որ կառուցել է Հուստինիանոս կայսրն Աստվածածնի պատվին՝ հին հրեական տաճարի տեղում, Մորիա բլրի վրա: Տաճարի նավակատիքը տեղի է ունեցել 543 թվականի նոյեմբերի 21-ին: 638 թվականից հետո, երբ Հուստինիանոսի կառուցած տաճարը վերածվում է մուսուլմանական մզկիթի, տոնակատարությունը տարածվում է ողջ քրիստոնյա աշխարհով: Աստվածածնի տաճարընծայման տոնը Հայ Եկեղեցի մուտք է գործել 18-րդ դարում եւ անշարժ տոներից է:

Նոյեմբերի 21-ին՝ տոնի ուրախ առիթով, Շիրակի թեմի Առաջնորդ Տ. Միքայել արքեպս. Աջապահյանի օրհնությամբ, Սուրբ եւ անմահ Պատարագ մատուցվեց թեմի այն եկեղեցիներում, որոնք կրում են Աստվածամոր անունը: Սուրբ Աստվածածին մայր եկեղեցում Սուրբ եւ անմահ Պատարագ մատուցեց Գյումրիում գտնվող Դիլիջանի Ս. Խաչ եկեղեցու հոգեւոր հովիվ Տ. Շավարշ քհն. Սիմոնյանը: «Նեղության, դժվարության պահին, երբ մենք ծնկաչոք դիմում ենք Տիրոջը, նշանակում է, որ մեր հույսն Աստված է, մենք Նրան վստահում ենք: Բայց սա այն սերը չէ, որ մեզ նորոգելով, մաքրելով առաջնորդում է հավիտենական կյանք: Սա այն ճշմարիտ սերը չէ, որ ունենք Աստծո հանդեպ: Աստված սեր է, եւ մարդը պետք է այդ սիրով անցնի: Երբ դու քեզանից «դուրս ես գալիս»՝ օգնելու դիմացինին, դա Աստծո տեսանելի սերն է, որ գործի ես վերածում…

Քրիստոս սարերի հետեւում չէ, աշխարհի մի հեռավոր անկյունում չէ, Քրիստոս նախ մեր մեջ է: Պարզապես պետք է Նրան այնքան ջերմություն տանք, որ Ինքը բացվի մեր մեջ, եւ մեզ էլ դարձնի Սուրբ Հոգու եւ Կենդանի Աստծո տաճար: Պողոս Առաքյալից ընթերցված այսօրվա պատգամը, որ դուք Կենդանի Աստծո տաճարներ եք, պարզապես խոսքեր չեն կամ հիշեցում չէ մեզ, թե ինչպիսին ենք կամ ինչպիսին պիտի լինենք, այլ այդպես պետք է ապրենք Աստծո ներկայության մեջ ամեն օր: Աստված չի նայում մեր անցյալին, ապագային: Աստված մեր ներկային է նայում, որովհետեւ ներկայից է կախված գալիքի որակը, ներկայից է կախված անցյալի սրբագրումը, մեր հոգու փրկությունը: Մեր փրկությունը վաղը կամ մյուս օրը չէ, այսօր է, այս պահին:

Երբ մենք առավոտյան արթնացանք, եկանք այստեղ՝ միասին աղոթելու: Աստված մեզ մայրամուտ չխոստացավ, մենք չգիտենք մայրամուտը կտեսնենք, թե ոչ: Երբ տուն վերադառնանք, պառկենք քնելու, Աստված մեզ լուսաբաց չի խոստանում: Դու պիտի զգաս դա ամեն օր, պիտի ապրես այն զգացողությամբ, թե սա քո վերջին օրն է, եւ դու ինչպե՞ս ես պատրաստվում Տիրոջը տեսնել: Վերջին «մեղա»-ն շատ դժվար է ասել, չես հասցնում: Ով ցավի, հիվանդության մեջ է, նա քաջ գիտե, թե ի՞նչ է նշանակում վերջին «մեղա»-ն ասել սրտով: Այն ամեն օր պետք է ի սրտե ասել, այլ ոչ թե նեղության ու ցավի մեջ: Միայն այդ ժամանակ մենք կդառնանք Կենդանի Աստծո տաճարներ, եւ Տերը կկամենա գալ ու բնակվել մեր մեջ»,- իր քարոզում շեշտեց պատարագիչ Տեր Հայրը:

Սուրբ եւ անմահ Պատարագ մատուցվեց նաեւ Հովտի Ս. Աստվածածին, Ջրափիի Ս. Աստվածածին, Մարալիկի Ս. Աստվածածին եկեղեցիներում: Մարալիկի Սուրբ Աստվածածին եկեղեցի էր բերվել Սուրբ Հովհաննես Մկրտչի մասունքակիր Աջը: Հավատավոր ժողովուրդը հնարավորություն ունեցավ խոնարհվել Սրբի մասունքակիր Աջին եւ հայցել նրա բարեխոսությունը:

«Սուրբ Աստվածածինը հավատքի ջերմեռանդության ու խոնարհության օրիանակ է քրիստոնյաններիս եւ մասնավորաբար կանանց համար: Այսօր էլ հայ կանայք ավելի ջերմեռանդ են հավատքի մեջ, քան տղամարդիկ: Սիրելի՛ կանայք ձեր աղոթքներում խնդրեք Սուրբ Կույսի բարեխոսությունը՝ հայ տղամարդկանց դեպի ճշմարիտ հավատք, դեպի Աստված դառնալու համար»,- իր խոսքում առանձնակի նշեց Մարալիկի Ս. Աստվածածին եկեղեցու հոգեւոր հովիվ Տ. Տիգրան քահանա Մխիթարյանը:

ՄԱՐԻԱՄ ՍՈՒՔԻԿՅԱՆ

>>>