Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԽԱՉԵՐԹ ՍՈՒՐԲ ՀԱԿՈԲ ՀԱՅՐԱՊԵՏԻ ՏՈՆԻ ԱՌԻԹՈՎ

եկտեմբերի 17-ին Հայ Առաքելական Սուրբ Եկեղեցին ոգեկոչեց Սուրբ Հակոբ Մծբնա Հայրապետի, Մարուգե ճգնավորի, Մելիտոս եպիսկոպոսի հիշատակը:

Սուրբ Հակոբ Մծբնա Հայրապետը Սուրբ Գրիգոր Լուսավորչի հորաքրոջ որդին է եւ հայտնի է իր սրբակենցաղ կյանքով ու բազում հրաշագործություններով: Երբեմն նրան անվանել են նաեւ «Սքանչելագործ»:

Սրբի կյանքի բազում դրվագներից ամենահայտնին կապված է Նոյան տապանի մասունքի հետ:

Մծբինում Մարուգե ճգնավորից լսելով, որ մարդկանցից շատերը, թեպետ հավատքի են եկել, բայց թերահավատ են եւ կասկածում են Նոյան տապանի գոյությանը, որոշում է բարձրանալ Արարատ լեռը, տապանը տեսնել եւ մի մասնիկ բերել: Հակառակ անկոտրում կամքին` չի կարողանում հասնել Արարատի գագաթը եւ, երկար տանջվելուց հետո, նիրհում է: Երազում հրեշտակն այցելում է նրան եւ տապանից մի մասունք դնում գլխատակին՝ ասելով. «Աստված ընդունեց քո ուխտը եւ քեզ պարգեւում է Նոյան տապանից մի մասունք»: Այն ցայսօր պահվում է Մայր Աթոռ Սուրբ Էջմիածնի թանգարանում:

Այս տոնի խորհրդով, ինչպես նաեւ Շիրակի թեմի Առաջնորդ գերաշնորհ Տ. Միքայել արքեպս. Աջապահյանի օրհնությամբ, Գյումրիում կազմակերպվեց Խաչերթ: Առաջնորդանիստ Ս. Յոթվերք եկեղեցուց առավոտ կանուխ դեպի Ս. Հակոբ շարժվեց հավատացյալների հոծ բազմությունը՝ Շիրակի թեմի քահանաների ու սարկավագների առաջնորդությամբ, աղոթքով ու շարականների երգեցողությամբ:

Եկեղեցու մուտք մոտ խաչերթի մասնակիցներին օրվա հոգեւոր պատգամը փոխանցեց արժանապատիվ Տ. Հակոբ քհն. Գրիգորյանը՝ խոսելով խաչերթի նշանակության մասին: Տեր Հայրն այնուհետեւ հավելեց, որ հայ ժողովրդի դարձով ու ապաշխարությամբ, այսինքն՝ հոգեւոր հաղթանակով են գալու նաեւ աշխարհիկ հաղթանակները:

Ապա խաչերթի մասնակիցներին հրավիրեց ներկա գտնվել, տոնի առիթով մատուցվող, Սուրբ եւ անմահ Պատարագին, հաղոդակից դառնալ մեծագույն Խորհրդին՝ մեր Տեր Հիսուս Քրիստոսի մարմնի ու արյան ճաշակմանը:

Հոգեւոր ապրումներով լեցուն այդ օրը եւս մեկ հանգրվան էր՝ տոնելի Սրբերի բարեխոսությունը հայցելու հայոց ազգի հոգեւոր արթնության համար:

ԳՈՀԱՐ ԳԱԼԹԱԳԱԶՅԱՆ

>>>