Ստեղծագործում
է ընթերցողը
ՀԵ՛Տ ԴԱՐՁԵՔ, ՄԱՐԴԿԱՆՑ ՈՐԴԻՆԵՐ
ԿԱՄ ՀՈԳԵՎՈՐ ԵՐԿՐԱՇԱՐԺ
Սկիզբը՝ նախորդ համարներում
ախ
ասեմ՝ Եսենինն իր պատկերացրածին համաձայն էր ակնկալում՝ մեկուսի
հաղորդակցվել այս աղավաղված, ծուռ աշխարհի շտկումն իրականցնող Բարձրյալի
հետ: Եվ հետո աստվածապաշտ հանճարը վերոհիշյալ միտքը բանաստեղծորեն
վերարտադրում էր բացարձակապես յուրովի, խորհում այն մասին, որ, իր
բառերով, «Քրիստոս նույնպես չի բացատրել կյանքի նպատակը»: Իրատեսորեն
նայելով կյանքին եւ մարդուն՝ ասում էր. «Ես կրոնական մարդ եւ միստիկ
չեմ: «Մահվան կնիքը ճակատին դրոշմված» բանաստեղծ հանճարի նման՝ երբեմն
արտառոց հույզերին տեղիք տվող երիտասարդ հայ բանաստեղծին չպիտի պիտակավորել՝
որպես քրիստոնեական հավատի նկատմամբ անհատապաշտական վերաբերմունք
դրսեւորողի: Անհատի աստվածն ամենքինս է, ամենքիս աստվածը՝ անհատինը:
* * *
Եկանք գլխավորին՝ այս անդրադարձը անկաշկանդ կերպով գրելուս առիթին:
Առիթ, որին չանդրադառնալ, կնշանակեր իզուր տեղը ջուր ծեծել: Առիթ
ասվածը չի բավարարի՝ Գյումրու Սուրբ Յոթվերք եկեղեցու խորանում տեսածս
անմոռաց պատկերն ուրվագծելու համար: Ամենից առաջ հոգու խորանի՝ հոգեաշխարհի
կենդանի արտացոլք էր այդ պատկերը: Հայացքը Հիսուս Քրիստոսի մեծամասշտաբ
հարթաքանդակին՝ ինքնամոռաց, ծնկաչոք երկրպագողը Առաքելն էր… Աշխարհից,
ինքն իրենից վերացած` ինչ-որ աղոթք էր մրմնջում: Ինչպե՞ս ասեմ, ի՞նչ
բառերով… Շրջապատից անջատված երիտասարդ բանաստեղծի մրմնջոցը սովորական
աղոթք չէր: Այն աստվածանվիրման լուսավառ, խաղաղամած խորհրդանշան
էր` ո՛չ վրձնված կտավ, ո՛չ ձեռակերտ արձան, ո՛չ էլ անձեռակերտ գրական
հուշարձան… ջերմեռանդ հույզեր ճառագող եւ թեթեւորեն վեր սահող կենդանի
մարդու պատկեր: Պատրանք չէր տեսածս, այլ` իրողություն, որի ականատեսը
լինելով` խիստ հուզվեցի: Քիչ անց Առաքելը, նիրհից արթնացողի պես,
երկնքից երկիր իջավ, դուրս եկավ խորանից եւ, իրեն հավաքելով, վերցրեց
պայուսակը, դուրս քաշեց ինչ-որ գիրք ու այն ներկայացրեց ընկերներին:
Ես, հետաքրքրությունից դրդված, հայացքս սեւեռել էի գրքի կազմին դրոշմված
հայտնի նկարին, որ, 88-ի ահեղ երկրաշարժի առաջ բերած, մի արտառոց
ավերակի պատկեր էր: Մի պահ աչքերիս առջեւ երեւակվեցին կորուսյալներիս
հոգեցունց ուրվապատկերները: Ներըմբռնողական ինչ-որ զգացողություն
ինձ հուշում էր, որ Առաքելը որսացել էր իր ձեռքի գրքին բեւեռված
