| «ՏԷՐ,
ԲԱՐՒՕՔ Է ՄԵԶ ԱՍՏ ԼԻՆԵԼ»
ՄԵԿՕՐՅԱ ՈՒԽՏԱԳՆԱՑՈՒԹՅՈՒՆ ՎԱՅՈՑ ՁՈՐ
 այ
ժողովրդին բազում արհավիրքներից ու դժվարություններից փրկել է սեփական
կրոնի եւ հայրենյաց նկատմամբ ունեցած սերն ու հավատքը: Այդ սիրո
եւ հավատքի ցայտուն դրսեւորումներից են նաեւ ուխտագնացությունները:
Այդ ի մտի ունենալով՝ Զարիկ Իգիթյանի եւ Ժաննա Խաչատրյանի նախաձեռնությամբ,
մի խումբ հավատացյալներ հուլիսի 20-ին ուխտավորաբար այցելեցին Վայոց
Ձորի մի շարք եկեղեցիներ:
ՆՈՐԱՎԱՆՔ
Առաջին կայանը Սյունյաց մետրոպոլիտների աթոռանիստ, Օրբելյանների
հոգեւոր կենտրոն ու դամբարանավայր, նաեւ հայ եկեղեցական ճարտարապետության
ամենանշանավոր կառույց Նորավանքն էր: Ըստ տեղացիների՝ այն անվանում
են «Կարմիր վանք»: Համալիրի գլխավոր եկեղեցին՝ Ս. Ստեփանոս Նախավկան,
12-րդ դարի կառույց է, որին կից է Ս. Գրիգոր եկեղեցի-տապանատունը:
1999 թ. վերաբացվեց եւ, Ն.Ս.Օ.Տ.Տ. Գարեգին Ա Ամենայն Հայոց Կաթողիկոս
ձեռամբ, վերաօծվեց հռչակավոր Նորավանքը: Հայկական ճարտարապետության
մեջ եզակի մի փաստ է սա, երբ տոհմական տապանատունը եկեղեցի է, ունի
անուն, ինչպես նաեւ բեմ, սրբավայր-ուխտատեղի, քանզի վանքի մոտ էր
գտնվում Ս. Փոկաս մատուռը՝ Ս. Փոկաս Հհայրապետի մասունքով ու հրաշագործ
աղբյուրով:
 Ուխտավորներին
հիացրեց նաեւ 13-րդ դարի Ս. Աստվածածին եկեղեցի-դամբարանը, որ կառուցել
են իշխանաց իշխան Բուրթելեն ու Իվանեն՝ Մոմիկ ճարտարապետի նախագծով:
Նորավանքն ուխտավորի համար «կենդանի քար» է (Ա Պետ. Բ 5), որ իր
հատուկ լեզվով խոսում է հավատքի, սիրո, Աստծո անստվեր ներկայության
մասին: 1840 թ. երկրաշարժից լիովին ավերված Ս. Աստվածածինը նորոգվել
է 1996-98 թթ.՝ մեկենասությամբ Տեր եւ Տիկին Տիգրան եւ Տիանա Հաճեթյանների:
Ուխտավորներն այստեղ երգեցին հոգեզմայլ շարականներ եւ աղոթք առաքեցին
առ Աստված:
ՄԱԼԻՇԿԱՅԻ Ս. ԱՆՆԱ ԵԿԵՂԵՑԻ
Ուխտավորների հաջորդ կանգառը Մալիշկա գյուղի Ս. Աննա եկեղեցին էր:
Այն կառուցվել է 2000 թվականին՝ ՌԴ հայ համայնքի նախագահ Արա Աբրահամյանի
նախաձեռնությամբ: Եկեղեցին օծվել է ձեռամբ Գարեգին Բ Ամենայն Հայոց
Կաթողիկոսի: Այստեղ եւս ուխտավորները վառեցին իրենց հավատքի մոմերը,
աղոթք առաքեցին առ Բարձրյալն Աստված՝ խնդրելով Ս. Կույս Մարիամի
մոր՝ Սուրբ Աննայի բարեխոսությունը:
ՄՈՒՇԱՂԲՅՈՒՐԻ Ս. ՀՈՎՀԱՆՆԵՍ ԵԿԵՂԵՑԻ
Մուշաղբյուրը եղել է Հայաստանի հնագույն եւ նշանավոր բնակավայրերից
մեկը: Այն մի քանի անգամ հիշատակվում է նաեւ Ս. Հովհաննես Կարապետ
վանքի վիմագիր արձանագրություններում, ուր նշվում է, թե 1301 թ.
իշխանուհի Գոնցան կառուցել է Սպիտակավոր Աստվածածին, Ս. Հովհաննես-Կարապետ
վանական համալիրը: Վերջինս Ջալալ Օրբելյանի կինն էր:
Գմբեթավոր սրբատաշ քարերով կառույց է: Եկեղեցու ներսում է գտնվում
Օրբելյանների զինանշան քանդակը: Համալիրը կանգուն է մնացել մինչեւ
1678 թ. երկրաշարժը: Եղել է նաեւ գրչության կենտրոն: Այցելուներին
եկեղեցում իր հայրական օրհնության խոսքն ասաց հոգեւոր հովիվ Տ. Արիստակես
վրդ. Այվազյանը: Վերջինիս առաջնորդությամբ ուխտավորներն աղոթք բարձրացրին
առ Աստված՝ հայցելով Սուրբ Հովհաննես Կարապետի բարեխոսությունը:
Եկեղեցում ամփոփված է Սրբի մասունքը, որի առջեւ ծնրադիր խոնարհվեցին
ուխտավորները:
ՄԱՍԻՍԻ Ս. ԹԱԴԵՈՍ ԵԿԵՂԵՑԻ
Հաջորդ կանգառը Մասիսում գտնվող Ս. Թադեոս եկեղեցին էր, որը 2003
թվականին օծվել է ձեռամբ Ն.Ս.Օ.Տ.Տ. Գարեգին Բ Կաթողիկոսի: Այն կառուցվել
է բարերարներ Տեր եւ Տիկին Վարդանյանների, «Վարդանյան ընտանիք» բարեգործական
հիմնադրամի միջոցներով: Ուխտավորները ծնրադիր, միաձայն ու միահունչ
երգեցին «Տեր ողորմյա»-ն, «Հայր մեր»-ը, «Սուրբ Աստվածը»-ը եւ աղոթք
վերառաքեցին ի փառս Աստծո:
ԱՐՏԱՇԱՏԻ Ս. ՀՈՎՀԱՆՆԵՍ ԵԿԵՂԵՑԻ
Վերջին հանգրվանը, Արտաշատ քաղաքում գտնվող, Ս. Հովհաննես եկեղեցին
էր, որ կառուցվել է 2002 թ. եւ օծվել Ն.Ս.Օ.Տ.Տ. Գարեգին Բ Կաթողիկոսի
ձեռամբ: Այն խաչաձեւ է, միագմբեթ, ունի զանգակատուն: Կառուցվել է
բարերարությամբ Հովիկ Աբրահամյանի:
Եկեղեցի կառուցել նշանակում է հավատարմություն դրսեւորել մեր հայրերի
սրբազան հավատքի, անցյալի հոգեւոր ժառանգության հանդեպ, սիրել հայրենիքը
եւ նախանձախնդիր լինել նրա վաղվա օրվա նկատմամբ:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ԱՐՄԻՆԵ ԱՍԱՏՐՅԱՆԻ
>>>
|
|
