ԽՆԿԱՐԿՄԱՆ
ԵՎ ՀԻՇԱՏԱԿԻ ՕՐ ԳՅՈՒՄՐՈՒ
ԹԻՎ 15 ԴՊՐՈՑՈՒՄ
զնվագույն
գաղափարների հաղթանակին նիրված պայքարների մեջ ամենասուրբը հանուն
քրիստոնեության և հայրենիքի մղված պայքարն է, իսկ ամենագովելի պայքարողը՝
քրիստոնյան: Անհերքելի ճշմարտություն է, որ հանուն հայրենիքի ազատագրության
հերոսացած մարտիկները ժամանակի հոլովույթում չեն մոռացվում: Ժողովրդի
կյանքում պայքարն ու պայքարողը հավերժանում են այն պարագայում միայն,
երբ նրանց նպատակը ոչ թե երկիրն է իր տարածություններով, հարստություններով
եւ անցողիկ փառքերով, այլ երկինքն իր օրհնություններով, սրբություններով
ու հավիտենական կյանքով:
Անշուշտ, մարդկային կյանքի նպատակը երկրի վրա խավարի ուժերի դեմ
պայքարն է՝ հանուն լույսի ու ճշմարտության հաղթանակի: Անկարելի է
ատելությամբ սեր, հակառակությամբ միություն եւ պատերազմով խաղաղություն
հաստատել մարդկանց ու ժողովուրդների կյանքում:
Սեպտեմբերի
27-ին՝ ճիշտ մեկ տարի անց, «Անմահության ճանապարհին» խորագրով հուշ-ցերեկույթ
ու խնկարկում էր Գյումրու թիվ 15 դպրոցում՝ նվիրված 44-օրյա պատերազմում
հերոսացած դպրոցի շրջանավարտ վեց սաների՝ Գրիգորյան Մերուժանի, Սանասարյան
Շիրազի, Հովհաննիսյան Գառնիկի, Եղոյան Սամվելի, Ասատրյան Նվերի,
Ասատրյան Հրանտի հիշատակին:
Բեմից հնչում էին դպրոցի երգչախմբի (խմբավար՝ Ջեմմա Մխոյան) հոգի
այրող երգն ու խոսքը: Երգն ու լռությունը խիստ խորհրդանշական էին,
որ, ներդաշնակելով միմյանց, դառնում էին մեր համազգային ու համաժողովրդական
ցավի ու վշտի թարգմանը: Այո, դա հարգանքի ու սիրո, ծնրադիր խոնարհումի
հոգեւոր տուրքն էր հերոս զավակների մաքրամաքուր հիշատակին: Արժանապատիվ
լռությունն իր «խոսքերում» տարողունակ հզոր ուժ եւ լիցքեր ունի:
Այդ լռության խորին խորհուրդն անբեկանելի է ու մեծապես պարտավորեցնող:
Միանշանակ, Աստծո օրհնության ներքո, մեր բանակը պիտի շարունակի վերակազմավորվել
եւ նույն քաջարի ոգով շարունակել երաշխավորը լինել մեր հայրենիքի
պետականության ու ժողովրդի անվտանգության:
Բացվեց նաեւ հուշատախտակ հերոսների նկարներով, որի բացման պատիվը
տրվեց դպրոցի սան, արցախյան վերջին պատերազմում վիրավորված զինվոր
Արտյոմ Սարուխանյանին:
Հուշ-ցերեկույթին
ներկա էին Շիրակի մարզպետ Հովհաննես Հարությունյանը, մարզի կրթության
բաժնի պետ Հրայր Կարապետյանը, մարզային իշխանությունների ներկայացուցիչներ,
հերոս տղաների ծնողներ, տատիկներ ու պապիկներ:
Հանդիսույթի առիթով դպրոց այցելած հյուրերին իր սրտի խոսքը հղեց
ուսհաստատության տնօրեն Սեդա Համբարձումյանը:
Այնուհետեւ դիմելով ներկաներին՝ Շիրակի մարզպետ Հովհաննես Հարությունյանն
առնձնակի նշեց. «Ո՛չ խոսքերը, ո՛չ որեւէ քայլ մեր ցավը չեն կարող
մեղմել, առավել եւս ձեր ցավը, սիրելի՛ ծնողներ: Թեթեւացնել մեր վիշտը
հեշտ չէ, բայց մենք պետք է շարունակենք ապրել հանուն մեր անմահացած
հերոսների, այսօր, վաղը եւ ապագայում պետք է հավատարիմ մնանք նրանց
հիշատակի առջեւ, սրբագրենք նրանց սխրագործությունները: Երանի նրանց,
որ ընկան մարտում ու ընկան հանուն հայրենիքի, հավերժ փառք ու խոնարհում
նրանց հիշատակին»:
Թիվ
15 դպրոցում բացվեցին նաեւ Մերուժան Գրիգորյանի ու Գառնիկ Հովհաննիսյանի
անվան դասասենյակներ: Դպրոցի տնօրինությունը հերոսների ծնողներին
նվիրեց ծաղիկներ: Այսուհետեւ անվանակոչված դասասենյակներում ուսումնառությունը
կլինի խթան՝ Հայոց երկրի ապագայի կերտման ճանապարհին:
Հաջորդ օրը՝ սեպտեմբերի 28-ին, ձեռամբ Շիրակի թեմի ՔԴՔԿ-ի վարիչ-տնօրեն
Տ. Նշան քհն. Պանֆյորովի օրհնվեցին, հերոսների անունները կրող, դասասենյակները
եւ կատարվեց տնօրհնեքի կարգ:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ՄԱՐԶՊԵՏԱՐԱՆԻ ԵՎ ԼԻԱՆԱ ԱԴԱՄՅԱՆԻ
>>>
|
|