հայացքս: Չէի սխալվում: Նա դարձավ ինձ եւ հարցումս կանխեց. «Այստեղ
մենք հաճախ ենք հանդիպում, ափսոս, որ մոտ ծանոթներ չենք: Ձեր գրականագետ
լինելը գիտեմ, իմացել եմ, որ նաեւ բանաստեղծ եք: Ես էլ եմ ստեղծագործում:
Դասականներից մեկի ասածի նման՝ բռնել եմ մի մեծ ստեղծագործության
պոզերից, այն չափածո միստերիաների նմանողությամբ եմ շարադրում: Ցավոք
երկար ժամանակով Հայաստանից բացակայելու եմ, թե չէ կուզենայի Ձեզ
հետ գրքիս մասին կարծիքներ փոխանակել:
Այնուհետեւ շարունակեց անդրադառնալ ընկերների հետաքրքրությունը նույնպես
շարժած գրքին: «Երեկ Երեւանում էի: ՀԳՄ հրատարակչության տպարանում
բանաստեղծություններիս ժողովածուն է հրատարակվում: Այս գիրքը, որի
կազմարարական աշխատանքը դեռ չի ավարտվել, ազդօրինակներից մեկն է,
ինձ տվեց տպագրող վարպետը: Գիշերս կարդացի եւ… չզարմանաք` այն նորօրյա
միստերիա գրելու վճռականությունս ամրապնդեց: Պետքական, ցավատանջ
ապրումներից ծնված եւ ի խորոց սրտի առ երկինք հղված անկեղծ խոսք
է, երկխոսություն Աստծո հետ»:
Եվ անսպասելիորեն գիրքը մեկնեց ինձ`ասելով. «ճիշտ կլինի,որ այն գտնի
իրենով հետաքրքրվողին, առավել եւս երկրաշարժն ապրած գրականագետին»:
Այնուհետեւ նույնիսկ շնորակալություն հայտնելու ժամանակ չտալով`
երկու համագյուղացի ընկերներին շտապեցնելով` դուրս եկավ զանգակատան
կողքի դռնից:
Երբ մտորումներիս հետ մենակ մնացի, մտա մոտակա զբոսայգի եւ, նստելով
մի ստվերածածկ նստարանի, բացեցի Առաքելի` ինձ նվիրած գիրքը: Հանկարծակիի
եկա` ձեռքիս իմ «Հետ դարձե՛ք, մարդկանց որդիներ կամ հոգեւոր երկրաշարժ»
գրքի կիսակար ազդօրինակն էր: Իրոք անակնկալ էր, քանի որ գրողների
միությունից ինձ ծանուցել էին, որ այն լույս էր ընծայվելու տարեվերջին՝
նախադեկտեմբերյան օրերին:
* * *
Առաքելից բաժանվելուցս տարիներ են անցել: Շատ, շատ եմ ափսոփում,
որ այդ աստվածատուր շնորհների տեր մարդուն, դեռ չմտերմացած, կորցրի:
Նրա մասին որեւէ հավաստի տեղեկություն չունեմ: Սփյուռքահայ մի զբոսաշրջիկ
ինձ պատմեց Վենետիկում, Մխիթարյանների միաբանության հանրահայտ գրադարանում
իրեն հանդիպած մի մագիստրոսի մասին, որը լատինատառ բնագրերով միջնադարյան
միստերիական դրամատուրգիան էր ուսումնասիրում: Անունը, ցավոք, չէր
հիշում: Հավանական է` այդ հետազոտող մագիստրոսը Առաքելն է եղել:
Շարունակելի
ՍԵՐԳԵՅ ԿՈՒՐԱԶՅԱՆ
ԲԱՆ. ԳԻՏ. ԹԵԿՆԱԾՈՒ, ԴՈՑԵՆՏ
>>>
|
|