«ԽՆԴՐԵՄՔ
Ի ՔԷՆ ՀԱՅՐ ՊԱՏՒԱԿԱՆ,
ԼՈՒՍԱՒՈՐԻՉ ԱԶԳԻ ՄԱՐԴԿԱՆ...»
ՍՈՒՐԲ ԳՐԻԳՈՐ ԼՈՒՍԱՎՈՐՉԻ «ՄՈՒՏՆ Ի ՎԻՐԱՊ»
ՏՈՆԸ ՍՈՒՐԲ ՅՈԹՎԵՐՔ ԵԿԵՂԵՑՈՒՄ
«Զբարձրեալն արարեր ապաւեն քեզ, ոչ հասցեն
առ քեզ չարք, եւ տանջանք
մի մերձեսցին ի յարկս քո»:
ՇԱՐԱԿՆՈՑ
ովորական
մահկանացուներիս համար անսովոր ու դժվարին, երբեմն նույնիսկ անհասկանալի
երկրային կյանք են ունենում սրբերը: Նրանց իրական ու ապրված կյանքը
նման է առասպելի, լեգենդի, ուր իրականը թվում է անհավանական, վավերականը՝
մտացածին: Սակայն ոչ պակաս զարմանալի է նաեւ նրանց հետմահու կյանքը,
կյանք, որ լավագույն վկայությունն է դառնում Տիրոջ առաքելության,
Նրա մահվան ու հարության խորհրդի:
Սուրբ Գրիգոր Լուսավորիչը Հայ Եկեղեցու թերեւս այն միակ Սուրբն է,
որ պատկանում է նաեւ համայն քրիստոնյա աշխարհին: Նա բացառիկ է ոչ
միայն իր սրբակենցաղ վարքագծով, այլեւ ապրած ողջ կյանքի վկայությամբ,
որ կատարյալ հրաշքի էր նման: Մեծ էր Ս. Գրիգոր Լուսավորչի առաքելությունը,
քանզի ճգնություններով, աղոթքներով ու անպատմելի չարչարանքներով
երկնեց նրա հոգին, ուր վերածնվելու էր մի ամբողջ հավատավոր ազգ:
Սուրբ Գրիգորը վերանորոգիչը եւ վերակենդանացնողը եղավ Հայոց Եկեղեցու:
Նրանով հաստատվեց Հայոց Կաթողիկոսությունը: Նա բարեկամ էր Աստծուն՝
ինչպես նահապետները, կանխագետ էր՝ ինչպես մարգարեները, Աստծո խոսքն
էր տարածում՝ ինչպես առաքյալները, ուսուցանում էր՝ ինչպես վարդապետները,
ճգնության բոլոր ճանապարհներն անցավ՝ ինչպես ճգնավորները:
Սրբի սոսկալի չարչարանքները պատկերացնելը միայն մարդկային տկար մտքին
ու զգացողություններին անհասանելի են: Սակայն Ս. Գրիգորը պիտի հասներ
կատարելության բարձրակետին եւ կատարեր ի վերուստ իրեն տրված առաքելությունը:
Խոր Վիրապը եղավ Լուսավորչի երկրային տառապանքների գերագույն արտահայտությունը,
լույսի ու խավարի պայքարի մարմնացումը: Անշուշտ, վիրապի խավարը չէր
կարող հաղթել լուսազգեստ Սրբին: Նա իր չարչարանքներով մեր ազգին
ծնկի բերեց Քրիստոսի առջեւ, քանզի Սուրբ Հոգու զորությունն էր նրա
մեջ:
Այսօր Սուրբը մեզ հորդորում է, որ հետեւենք իրեն, ձգտենք խաղաղության,
առ աստվածային սերը, փափագենք երջանկություն: Ամեն ինչ ոչինչ է այն
սիրո առջեւ, որ ուներ Սուրբ Գրիգորը: Նրա հոգին սավառնում է երկնքի
արքայության մեջ, տեսնում մեզ՝ այստեղ հավաքվածներիս եւ պատրաստ
է մեր բարեխոսը լինել:
ՍՈՒՐԲ ՊԱՏԱՐԱԳ Ս. ՅՈԹՎԵՐՔ ԵԿԵՂԵՑՈՒՄ
Մարտի 20-ին՝ «Մուտն ի վիրապ» տոնի առիթով, Շիրակի թեմի առաջնորդանիստ
Սուրբ Յոթվերք մայր եկեղեցում մատուցվեց Սուրբ եւ անմահ Պատարագ:
Օրվա պատարագիչն ու քարոզխոսն էր Տ. Եղիշե քհն. Նազարյանը: Դիմելով
ներկա հավատացյալ ժողովրդին՝ պատարագիչ Տեր Հայրը հանգամանալից մեկնեց
սուրբգրային ընթերցվածը եւ մանրամասնեց տոնի խորհուրդը:
ԱԼՎԱՐԴ ԿԱՂԶՎԱՆՑՅԱՆ
>>>
|
|