| ՄԱՐՏԱԿԵՐՏՑԻՆԵՐԻ
ԱՅՑԸ ԳՅՈՒՄՐԻ
  ոկտեմբերի
14-ին Շիրակի թեմի երիտասարդաց միությունը Գյումրիում հյուրընկալեց
Արցախի Մարտակերտ քաղաքի Սուրբ Կարապետ եկեղեցու կիրակնօրյա դպրոցի
սաներին՝ իրենց ընտանիքներով:
Բռնի տեղահանումից հետո Երեւանի տարբեր հատվածներում հայտնված մարտակերտցիներին
կիրակնօրյա դպրոցի ուսուցչուհի ընկեր Գոհարը կարողացավ հավաքել եւ
կրկին համախմբել արդեն Երեւանում վերաբացված կիրակնօրյայում: Բարեշնորհ
Գրիգոր սարկավագ Ավոյանի հրավերով էլ նրանք հայտնվեցին Գյումրիում:
Հեքիաթային օրն սկսվեց նախ այցելելով Գյումրու ժողովրդական ճարտարապետության
եւ քաղաքային կենցաղի թանգարան: Ողջ աշխատակազմը, գլխավորությամբ
տնօրեն Անի Նազարյանի, արցախցի մեր հյուրերին դիմավորեց ջերմ ու
գրկաբաց: Երեխաներն այստեղ ծանոթացան Գյումրու կենցաղին, մշակույթին,
արհեստներին, նիստ ու կացին, զուգահեռներ անցկացրին արցախյան կենցաղի
ու մշակույթի հետ:
 Փոքրիկ
հյուրերը հատկապես տպավորված էին թանգարանում ներկայացված վարդ-թանթանաներով,
որոնք եղել են շիրակյան ազգային տարազի ամենակարեւոր տարրերից մեկը:
Այնուհետեւ Գյումրու մասին պատմություններ լսելով՝ երեխաները հաջորդը
կանգ առան առաջնորդանիստ Սուրբ Աստվածածին մայր եկեղեցում: Այստեղ
քահանա հայրերը ներկայացրին եկեղեցու պատմությունը, միասնական աղոթք
հնչեցրին հայրենիքի խաղաղության ու անսասանության համար:
Թե՛ մեծերը եւ թե՛ փոքրերն անչափ տպավորված էին Հայաստանում իլյուզիաների
առաջին եւ միակ թանգարան այցով, ուր բոլորը զարմացան, երջանկացան,
անկեղծ ժպտացին, լուսանկարվեցին «ամենակախարդական» սենյակներում,
ծանոթացան «ամենակախարդական» ցուցանմուշների հետ: Մի խոսքով՝ մի
քանի րոպե կտրվեցին ամեն ինչից…
Մեր արցախցի հայրենակիցների օրը Գյումրիում առավել հիշարժան դարձավ
Շիրակի թեմի Առաջնորդ Գերաշնորհ Տ. Միքայել արքեպիսկոպոս Աջապահյանի
հետ հանդիպումով: Սրբազան Հայրը սիրով ու հայրական օրհնությամբ դիմավորեց
նրանց:
 Միքայել
Սրբազանը զրուցեց փոքրիկների հետ՝ ծանոթանալով նրանց տաղանդներին
ու նախասիրություններին, նոր կրթական հաստատությունների վերաբերյալ
առաջին տպավորություններին: Առաջնորդ Սրբազանը մեծահասակներից մանրամասնորեն
հարցուփորձ արեց կենցաղային պայմաններից: Անկեղծ եւ ջերմ զրույց
ստացվեց…
Սրբազան Հայրը քաղցր հյուրասիրությամբ առավել քաղցրացրեց երեխաների
օրը: Մեր հյուրերը պատիվ ունեցան ծանոթանալ նաեւ Կովկասի գերմանական
լյութերական համայնքի Առաջնորդի հետ, ով շեփորով մի քանի երաժշտական
կատարումներ նվիրեց փոքրիկներին:
Մարտակերտցի հյուրերին անակնկալներ էին սպասվում Արսեն Վարդանյանի
արհեստանոցում: Այնտեղ նրանք ծանոթացան «Գյումրիկներ»-ի պատրաստման
եղանակին: Այնուհետեւ Արսեն Վարդանյանը յուրաքանչյուրին, իրենց իսկ
ցանկացած գրությամբ, նվիրեց փայտե մարդուկներ, որոնք հավերժ հիշեցնելու
են անմոռանալի օրվա մասին:
Շիրակի թեմի երիտասարդաց միությունը Շիրակի թեմի սոցիալ-կրթական
կենտրոնի եւ «Երիտասարդական պալատ» ՀՈԱԿ-ի աջակցությամբ, պատրաստել
էր նվերներ՝ հրաշք փոքրիկների համար: Կրկին հանդիպելու ակնկալիքով՝
անմոռանալի օրն ավարտվեց Գյումրու Սուրբ Ամենափրկիչ եկեղեցում:
ԳՈՀԱՐ ԳԱԼՏԱԳԱԶՅԱՆ
ԼՈՒՍԱՆԿԱՐՆԵՐԸ՝ ՀԵՂԻՆԱԿԻ
>>>
|
|
