Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

«ԽՈՍՏՈՎԱՆ ԵՂԻՑՈՒՔ ԱՆՈՒԱՆ ՔՈՒՄ ՍՐԲՈՅ ԵՒ
ՊԱՐԾԵՍՑՈՒՔ ՅՕՐՀՆՈՒԹԻՒՆՍ ՔՈ»
ՈՒԽՏԻ ՍՈՒՐԲ ՊԱՏԱՐԱԳ ՍՈՒՐԲ ՄԻՆԱՍ ՄԱՏՈՒՌՈՒՄ

եկտեմբերի 7-ին՝ Սուրբ Մինասի հիշատակության օրը, Գյումրու համանուն մատուռը լիքն էր հավատավոր գյումրեցիներով, ովքեր ուխտավորաբար ներկա էին մատուցվող Սուրբ եւ անմահ Պատարագին: Օրվա պատարագիչն էր մատռան հոգեւոր հովիվ Տ. Ստեփանոս քհն. Ավետիսյանը:

Սրբազան արարողակարգի ընթացքում՝ «Հայր մեր»-ից առաջ, «Ոչ միայն ի Նա հաւատալ, այլեւ վասն նորա չարչարից» բնաբանով, ոգեշունչ քարոզ խոսեց պատարագիչ Տեր Հայրը՝ առանձնակի անդրադարձ կատարելով նաեւ օրվա սուրբգրային ընթերցվածին եւ մեկնելով տոնի խորհորդը:

Տեր Ստեփանոսն առանձնակի անդրադարձ կատարեց նաեւ Սրբի կերպարին, քրիստոնեական հավատի ընդունմանը, օրինակելի վարքին: Սուրբ եւ ճշմարիտ Մինասը՝ Քրիստոսի անարատ զորականը, ազգությամբ եգիպտացի էր եւ թագավորի զորքում էր ծառայում: Դարձի գալուց հետո, երբ լսում է ամբարիշտների հրամանը, դուրս է գալիս զինվորական ծառայությունից եւ բնակվում անապատում:

Հընթացս սրբազան արարողակարգի ներկա հավատացյալներն ստացան Սուրբ Հաղորդություն:

Ի ԴԵՊ

Մատուռը կառուցվել է ծննդով գյումրեցի, այժմ Խաբարովսկ քաղաքում բնակվող, գործարար Սամվել Սողոյանի բարերարությամբ: Այն գտնվում է Գյումրու հյուսիսային կողմում, ձորի մեջ եւ վեր է խոյանում, բարեպաշտ գյումրեցիների կողմից սիրված եւ ուխտատեղի դարձած, Սուրբ Մինաս մատուռի տեղում: Այստեղ, ըստ ավանդության, ամփոփված են ճգնավոր Սրբի մասունքները:

Աղոթատունը խաչաձեւ կենտրոնագմբեթ կառույց է՝ կարմիր մաքուր տաշված տուֆաքարով եւ մեկ կամարակապ մուտքով: Հյուսիսային կողմում ամփոփված են Սրբի մասունքները՝ խաչքար տապանակով: Չորս սյուն ունեցող Սուրբ Մինաս մատուռի գմբեթի թմբուկը գլանաձեւ է՝ ծածկված սրածայր վեղարով, վրան խաչ: Արեւելյան կողմում կիսակլոր աբսիդն է՝ ցածր բեմով: Յուրաքանչյուր խաչթեւի ճակատային մասում բացվում է մեկական կլորավուն լուսամուտ: Հարավային պատի վրա կառուցման մասին արձանագրությունն է:

Աղոթատունն օծվել է ձեռամբ Շիրակի թեմի Առաջնորդ Տ. Միքայել արքեպս. Աջապահյանի:

ԱԼՎԱՐԴ ԿԱՂԶՎԱՆՑՅԱՆ

>>>