Քրիստոնեական հավատք ունեցողը չի կարող զուրկ լինել հույսից, որովհետեւ հույսի աղբյուրն Աստված Ինքն է:

ԳԱՐԵԳԻՆ Ա ԿԱԹՈՂԻԿՈՍ

 
 

 

Ընթացիկ համար

 


Քեզ համար   

 


Մանուկներին

 


Արխիվ

 

Քարոզները

 

Բացիկներ

 

   
    ԻԵ Տարի, Թիվ 4 (292), ապրիլ 2024 թ.  


 

       

«ԱԶԴԱԿ»-Ի «ՅԱՐՈՒԹԻՒՆ ԱՐՍԼԱՆԵԱՆ ՎԱՐՉԱԿԱՆ
ԲԱԺԻՆ»-Ի ԱՆՈՒԱՆԱԿՈՉՈՒԹԻՒՆ ԵՒ ՀԱՆԴԻՍԱՒՈՐ ԲԱՑՈՒՄ

պրիլի 1-4-ը, Արսլանյան ընտանիքի հրավերով, Լիբանան մեկնեց Շիրակի թեմի բարեխնամ Առաջնորդ Տ. Միքայել արքեպս. Աջապահյանը՝ մասնակցելու թեմի բարերար երջանկահիշատակ Հարություն Արսլանյանի ծննդյան հարյուրամյակի եւ «Ազդակ»-ի «Յարութիւն Արսլանեան վարչական բաժին»-ի անվանակուչության արարողությանը: Ստորեւ՝ «Ազդակ»-ի հրատարակած հոդվածն ամբողջությամբ:

«Ազդակ»-ի «Յարութիւն Արսլանեան վարչական բաժին»-ի անուանակոչութիւնը տեղի ունեցաւ 3 ապրիլ 2024-ին, երեկոյեան ժամը 7:00-ին` ներկայութեամբ ՀՅԴ Լիբանանի Կեդրոնական կոմիտէի անդամներուն, Արսլանեան ընտանիքին եւ «Ազդակ»-ի խմբագրական կազմին:

«Ազդակ»-ի անունով բացման խօսքն արտասանեց պատասխանատու խմբագիրներէն Ժագ Յակոբեան, որ նկատել տուաւ, թէ աւանդութիւն դարձած է «Ազդակ»-ի աշխատասենեակները կոչել մամուլի գործիչի կամ բարերարի մը հարազատին անունով, իսկ այդ նախաձեռնութեամբ այդ շարքը կը համալրուի «Յարութիւն Արսլանեան վարչական բաժին»-ով: Նշելով, որ յատուկ խորհուրդ մը կայ այս երեկոյին` ան ըսաւ, որ Յարութիւն Արսլանեանի զաւակը` Գրիգոր Արսլանեան, առաջին անգամը չէ, որ կը սատարէ «Ազդակ»-ին եւ, իր հօրմէն ստացած աւանդոյթները շարունակելով, ազգ, Եկեղեցի, դպրոց` ան գիտակից է, որ այդ արժէքներու տարածման ամէնէն վաւերական միջոցը հայ մամուլն է: Ժագ Յակոբեան յայտնեց, որ Յարութիւն Արսլանեանին անունը, «Ազդակ»-ի մէջ քանդակուելէն առաջ, քանդակուած է Շիրակի թեմի Ազատան գիւղի Ս. Յարութիւն վերանուանուած եկեղեցւոյ եւ Լիբանանի հայոց թեմի Ս. Աստուածածին եկեղեցւոյ կամարներուն տակ: Ան դիտել տուաւ, որ Հայաստանեայց Եկեղեցւոյ ամբողջականութեան հաւատացող Յարութիւն Արսլանեանի անուան տեղադրումին պատահական չէ սրբազաններու համատեղ ներկայութիւնը «Ազդակ»-ի յարկին տակ` աւելցնելով, որ խորհուրդները կը շարունակուին, երբ յիշենք, որ Յարութիւն Արսլանեանի անուանակոչումը ազգովին վերջերս նշեցինք Ս. Զատկուան առիթով, եւ այսօր կ’ամբողջանայ անոր ծննդեան 100-ամեակը: Եզրափակելով իր խօսքը` Յակոբեան ըսաւ, որ Յարութիւն Արսլանեանի որդին` Գրիգոր Արսլանեան, ոչ միայն անձնապէս կը սատարէ «Ազդակ»-ի, այլ նաեւ մղիչ ուժ կ’ըլլայ այլոց` իրենց նուիրատուութիւններով մասնակից դառնալու «Ազդակ»-ի առաքելութեան, վստահեցնելով, որ իր օրինակին պիտի հետեւին այլ աջակիցներ եւս:

