ՍՈՒՐԲ
ՍԱՐԳՍԻ ՏՈՆԸ «ԽԱՉՄԵՐՈՒԿ»-ՈՒՄ
Ն.Ս.Օ.Տ.Տ. Գարեգին Բ Ամենայն Հայոց Հայրապետի
տնօրինությամբ Ս. Սարգիս զորավարի տոնը հռչակվել է երիտասարդների
օրհնության օր:
Այս
տոնը Հայաստանում ընդունված է նշել ոչ միայն եկեղեցական ծեսով, աղոթքով,
այլեւ ժողովրդական սովորույթներով, որոնք մեզ համար նվիրական ավանդույթի
են վերածվել: Ս. Սարգիս զորավարը երիտասարդների արագահաս բարեխոսն
է: Նրա միջնորդությամբ հրաշքներ են տեղի ունենում: Այդ օրը երիտասարդները
դիմում են Սրբին, որ իրենց աղոթքները հասցնի առ Աստված:
Ս. Սարգսի տոնին նախորդող գիշերը երիտասարդներն աղաբլիթ են ուտում,
որի հետ են կապում իրենց փեսացուի կամ հարսնացուի երազահայտնությունը:
Օրվա հիշատակելի սովորույթներից է փոխինդով մատուցարանը դնել տան
տանիքին կամ պատշգամբին եւ սպասել զորավարի ձիու պայտի հետքին: Ըստ
ավանդույթի՝ Սուրբը պետք է հրեշտակների ուղեկցությամբ անցնի եւ ում
մատուցարանի մեջ դրված ալյուրի կամ փոխինդի մեջ թողնի, մաքրություն,
անաղարտություն խորհրդանշող, իր սպիտակ ձիու պայտի հետքը, այդ տարի
կիրականանա տվյալ հավատացյալի երազանքը:
Երիտասարդները տոնի առիթով միմյանց բացիկներ ու քաղցրավենիք են նվիրում,
իսկ զորավարի անունը կրող եկեղեցիներում մատուցվում է Սուրբ եւ անմահ
Պատարագ, որից հետո կատարվում է երիտասարդների օրհնության կարգ:
Փետրվարի 11-ին «Խաչմերուկ» կրթական խորհրդատվական կենտրոն հիմնադրամի
սաները նույնպես նշեցին տոնը կամավորների հետ: Վերջիններիս նախաձեռնությամբ
պատրաստվեցին աղաբլիթներ եւ հաջորդ օրը, դեռահասների ցերեկային խնամքի
կենտրոնի սաների հետ, այցելեցին Սուրբ Յոթվերք առաջնորդանիստ եկեղեցի,
ուր Տեր Փավստոսը, երեկոյան ժամերգությունից առաջ, մեկնեց տոնի խորհուրդը:
Ժամերգությունից հետո ներկա երիտասարդներն ստացան Տեր Հոր օրհնությունը:
Այնուհետեւ սաներն աղաբլիթները, տոնին առնչվող քառատողերի հետ, բաժանեցին
երիտասարդներին:
ԱՐԱՔՍԻ ՍԱՐԳՍՅԱՆ
>>>
|
|