ՆՌՆՕՐՀՆԵՔ
ՇԻՐԱԿԻ ԹԵՄՈՒՄ
«Երկու սյուների համար պատրաստեց նռնաձեւ
զարդեր, որպեսզի դրանք շարք-շարք
կախեն վանդակացանցի վրա: Երկու սյուների խոյակների վերեւից դրեց
պսակներ,
իսկ երկրորդ խոյակի շուրջը՝ կարգով շարված երկու հարյուր նռնաձեւ
զարդեր»:
Գ ԹԱԳ Է 18, 20
րդեն
ութերորդ տարին է, ինչ Ն.Ս.Օ.Տ.Տ. Գարեգին Բ Ամենայն Հայոց Հայրապետի
բարձր տնօրինությամբ, Հայոց Եկեղեցու աստվածապաշտական համակարգում
հաստատվել է եւս մի բարեպաշտական արարողություն՝ նռնօրհնեքը, որ
կատարվում է հայոց բոլոր եկեղեցիներում տարեմտի գիշերը՝ գոհաբանական
մաղթանքից հետո: Արարչաստեղծ պտղաբեր ծառերից նռնենու պտուղը եւս
այն խորհրդանշաններից է, որ հիշատակվում է Աստվածաշունչ Մատյանում:
Նռնօրհնեքի գաղափարը ծագեց ոչ միայն հայոց աշխարհում նռան մշակման,
Հայաստանի խորհրդանիշերից մեկը հանդիսանալու համար, այլ, առաջին
հերթին, իր հոգեւոր խորհրդաբանությամբ: Հայկական ավանդության մեջ
նուռը, իբրեւ ազգային խորհրդանիշ, կրում է կյանքի, ծաղկունքի եւ
առատության իմաստը: Քրիստոնեական խորհրդաբանության մեջ նուռը խորհրդապատկերն
է Հիսուս Քրիստոսի հեղած արյան՝ խորհրդանշելով նախ Տիրոջ հրաշափառ
Հարությունն ու Աստծո շնորհների բազմազանությունը:
Նուռն
արեւելյան ժողովուրդների մոտ համարվել է բոլոր պտուղների արքան ոչ
միայն նրա՝ քիմքին հաճելի համի, բուժիչ հատկությունների, այլեւ նռան
գլխամասում գտնվող թագանման հավելույթի պատճառով՝ այն ամենեւին պատահականություն
չդիտարկվելով: Տեսակետ կա, որ արքայական թագի նախատիպը հնում վերցրել
են նռան «թագից»: Մերձավոր ու Միջին Արեւելքում նուռը հայտնի էր
դեռեւս Ք.Ա. 12-17 դարերում: Մեծ համբավ ուներ կարթագենյան նուռը:
Այս պատճառով էլ հին հռոմեացիները նուռը կոչեցին «կարթագենյան (փյունիկյան)
խնձոր» եւ «հատիկավոր խնձոր» անվանումներով: Իսկ պարսկերենում, ինչպես
նաեւ պարսկալեզու մյուս ժողովուրդների մոտ նուռը կոչվում է «անար»,
որ նշանակում է կարմրհատ, հրակերտ, հրահատ:
Ի դեպ կարծիք կա, որ նռան հայրենիքը հենց Պարսկաստանն է: Իսկ հայերեն
«նուռն» բառը, ըստ Մագիստրոսի, առաջացել է «կուռ» բառից, ինչը Հ.
Աճառյանը հավաստի չի համարում: Նուռը պտղաբերության, առատության,
մեծահոգության, մաքրագործության ընդհանրական խորհրդանիշ է: Որպես
հայկական հուշանվեր՝ մեծ տարածում ունեն փայտից եւ կերամիկայից պատրաստված
նռան նմուշները: Քիչ չեն նաեւ արծաթե զարդանախշերը: Նռան եւ նռնենու
պատկերազարդումները տարածված են նաեւ բուն եկեղեցական արվեստում:
Օրինակ՝
Ս. Գրիգոր Լուսավորչի Աջի «թեղանիքի» վրա փորագրված ծաղկազարդերը
նռան տեսք ունեն: Ամենեւին էլ պատահական չէ, որ դրանց թերթերն ագուցված
են ամբողջապես նռնաքարերով՝ թերեւս ընդգծելու համար Աջի հատւկ «իշխանություն»
ունենալու հանգամանքը: Հայ Եկեղեցու խորանների մեկնություններում
նռնենիները նմանեցվում են մարգարեների խոսքին, որոնք, առակի նման,
իրենց հաստ ու դառը կեղեւով ծածկում են քաղցրության Ավետիսը, անմահության
Պտուղը՝ Քրիստոսին: Հայկական գինեգործության մեջ մշտապես իր ուրույն
տեղն է ունեցել նռան գինին:
Դեկտեմբերի 31-ին, ճիշտ Ժամը 00:00-ին, Գյումրու Ս. Աստվածածին,
Ս. Նշան, Ս. Հակոբ, Ս. Գրիգոր Լուսավորիչ եւ Մարալիկի Ս. Աստվածածին
եկեղեցիներում կատարվեց նռնօրհնեքի կարգ:
Տարեմտին Ս. Աստվածածին առաջնորդանիստ մայր եկեղեցում նռնօրհնեքի
կարգ կատարվեց ձեռամբ Շիրակի թեմի Առաջնորդ Տ. Միքայել Արքեպս. Աջապահյանի:
Բարեպաշտական արարողության ավարտին օրհնված պտուղները բաժանվեցին
ներկա հավատացյալներին:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ԳԵՎՈՐԳ ՂԱԶԱՐՅԱՆԻ
>>>
|
|