Շիրակի թեմի Առաջնորդ Տ. Միքայէլ արքեպս. Աջապահեան յիշատակեց երջանկայիշատակ Գարեգին Ա. Ամենայն Հայոց Կաթողիկոսի (Գարեգին Բ. Մեծի Տանն Կիլիկիոյ Կաթողիկոս) խօսքը, թէ մարդն է, որ կը շէնցնէ երկիրը՝ նշելով, որ ատոր խօսուն ապացոյցներէն կը հանդիսանայ «Ազդակ»-ի խմբագրատան մէջ եղած բացման այդ արարողութիւնը` իր ամբողջ ուժականութեամբ եւ իմաստականութեամբ, որովհետեւ այդպիսի անձ մըն էր Յարութիւն Արսլանեանը, որ կը շէնցնէր երկիրը իր ներկայութեամբ` խօսքով, ժպիտով, առաքելութեամբ, աշխատանքով, կազմած ընտանիքով, սնուցած զաւակներով, դաստիարակած թոռներով: Անդրադառնալով Շիրակի թեմի Ազատան գիւղի նախկին Ս. Ստեփանոս եկեղեցւոյ` Սրբազանը ըսաւ, որ Յարութիւն Արսլանեանի բարերարութեամբ վերանորոգուելով` վերանուանուած էր Ս. Յարութիւն եկեղեցի, դիտել տուաւ, որ եկեղեցւոյ բացումը կատարուած էր 1999 թուականին, երբ ինք տակաւին առաջնորդ չէր: Սրբազանը ըսաւ, որ ինք ծանօթացած էր Արսլանեան ընտանիքին աւելի ուշ, 2000 թուականին, երբ ստանձնած էր Շիրակի թեմի առաջնորդութիւնը՝ աւելցնելով, որ իրենց բարեկամութիւնը սկսած էր այդ օրերէն եւ շարունակուած քառորդ դար` վստահեցնելով, որ տակաւին պիտի շարունակուի: Առաջնորդ Սրբազանը դիտել տուաւ, որ իրեն համար դժուար է յիշատակի խօսքեր ըսել, որովհետեւ իրեն համար անմահութեան խորհրդանիշ դարձած էր Յարութիւն Արսլանեան, անձ մը, որ պէտք չէր հեռանար, սակայն վստահաբար ան կենդանի պիտի մնայ մեր հոգիներուն, սրտերուն, միտքերուն եւ յիշողութեան մէջ: Ան վստահեցուց, որ այս պահուն Յարութիւն Արսլանեան մեզի հետ է եւ կը հրճուի այն բարութեան ոգիով, որուն միջոցով ան ապրած ու փոխանցած է, եւ այդ բարութիւնը յաճախ իր նիւթական դրսեւորումը ունեցած է պարբերաբար` իբրեւ շէնք, շինութիւն, սրահ եւ այլ ձեւերով: Ան մաղթեց, որ Արսլանեան ընտանիքի բոլոր անդամները անսասան մնան իրենց հաւատքին մէջ, շարունակեն Յարութիւն Արսլանեանի առաքելութիւնը եւ իրենք ալ ունենան յաջողութիւններ, ձեռքբերումներ, որոնցմէ, ազգին եւ Եկեղեցւոյ բաժին հանած իրենց նուիրատուութիւններով, շարունակեն իրենց հօր ուղին:

