ՊԱՀՔԸ
ՀՈԳՈՒ ՊԱՅԾԱՌ ՋԱՀՆ Է, ԼՈՒՍԱՎՈՐ ԿԱՆԹԵՂԸ
ոգին
առաջնային է մարմնի հանդեպ. այս ըմբռնումով սահմանվեց պահքը:
Այն ամրապնդում է հավատը եւ մաքրում ու զորացնում հոգին: Միանշանակ
մարդը հոգի է ու մարմին եւ պարտադրված է մինչեւ մահ պահքի մեջ այս
երկուսն ունենալ: Առանց մեկի մյուսը տկար կլինի: Ինչպես մարմնի համար
հիվանդությունն է կործանարար, այնպես էլ հոգու համար՝ մեղքը: Հոգին
մեղքի հիվանդությունից բուժելու միջոցը պահքն է, նպատակը՝ ապաշխարանքը,
զղջումը, մեղքից հրաժարվելը: Մենք ե՛ւ մարմնով, ե՛ւ հոգով Աստծուն
պաշտելու կարիք ունենք, ուրեմն եւ պետք է պահենք մարմնավոր ու հոգեւոր
պահքը: Տերն ասում է. «Երբ դու ծոմ պահես, օծիր քո գլուխը եւ լվա
քո երեսը, որպեսզի չերեւաս մարդկանց որպես ծոմ պահող, այլ քո Հորը
գաղտնաբար, եւ քո Հայրը, որ տեսնում է ծածուկ է, կհատուցի քեզ» (ՄՏԹ.
Զ 17):
Թե ինչպիսի հոգեւոր խորհուրդներ ունի պահքը, իմանում ենք ավանդահիմն
սուրբ հայրերից: Մենք պահեցողությամբ հատուցում ենք մարմնի պարտքն
Աստծո հանդեպ, քանզի Աստված, որպես գերագույն Տեր, Իր տված բարիքներից
տասանորդ է պահանջում: Պահքը նաեւ առ Աստված սիրո դրսեւորում է,
քանի որ ենթադրում է մարմնավոր ծառայություններ: Հարկ է պահքի ժամանակ
ինքնաքննադատությամբ առաջնորդվել, որովհետեւ առանց ինքնաքննման չկա
ապաշխարանք: Տարին մեկ անգամ անհրաժեշտ է անցնել ինքնաքննման միջով,
որպեսզի կարողանանք իրապես մաքրել մեր հոգին, փոխել մեր ներաշխարհը,
ինքնագիտակցությունը, կյանքի եւ մարդկանց հանդեպ մեր մոտեցումները:
Պահքից անբաժան է աղոթքը: Ս. Գրքում պահքի մասին ասվում. «Բարի են
աղոթքները պահեցողություններով» (ՏՈԲԻԹ ԺԲ 8):
Պողոս պատրիարք Ադրիանուպոլսեցին ասում է. «Աղոթքը, պահքը եւ ողորմությունը
միասին երանության պսակ են հյուսում իրենց գործողի գլխի համար»:
Որքա՜ն կարեւոր է այս երեքի գործադրումը: Պահքի մեջ գտնվող մարդու
կատարած աղոթքը տարբեր է առօրյա հոգսերի մեջ Աստծուն աղոթող մարդու
աղոթքից: Նախապատրաստվենք ըստ արժանվույն, հոգեպես եւ մարմնապես
սրբված, տոնել մեր Տիրոջ՝ Հիսուս Քրիստոսի հրաշափառ Սուրբ Հարությունը:
ԱԼՎԱՐԴ ԿԱՂԶՎԱՆՑՅԱՆ
>>>
|
|