Ես գիտեմ,
դուն ալ գիտես,
որ սոսկ լալով ու ողբալով եթէ շաղախենք մեր հայրենեաց հողը, հայրենիք
չի շինուիր:

 
ԽՐԻՄԵԱՆ ՀԱՅՐԻԿ

 

Ընթացիկ համար

 


Քեզ համար   

 


Մանուկներին

 


Արխիվ

 

Քարոզները

 

Բացիկներ

 

   
    ԻԲ Տարի, Թիվ 1 (253), հունվար 2021 թ.  


 

       

«ԱՅՍ ՎԻՃԱԿԻՑ ԿԱՐՈՂ ԵՆՔ ԴՈՒՐՍ ԳԱԼ,
ԵԹԵ ԲՈԼՈՐՍ ՄԻԱՍԻՆ ԵՆՔ»
ՀՀ ՆԱԽԱԳԱՀԸ ԳՅՈՒՄՐԻՈՒՄ ՀԱՆԴԻՊԵՑ ՊԱՏԵՐԱԶՄԻ
ՄԻ ԽՈՒՄԲ ՄԱՍՆԱԿԻՑՆԵՐԻ ՀԵՏ

յումրի կատարած աշխատանքային այցի շրջանակում նախագահ Արմեն Սարգսյանը դեկտեմբերի 25-ին Շիրակի թեմի սոցիալ-կրթական կենտրոնում հանդիպեց պատերազմին մասնակցած շիրակցի մի խումբ ժամկետային եւ պայմանագրային զինծառայողների ու կամավորականների հետ:

Հանդիպմանը մասնակցում էր նաեւ Շիրակի թեմի Առաջնորդ Գերաշնորհ Տ. Միքայել արքեպիսկոպոս Աջապահյանը:

Շնորհակալություն հայտնելով հայրենիքը պաշտպանելու եւ անձնուրաց ծառայության համար՝ նախագահ Սարգսյանն ասաց, որ պատերազմում մեր զինվորը չի պարտվել, մեր ժողովուրդը չի պարտվել: «Գիտեմ՝ շատ դժվար ճանապարհ եք անցել. մարդ կա՝ տասն օրվա ընթացքում անցնում է տասը տարվա ճանապարհ: Ձեզնից յուրաքանչյուրը հսկայական արհավիրքի, դժվարության ու դժբախտության միջով է անցել,- շեշտեց նախագահը:- Այո՛, այս պատերազմում մենք պարտվել ենք, բայց երբեք ձեզանից որեւէ մեկը թող իրեն պարտված չզգա: Այս կյանքում երբեք չկան վերջնական հաղթանակներ եւ վերջնական պարտություններ: Քսանվեց տարի առաջ հաղթել էինք եւ ամեն օր արթնանում էինք՝ մտածելով, որ հաղթանակած ժողովուրդ ենք, քնում էինք՝ հաղթած մարդու հոգեբանությամբ: Հետո պարզվեց՝ ինչ-որ տեղ պարտվեցինք եւ շատ ծանր: Բայց պարտվել ենք ոչ ձեր մեղքով, դուք չեք պարտվել, դուք հաղթել եք:

1994-ին հաղթեցինք, որովհետեւ շատ շուտ կամավորներից բանակ դարձանք, որովհետեւ ոգին նույնն էր, բայց թշնամուց մի քանի տարով առաջ էինք մեր կազմակերպվածությամբ ու պատրաստությամբ, որովհետեւ այլ երկրներից Մոնթեի նման մարդիկ եկան, ովքեր ինչ-որ փորձառություն ունեին: Խորհրդային բանակից եկան գեներալներ, գնդապետներ, մայորներ եւ կամավորական հսկա ուժից սարքեցին բանակ:

Անցած տարիների ընթացքում պետք է պատրաստվեինք պատերազմին: Չգիտես ինչու, հավատացել էինք, որ այլեւս պատերազմ չի լինելու այն դեպքում, երբ թշնամին ամեն օր մեր սահմանի մյուս կողմում պատրաստվում էր պատերազմի եւ չէր թաքցնում դա:

