Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԱՆԴՐԱՆԻԿ ՍՈՒՐԲ ՊԱՏԱՐԱԳ ՍՈՒՐԲ ՇՈՂԱԿԱԹՈՒՄ

գոստոսի 27-ին Էջմիածին քաղաքի եկեղեցիներում իրենց առաջին Սուրբ Պատարագը մատուցեցին, հուլիսի 16-ին քահանայական կոչմանն արժանացած եւ Մայր Աթոռում քառասնօրյա պահեցողության շրջանն անցած, նորաօծ երեք քահանաները՝ Տ. Հակոբոս քահանա Իսահակյանը, Տ. Պետրոս քահանա Կադեյանը եւ Տ. Մովսես քահանա Սահակյանը:

Սուրբ Շողակաթ եկեղեցում պատարագեց արժանապատիվ Տ. Հակոբոս քահանա Իսահակյանը: Սրբազան արարողակարգի ընթացքում՝ «Հայր մեր»-ից առաջ, պատարագիչ Տեր Հայրն իր քարոզն սկսեց այս խոսքերով. «Նախ ամեն բանի համար գոհություն ու փառք եմ մատուցում Աստծուն, որ ինձ` անարժանիս, իրեն ծառայելու եւ սպասավորելու պատասխանատու կոչմանն է արժանացրել: Այնուհետեւ Տեր Հակոբոսը մեկնեց օրվա խորհուրդը եւ անդրադարձ կատարեց սուրբգրային համապատասխան ընթերցվածին:

«Հայցենք Աստվածամոր բարեխոսությունը, որպեսզի Տիրոջ անսահման սերը, խաղաղությունն ու զորավոր Սուրբ Աջը պահապան լինեն Հայաստան, Արցախ աշխարհներին եւ համայն հայ ժողովրդին», - իր քարոզն այս խոսքերով եզրափակեց Տեր Հակոբոս քահանա Իսահակյանը:

Սուրբ եւ անմահ Պատարագին ներկա էին հոգեւոր հայրեր, ինչպես նաեւ մեծաթիվ ուխտավոր հայորդիներ:

Տեր Հակոբոս քահանան, որպես սարկավագ, երկար տարիներ ծառայել է Շիրակի թեմում, ուստի թեմի երիտասարդաց միության անդամները նույնպես ներկա գտնվեցին սիրելի Տեր Հոր մատուցած անդրանիկ Սուրբ Պատարագին:

Թեմի երիտասարդաց միության անդամների համար այդ կարեւորագույն օրն առավել նշանավորվեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հետ հանդիպումով, հընթացս որի նրանք ստացան Վեհափառ Հայրապետի օրհնությունը:

Վերջում երիտասարդները, Տեր Հակոբոսի հետ, մասնակցեցին սիրո ճաշի՝ ագապեի եւ գոհ սրտով բռնեցին տունդարձի ճամփան:

ԳՈՀԱՐ ԳԱԼԹԱԳԱԶՅԱՆ

>>>