Մեծի Տանն Կիլիկիոյ կաթողիկոսութեան մատենադարանապետ Տ. Շահան արքեպս. Սարգիսեան իր խօսքին մէջ յայտնեց, որ ցնծութեան եւ ուրախութեան պահ է, որովհետեւ Յարութիւն Արսլանեանի ծննդեան 100-ամեակին մենք համախմբուած ենք՝ դարձեալ արարչագործական իմաստով իրագործում մը հաստատելու եւ հռչակելու: Սրբազանը շնորհաւորեց «Ազդակ»-ի մեծ ընտանիքը, համահայկական առումով սփիւռքահայ եւ գուցէ նաեւ հայրենիքի մէջ իր շատ կարեւոր ներդրումը ունեցող այս մամուլը, անդրադարձաւ «Ազդակ»-ի կապուածութեան Արսլանեան ընտանիքին հետ, յատկապէս` Յարութիւն Արսլանեանին, որուն 100-ամեակի այս օրը կարծէք Տիրոջ յարութեան շարունակութիւնն է` տրուած ըլլալով, որ Ս. Յարութեան շարունակութիւնը Քրիստոսի յարութիւնն է, եւ Յ. Արսլանեանն ալ, այս նախաձեռնութեամբ յարութիւն առնելով, կը մտնէ մեր ազգային կեանքին մէջ` իր ունեցած մարդասիրական, ազգային, եկեղեցական ծառայութեամբ, շնորհիւ իր զաւակներուն, թոռներուն եւ ծոռներուն: Սրբազանը ըսաւ, որ համախմբուած ենք յիշելու Յարութիւն Արսլանեանը եւ իրմով ներշնչուելու, որովհետեւ վստահաբար ան գոհունակութիւն կ’ապրի` ի տես այս համախմբումին, իրականացումին, որ մեկնարկ մը, սկզբնաւորութիւն մըն է շարունակելու այն աւանդը եւ աւանդութիւնը, զոր ինք ժառանգած է Այնթապէն` սկսեալ իր հարազատներէն եւ նախնիներէն, յանձնելով իր զաւակին, թոռներուն եւ ծոռներուն, շարունակելու ազգային, եկեղեցական հաւատքի ճամբան, ազգային ուղին: Տ. Շահան արքեպս. Սարգիսեան վկայեց, որ Յարութիւն Արսլանեանին հետ անձնական իր հանդիպումները կ’ապացուցեն իւրայատուկ մարդ մը, հաւատքի մարդ մը` Աստուծոյ, Եկեղեցւոյ եւ իր համոզումներուն նկատմամբ: Եզրափակելով խօսքը` Սրբազանը շնորհաւորեց «Ազդակ»-ի ընտանիքը, նաեւ Արսլանեան ընտանիքը սոյն իրագործումին համար` մաղթելով, որ անոր յիշատակը միշտ պայծառ մնայ եւ ցնծութեամբ դիմաւորենք այն յաջողութիւնը, որ «Ազդակ»-ը պիտի իրականացնէ մեր ազգային կեանքին մէջ:

Այնուհետեւ տեղի ունեցաւ անուանակոչուած վարչական բաժինի արձանագրութեան քողազերծումը՝ ձեռամբ Յարութիւն Արսլանեանի թոռներուն` Յարութ եւ Յովիկ Արսլանեաններու:

Եզրափակիչ խօսքը արտասանեց Արսլանեան ընտանիքին կողմէ Լիբանանի հայոց թեմի Ազգային վարչութեան ատենապետ Գրիգոր Արսլանեանը, որ շնորհակալութիւն յայտնեց ներկաներուն` իրենց մասնակցութեան համար, եւ` «Ազդակ»-ին, որ առիթը ընծայած էր վարչական բաժինը իր հօր անունով կոչուելուն` անոր ծննդեան 100-ամեակի օրը, որ իրենց համար կարեւոր խորհուրդ ունի: Ան նկատել տուաւ, որ Ս. Յարութեան տօնին առիթով իրենց ընտանեկան աւանդութիւնն էր խմբուիլ իրենց հօր շուրջ` նշելու անոր անուան տօնը, աւելցնելով, որ այժմ աւելի լայն ձեւով համախմբուած ենք եւ կը նշենք այս կարեւոր կեդրոնին մէջ անոր անուանակոչումը: «Եկեղեցի-ազգ-ընտանիք. այս արժէքները փոխանցեց հայրս իր զաւակներուն եւ թոռներուն, եւ մենք յանձնառու պիտի մնանք այդ արժէքներուն», - հաստատեց Գրիգոր Արսլանեան:

«ԱԶԴԱԿ» ՕՐԱԹԵՐԹ
Ապրիլ 6, 2024

>>>

 
     
         


 

 

Ընթացիկ համար Քեզ համար Մանուկներին Արխիվ   Քարոզները