Իմ խորհուրդը ձեզ հետեւյալն է՝ ձեր կյանքն առջեւում է, եւ գուցե մի ուրիշ պատերազմ էլ է լինելու, ուր պետք է հաղթեք: Նորից եմ ասում՝ չկա վերջնական պարտություն, եւ դուք պարտված մարդիկ չեք, ձեր ոգին նույն տեղում է, եւ ձեզ նման հարյուրավորներ, հազարավորները կան: Ժողովուրդը չի պարտվել»:

Նախագահը նշեց, որ պետության պարտավորությունն ու բոլորիս պարտքն է հոգ տանել պատերազմում զոհված հերոսների ընտանիքների, ինչպես նաեւ վիրավորված, հաշմանդամություն ստացած զինծառայողների ու կամավորների մասին: Արմեն Սարգսյանն ընդգծեց, որ հանրապետության նախագահի աշխատակազմը պատրաստակամ է հնարավորինս աջակցել նրանց խնդիրների լուծմանը: «Ձեր կյանքը դեռ առջեւում է, չկա վերջնական պարտություն: Դժվար է, բայց պետք է պայքարեք: Ձեզանից յուրաքանչյուրն ընտանիք ունի, եւ այդ ընտանիքն ինչ-որ իմաստով նաեւ բախտավոր է, որ վերադարձել եք տուն»,- նշեց նախագահը՝ միաժամանակ վերստին իր խոնարհումը հայտնելով պատերազմում զոհված հերոսների հիշատակին: «Ձեր ընտանիքներին ուշադրություն դարձրեք՝ տատիկ-պապիկներից մինչեւ երեխաներ: Դա շատ կարեւոր է: Երկրորդ՝ գտեք ձեր կյանքը, ձեզանից ամեն մեկն ինչ-որ մասնագիտություն ունի կամ դեռ սովորում է: Մենք նախագահականում նախորդ ապրիլյան պատերազմից տղաներ ունենք, որ մեզ մոտ աշխատում են: Դուք չեք պարտվել, եւ ձեր կյանքն ու հաղթանակներն առջեւում են»,- հավելեց նախագահ Սարգսյանը:

Այնուհետեւ հիշեցրեց, որ պատերազմի հետեւանքներին առերեսվելու ենք երկար տարիներ, իսկ պարտությունից քաղած դասերը դեռ պետք է հասկանանք եւ խորը վերլուծության ենթարկենք, սթափ ու ճշգրիտ գնահատենք իրավիճակն ու մեր հնարավորությունները, ընդունենք առկա իրողությունները եւ մտածենք ներկայիս ճգնաժամային իրավիճակից դուրս գալու արդյունավետ ճանապարհների մասին:

Անդրադառնալով երկրում ստեղծված իրավիճակին՝ նախագահը նշեց, որ հիմա ժամանակը չէ սեւերի եւ սպիտակների բաժանման, եթե պետք է գույն ընտրենք, ապա այդ գույնը եռագույնը պետք է լինի»:

«Այս վիճակից կարող ենք դուրս գալ, եթե բոլորս միասին ենք. ես՝ ձեզ հետ, դուք՝ ինձ հետ: Դժվար է, բայց առաջին անգամը չէ, որ դժվարություններ ենք տեսնում,-ասաց նախագահը՝ հիշատակելով 1988-ի երկրաշարժը:- Այնպես որ պինդ եղեք, բոլորիդ առողջություն եմ մաղթում»:

Զինծառայողների հետ հանդիպումից հետո Արմեն Սարգսյանը, Միքայել Սրբազանի եւ Շիրակի մարզպետ Տիգրան Պետրոսյանի ուղեկցությամբ, այցելեց Սուրբ Ամենափրկիչ եկեղեցի:

ՀՀ ՆԱԽԱԳԱՀԻ ԱՇԽԱՏԱԿԱԶՄԻ
ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ՎԱՐՉՈՒԹՅՈՒՆ

>>>

 
     
         


 

 

Ընթացիկ համար Քեզ համար Մանուկներին Արխիվ   Քարոզները