Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԱՄԱՆՈՐԻ ՀԱՆԴԻՍՈՒԹՅՈՒՆ ՍՈՒՐԲ ՀԱԿՈԲՈՒՄ

եկտեմբերի 22-ին Սուրբ Հակոբ եկեղեցում հյուրնկալվել էր Ձմեռ պապը: 150 երեխաների համար, Ամանորի եւ Սուրբ Ծննդյան տոների ուրախ առիթով, Նոր տարվան նվիրված ծրագրով հանդես եկան Երեւանի կինոյի եւ թաթրոն-ինստիտուտի Գյումրու մասնաճյուղի երրորդ կուրսի ուսանողները՝ ռեժիսոր Հովհաննես Հովհաննիսյանի ղեկավարությամբ:

Հանդիսության բացումն ազդարարեց զվարճալի ծաղրածուն՝ իր շոու-ծրագրով, որին ներգրավվեցին ներկա փոքրիկները: Պարային համարները, երգերն ու մրցութային խաղերը հաջորդում էին մեկը մյուսին: Երախաների հետ ուրախությունը կիսում էին նրանց ծնողները: Շուրջ երեք հարյուր մեծիկներ ու փոքրիկներ մասնակցեցին ծաղրածուի կազմակերպած խաղերին:

Երբ ծաղրածուն հրաժեշտ տվեց հանդիսատեսին, բեմը տրամադրվեց «Մեծ անտառի զավակներ»-ին: Այսպես է կոչվում Լեսլի Ռիչարդսոնի հեքիաթը, որը բեմականացրել էին ուսանողները: Հեքիաթը բնօրինակից տարբերվում էր նրանով, որ, գլխավոր հերոսի քրոջ փոխարեն, անտառի չար արքան գողացել էր Ձմեռ պապիկին եւ հերոսներին անլուծելի առաջադրանքներ հանձնարարել՝ պայմանով, որ նրան կազատի, եթե կարողանան կատարել դրանք: Մեծաթիվ փորձություներ հաղթահարելով՝ հեքիաթի հերոսները կատարեցին հանձնարարությունները՝ ընկերասիրության ու միասնականության շնորհիվ: Չնայած չարը դժվար է հանձնվում, բայց այս հեքիաթում էլ չար արքան ստիպված եղավ ազատ արձակել Ձմեռ պապիկին:

Վերջապես նա մտավ դահլիճ եւ է՛լ ավելի փայլեցին ներկա փոքրիների աչքերը: Բարեմաղթանքներից բացի, որ բերել էր Ձմեռ պապը գալիք տարվա առիթով, նա իր թոռնիկներին նվիրեց նաեւ քաղցրավենիքի պարկեր: Քաղցր նվերներից անմասն չմնացին «մեծ անտառի զավակները» եւս:

Քրիստոնեությունն ընդունելուց հետո Ձմեռ պապի կերպարը նույնացվել է Բյուզանդական Եկեղեցու արքեպիսկոպոս Սուրբ Նիկողայոսի հետ, որը, ավանդության համաձայն, շատ բարի էր, օգնում էր չունեւորներին: Հայտնի է, օրինակ, մի աղքատ ընտանիքի երեք աղջիկներին օգնելու պատմությունը՝ նրանց տան պատուհանից աննկատ ոսկու փոքրիկ կապոցներ գցելով, որպեսզի հայրը կարողանա վերջիններիս ամուսնացնել: Ասում են՝ այդպես է ձեւավորվել բարեգործությունը:

Ս. Հակոբի մշակութային բաժնում միշտ կարեւորում են նմանատիպ ուսուցողական հեքիաթնեը, որոնք մատաղ սերնդի մեջ սերմանում են միասնականություն, ընկերասիրություն, բարություն, օգնության հասնելու պատրաստակամություն:

Եկեղեցու հոգեւոր հովիվ Տ. Վարուժան քհն. Տերտերյանը, մշակութային կենտրոնի աշխատակազմը շնորհակալություն են հայտնում նորվեգացի բարերար Օլա Օստվեյտին՝ այսպիսի հիանալի օր երեխաներին պարգեւելու համար: Ամեն տարի նա մեծ սիրով հոգում է այս միջոցառման ֆինասական ծախսերը, ինչպես նաեւ տրամադրում միջոցներ՝ հիսուն անապահով ընտանիքների սննդի փաթեթներ նվիրելու համար:

Այս տարի ծրագրում ընդգրկված էին հաշմանդամներ, միայնակ ծերեր, բազմազավակ ընտանիքներ: Թող Աստված օրհնի բոլոր մարդկանց բարի գործերը:

ԼՈՒՍԻՆԵ ԳՐԻԳՈՐՅԱՆ
ԼՈՒՍԱՆԿԱՐՆԵՐԸ՝ ՀԵՂԻՆԱԿԻ

>>>