Քրիստոնեական հավատք ունեցողը չի կարող զուրկ լինել հույսից, որովհետեւ հույսի աղբյուրն Աստված Ինքն է:

ԳԱՐԵԳԻՆ Ա ԿԱԹՈՂԻԿՈՍ

 

Ընթացիկ համար

 


Քեզ համար   

 


Մանուկներին

 


Արխիվ

 

Քարոզները

 

Բացիկներ

 

   
    ԻԵ Տարի, Թիվ 4 (292), ապրիլ 2024 թ.  


 

       

Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՈՒՂԵՐՁԸ
ՀԱՅՈՑ ՑԵՂԱՍՊԱՆՈՒԹՅԱՆ ՍՈՒՐԲ ՆԱՀԱՏԱԿՆԵՐԻ
ՀԻՇԱՏԱԿԻ ՕՐՎԱ ԱՌԻԹՈՎ

իրելի՛ ժողովուրդ հայոց ի հայրենիս եւ ի սփյուռս,

Վերստին աղոթքով եւ խոնարհումով հիշատակում ենք Հայոց Ցեղասպանության մեր Սուրբ Նահատակներին, ովքեր, ամուր պահելով իրենց հավատքը, սերն ու նվիրումն առ ազգն ու հայրենին, մարտիրոսության պսակն ընդունեցին:

Հայոց Ցեղասպանության Սուրբ Նահատակների հիշատակը նշում ենք մի շրջանում, երբ մեր ժողովուրդը գտնվում է գոյաբանական նոր սպառնալիքների եւ անվտանգային լրջագույն հիմնախնդիրների հանդիման: Հայրենի Արցախում իրականացված ցեղասպանական գործողություններից եւ Արցախի հայաթափումից հետո ներկայիս մտահոգիչ, ծանր իրավիճակ է Հայաստանի սահմանային տարածքներում:

Սուրբ Նահատակների լույս հիշատակի առջեւ մեր նվիրական պարտքն է՝ պաշտպանել ամբողջականությունը մեր հայրենի երկրի, նախանձախնդիր լինել հայոց անկախ պետականության զորացմանը եւ, որպես սրբազան մասունք, պահպանել մեր նախնյաց ավանդներն ու ժառանգությունը:

Մեր ժողովուրդը հզոր է իր հերոսական անցյալով, չարի ու չարիքի դեմ պայքարի վճռականությամբ եւ նույն ոգով պիտի հեռացնի իր կյանքից, ազգային շահերին հակառակ, կործանարար դրսեւորումները, առկա բարդ իրադրությունից, ջանքերի մեկտեղումով, ելքի ուղիներ գտնի եւ կերտի իր հաղթական ապագան:

Սիրելի՛ բարեպաշտ ժողովուրդ, այս նվիրական օրը միասիրտ աղոթքով հայցենք մեր Սուրբ Նահատակների բարեխոսությունը, որ, հարուցյալ Քրիստոսի շնորհների ու օրհնության ներքո, խաղաղ, անվտանգ ու բարօր լինեն մեր հայրենիքն ու ազգը, եւ մենք հավատով ու հույսով հաստատենք մեր ընթացքն ապահովության ու առաջընթացի շավիղներում:

Թող Տիրոջ սերն ու խնամքը հովանի լինեն մեր hայրենիքին ու համայն մեր ժողովրդին այսօր եւ միշտ. ամեն:

ԳԱՐԵԳԻՆ Բ ԿԱԹՈՂԻԿՈՍ
ԱՄԵՆԱՅՆ ՀԱՅՈՑ

>>>

 
     
         


 

 

Ընթացիկ համար Քեզ համար Մանուկներին Արխիվ   Քարոզները