| Ն.Ս.Օ.Տ.Տ.
ԳԱՐԵԳԻՆ Բ ԱՄԵՆԱՅՆ ՀԱՅՈՑ
ԿԱԹՈՂԻԿՈՍԻ ՈՒՂԵՐՁՆ ԱՄԱՆՈՐԻ ԱՌԻԹՈՎ
 իրելի՛
զավակներ Մեր ի Հայաստան, Արցախ եւ ի սփյուռս,
 Մայր
Աթոռ Սուրբ Էջմիածնից հայրական սիրո Մեր ողջույնը, աղոթքն ու օրհնությունն
ենք բերում ձեզ տարեմուտի այս երեկո:
Հնի եւ նորի սահմանագծին, երբ մեր հայացքն ուղղվում է դեպի ապագա,
ծանր հոգով նաեւ վերհիշում ենք չարաղետ 2020 թվականը եւ սգում մեր
հազարավոր զավակների եւ Արցախ աշխարհի զգալի մասի կորուստը: Անցնող
տարում համավարակի եւ պատերազմի արհավիրքները կորստյան ցավ ու մահվան
վիշտ տարածեցին հայրենական մեր կյանքում: Մեր հոգիներն ալեկոծեցին
նաեւ Սիրիայում չընդհատվող պատերազմի ծանր հետեւանքները եւ աղետալի
դեպքերը Լիբանանում: Հայաստան եւ Արցախ մեր երկրի առջեւ ծառացած
քաղաքական, տնտեսական եւ սոցիալական մարտահրավերները, հայրենիքի
սահմաններին անկայուն խաղաղությունը, ապագայի անորոշությունը, արդարեւ,
տկարացրել են մեր ժողովրդի զավակների լավատեսության ոգին: Հուսախաբ
ենք, այո՛, բայց, Աստծուն ապավինած, լի ենք հավատով, որ պիտի հաղթահարենք
դժվարին այս ճգնաժամը:
«Դու չես լքի նրանց, ովքեր փնտրում են Քեզ, Տեր» (Սաղմ. Թ 11): Սաղմոսերգուի
այս խոսքերը հոգում ծրարած՝ մեր ժողովուրդը բոլոր ժամանակներում
իր հուսավառ հայացքն ուղղել է դեպի գալիքը: Հայոց անկախ պետականության
նվիրական տեսիլքն ու անհատնում ձգտումն իր սրտում՝ ազգս հայոց զորություն
է ունեցել հառնելու ամենածանր փորձություններից, անգամ հայրենազրկումի
եւ ցեղասպանության արհավիրքներից, եւ այսօր էլ, հավատում ենք, որ
ներուժ ունի վերակազմակերպելու իր կյանքը, զորացնելու հայրենի պետությունը:
Հայրենաշինության սրբազան առաքելությունը հաջողությամբ պիտի պսակվի
միայն մեր ժողովրդի կարող ու առողջ բոլոր ուժերի համերաշխ մասնակցությամբ
եւ միաբան ոգով: «Միաբանությունը,- ինչպես գրում է մեծն Եղիշե վարդապետը,-
բարի գործերի մայրն է, անմիաբանությունը` չար գործերի ծնողը»:
Սիրելինե՛ր, Հայրապետիս հորդորն ու պատգամն է՝ ստեղծված լրջագույն
իրադրության առջեւ զորանալ հավատով եւ ամրապնդել վճռականությունը,
որպեսզի ամենայն հանձնառությամբ կառուցենք եւ սերունդներին ավանդենք
հզոր, բարօր եւ անվտանգ հայրենիք: Աստծո Խոսքին ու քրիստոնեական
արժեքներին հավատարիմ՝ հոգ տանենք միմյանց նկատմամբ եւ ջերմագին
սիրով առ բազմաչարչար մեր հայրենիքը, մեր ջանքերն ու ուժերը մեկտեղենք՝
ի նպաստ ազգային ու հայրենական մեր կյանքի նորոգության ու պայծառության:
Մեր հայրենիքը հզորացնելու, մեր պետականությունը վտանգներից զերծ
պահելու, մեր սահմանները խաղաղ ու ապահով դարձնելու եւ համայն մեր
ժողովրդի կյանքը շենացնելու պատասխանատվությունն ամենքինս է: Այս
գիտակցությամբ հայրենիքի նոր օրը խարսխենք եղբայրասիրության, արդարության
եւ օրինահարգության վրա:
Նոր տարվա սեմին միասնաբար հայցենք, որ Տիրոջ Սուրբ Ծննդյան շնորհները
«յերկիր խաղաղութիւն, ի մարդիկ հաճութիւն» ավետիսով տարածվեն մեր
հայրենի եզերքներում: Աղոթենք ու երախտագետ սրտով հիշենք մեր նահատակներին,
շուտափույթ վերադարձ մաղթենք գերեվարվածներին, ապաքինություն՝ վիրավոր
մեր զավակներին եւ խնդրենք Աստծո զորակցությունն ու օրհնությունը
նրանց, մեր հերոսների ընտանիքներին եւ համայն մեր ժողովրդին: Աղոթենք
հայրենյաց պաշտպանության դիրքերում գտնվող մեր բանակի քաջարի զորականների
եւ բոլոր նրանց համար, ովքեր տարեմուտը դիմավորում են ծառայության
մեջ: Աղոթքով հիշենք եւ համավարակից մահացած մեր ժողովրդի զավակներին:
Ամենագութ Աստված, բարերար Քո կամքով եւ ամենառատ ողորմությամբ թող
2021 թվականը լինի խաղաղության, ազգաշեն ու հայրենանպաստ իրագործումների
տարի եւ մխիթարություն բերի մեր սրտերին, զորություն եւ հաղթություն՝
հայոց կյանքին:
Աստված պահապան մեր հայրենիքին եւ ժողովրդին:
Բարի, օրհնյալ տարի:
ԳԱՐԵԳԻՆ Բ ԿԱԹՈՂԻԿՈՍ ԱՄԵՆԱՅՆ ՀԱՅՈՑ
>>>
|
|
