FLY-Ը
ՊԱՏԵՐԱԶՄԻ ԵՎ ՀԵՏՊԱՏԵՐԱԶՄՅԱՆ ՕՐԵՐԻՆ
եպտեմբերի
27-ի առավոտը տագնապով սկսվեց. վախ, հուզմունք, անորոշություն, միաժամանակ
հայրենասիրություն, պայքարելու, կռվելու, մարտնչելու, հաղթելու խառը
զգացողություններ: Ամեն մեկը փորձեց հնարավորության սահմաններում
մասնակցել պատերազմին՝ առաջնագծում, թե թիկունքում: Անելիք շատ կար:
Մեծաթիվ
ընտանիքներ Արցախից տեղափոխվեցին Հայաստանի տարբեր մարզեր: Խուճապի
ու շտապողականության պատճառով ընտանիքներից շատերն իրենց հետ նույնիսկ
անձնագիր չէին վերցրել: Միայն մի ձեռք հագուստով, առանց որեւէ իր
վերցնելու՝ փորձել էին փրկվել թշնամու անըդմեջ ու կյանքեր խլող կրակից:
Դեռ հայտնի չէր, թե ո՞ւր են հանգրվանելու, որքա՞ն ժամանակով եւ,
որ ամենակարեւորն էր, ե՞րբ են վերադառնալու:
Հայաստան հասնելուն պես տեղավորվել էին տարբեր ընտանիքներում, դպրոցների,
մանկատների շենքերում: Բնականաբար կարիք եւ անհրաժեշտություն կար
առաջնային իրերի՝ սննդի, հագուստի, կոշիկի, խաղալիքների, խնամքի
եւ հիգիենայի պարագաների… Շատերը գործի լծվեցին՝ օգնության ձեռք
մեկնելով հնարավորինս մեծ թվով ընտանիքների:
FLY-ը
եւս անմիջապես գործի անցավ: Մարզպետարաններից վերցնելով արցախցի
ընտանիքների թվաքանակն ու հասցեները՝ ուղեւորվեց իր օգնությունն
ու հոգատարությունը փոխանցելու հայրենակիցներին: Այցելելով Հայաստանի
գրեթե բոլոր մարզերում հանգրվանած 260 եւ ավելի արցախցի ընտանիքների՝
FLY-ն օգնեց նրանց ոչ միայն նյութապես: Մտերմիկ ու սրտացավ խոսքերը,
որպես լավագույն սպեղանի, ամոքում էին բոլորի տագնապած սրտերը:
Այցելությունները շարունակվում են անգամ հրադադարից հետո՝ այս անորոշ
օրերին եւս: FLY-ն ամեն ինչ անում է՝ չթողնելով, որ ընտանիքներն
զգան տանից հեռու լինելու իրողությունը: Նյութական աջակցությունից
բացի, FLY-ը փորձում է վերջիններիս հետ կիսել անհանգստությունն ու
հարազատների անդառնալի կորստի ցավը՝ արցախցի երեխաների, մայրերի
ու տատիկների համար հանդիսանալով լուսավոր ու ժպիտ բերող այն հարազատը,
ով մենակ ու անօգնական չթողեց ոչ մեկին:
Արցախցի ընտանիքներին այցելելուց զատ՝ FLY-ն սկսեց տնայցեր կատարել
վիրավորների ու զոհվածների ընտանիքներ: Հոգեպես ծանր, բայց միեւնույն
ժամանակ խիստ անհրաժեշտ այս աշխատանքը FLY-ն իրականացնում է շաբաթը
յոթն օր՝ օրական 10-ից 12 ժամ հատկացնելով դրան:
Խիստ
կարեւոր է FLY-ի այցելությունը պատերազմում զոհված մեր հայրենակիցների
ընտանիքներ, եւ, մշտական աջակցությունից բացի (սնունդ, հագուստ,
կոշիկ, խնամքի, հիգիենայի պարագաներ), նաեւ մխիթարական ու սփոփանքի
խոսքերով է քաջալերում նրանց: Դժվար է խոսքեր գտնել այն ծնողի համար,
ում որդին հերոսաբար կյանքն է նվիրաբերել բոլորիս, նայել այն մանկան
աչքերին, ում ծնողը պաշտպանել է մեզ անձնվիրաբար, այն կնոջ դեմքին,
ում ամուսինը թողել է իրեն հանուն սուրբ հողի:
Թիկունքը պետք է ուժեղ լինի, պայքարող, դիմացկուն, հոգատար, խնամող,
մխիթարող ու աջակցության ձեռք մեկնող: FLY-ը միշտ այնտեղ է, ուր
կարիք կա: Գնում է, որ փարատի նեղությունն ու անօգնականությունը,
որ իր ամուր ու հոգացող ձեռքը մեկնի կարիքավորին, որ հույս ու ժպիտ
պարգեւի: FLY-ի գործունեությունը մարդասիրական ու բարեգործական լավագույն
օրինակներից է:
ԼԵՆԱ ՄԱՐԳԱՐՅԱՆ
ԼՈՒՍԱՆԿԱՐՆԵՐԸ՝ ԱՐՄԻՆԵ ՄԱՐԳԱՐՅԱՆԻ
>>>
|
|