ՎԱՐԴԱՎԱՌՆ
ԱԶԱՏԱՆԻ ՍՈՒՐԲ ՀԱՐՈՒԹՅՈՒՆ (Ս. ՍՏԵՓԱՆՈՍ) ԵԿԵՂԵՑՈՒՄ
ուլիսի
24-ին մեր Տեր Հիսուս Քրիստոսի Պայծառակերպության տոնն է կամ, ինչպես
ժողովրդի մեջ է առավել հայտնի, Վարդավառը:
Պայծառակերպության
տոնը Հայ Առաքելական Եկեղեցու հինգ տաղավար տոներից երրորդն է: Եվ,
ինչպես բոլոր տաղավար տոները, Պայծառակերպությունը եւս Ազատանի Ս.
Հարություն-Ս. Ստեփանոս եկեղեցում նշվում է առանձնահատուկ:
Նախօրեին երիտասարդներն սկսեցին նախապատրաստական աշխատանքները: Նախ
բոլորը գնացին եւ դաշտերից հավաքեցին ցորենի հասկեր, ապա պատրաստեցին
խաչբուռներ՝ խաչի ու կենաց ծառի տեսքով, նարոտներ, տնական գաթաներ
եւ բարձր տրամադրությամբ սպասեցին տոնին:
Վարդավառը համընկնում է դաշտերում հասունացած հացահատիկի բերքահավաքին
եւ հնում՝ տոնի օրը, ժողովուրդը հասկեր է տարել եկեղեցի՝ խնդրելով,
որ դաշտերը կարկտից ու մորեխից անվնաս մնան:
Պայծառակերպության
տոնն սկսվեց Սուրբ եւ անմահ Պատարագով: Օրվա պատարագիչն էր Ազատանի
հոգեւոր հովիվ Տ. Մակար քահանա Գալամդարյանը: Հաղորդ դառնալով տոնի
հոգեւոր մասին՝ ժողովուրդն այնուհետ դուրս եկավ եկեղեցու բակ, ուր
Տեր Հայրն օրհնեց տոնի խորհրդանիշ վարդաջուրն ու խնձորները: Ըստ
ավանդության՝ Հայաստանի որոշ շրջաններում ինչպես խաղողն են օրհնել
ու կերել Վերափոխման կամ Խաղողօրհնեքի տոնին, այնպես էլ տարվա առաջին
խնձորն էին ուտում Վարդավառին:
Վարդավառի կարեւոր պայմաններից է միմյանց վրա ջուր ցողելը: Իսկ առաջինը
ջուր ցողելու պատիվը մեր եկեղեցում վերապահվեց քահանային: Այնուհետեւ
ջրախաղով, ազգային երգ ու պարով ներկա հավատացյալները նշեցին մեր
Տիրոջ Այլակերպության տոնը:
Ավանդույթները ժողովրդի մշակույթի մի մասն են եւ դրանց միջոցով է,
որ հնարավոր է դառնում պատկերացում կազմել տվյալ ժողովրդի, նրա պատմության
ու մշակույթի մասին:
ԳՈՀԱՐ ԳԱԼԹԱԳԱԶՅԱՆ
ԼՈՒՍԱՆԿԱՐՆԵՐԸ՝ ՀԵՂԻՆԱԿԻ
>>>
|
|